Salamo 139
139
SALAMO Tompo ô, fantatrao avokoa ny momba ahy
1 Tao amin’ny tahirin-kiran’ny filohan’antoko-mpihira. Salamo nataon’i Davida.
TOMPO ô, nandinika ahy Ianao
ka fantatrao avokoa ny momba ahy.
2Fantatrao aho na mipetraka na mitsangana;
elabe mialoha, dia efa tsinjonao ny hevitro.
3Voadinikao aho na mamindra na miato;
ary tsy misy miafina aminao ny làlan-kalehako.
4Tsy mbola eo am-bavako akory ny teny holazaiko,
dia indro efa fantatrao avokoa, TOMPO ô.
5Voambombanao aho na eo aloha na eo ivoho;
ny fiarovanao no apetrakao amiko.
6Mahagaga loatra amiko ny fahalalànao ahy;
avo tokoa izany, ka tsy takatro velively.
7Aiza no hialàko lavitra ny Fanahinao?
Aiza no handosirako tsy ho eo anatrehanao?
8Raha miakatra any an-danitra aho, any Ianao;
mandry any amin’ny toeran’ny maty aho, io koa Ianao.
9Raha maka ny elatry ny mazavatsinanana aho
na lasa honina any am-paran’ny ranomasina,
10dia mbola ny fiarovanao no mitondra ahy any
ary mbola ny herinao koa no mihazona ahy.
11Ka hoy aho hoe: «Aoka ny haizina hanarona ahy!
Aoka ny hazavana manodidina ahy hanjary alina!»
12Na ny haizina aza tsy maizina aminao,
ary ny alina koa dia mazava toy ny andro:
ny haizina dia toy ny hazavana ihany!
13Ianao no nahary ny saina amam-panahiko
sy namolavola ahy tao an-kibon-dreniko.
14Midera Anao aho fa nataonao
ho zava-mahatalanjona tokoa;
zava-mahagaga ny asanao
ary ekeko mihitsy izany.
15Tsy misy takona taminao izany tenako,
fony aho noforoninao tao amin’ny miafina
ka notenominao tao an-kibon-dreniko.
16Tsy mbola nisy endrika aho no efa hitanao;
voasoratrao tao amin’ny bokinao avokoa
ireo andro voatendrinao hiainako,
talohan’ny tsy mbola nisiany akory.
17Tsy haiko takarina velively ny hevitrao
sady akory ity hamaroany, ry Andriamanitra ô!
18Raha hanisa aho, dia maro noho ny fasika ireny;
raha hahisa aza, dia mbola tsy hahatakatra Anao.
19Andriamanitra ô, haringanao mihitsy anie
ny olon-dratsy
ary hohalavirinao ahy anie ny mpamono olona!
20Miresaka Anao amim-pihatsarambelatsihy
ireo fahavalonao
sady mitonona Anao mba hoenti-mamitaka.
21Ankahalaiko ny mpankahala Anao, TOMPO ô;
ary maharikoriko ahy ny mpanohitra Anao.
22Hàlako dia hàlako tokoa ireo
sady efa tonga fahavaloko.
23Andriamanitra ô, diniho aho ka fantaro ny foko;
zahao toetra aho ka fantaro eritreritra.
24Jereo raha miroso amin’ny làla-mampidi-doza aho,
dia tariho hizotra amin’ny sori-dàlanao hatrizay.
Currently Selected:
Salamo 139: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
