Mikà 7
7
Ny fitarainan’ny mpaminany
1Indrisy, tahaka ny olona mioty aviavy
aorian’ny fiotazam-boankazo aho
ka tsy mahita aviavy masaka ifotony
izay ankafiziko tokoa;
ary tahaka ny olona mitsimpona sampaho
aorian’ny fiotazam-boaloboka aho,
ka tsy mahita voaloboka firy hohanina!
2Fa foana teo amin’ny tany
ny olona tena mpivavaka;
ary tsy misy olo-marina intsony
eo amin’ny olombelona.
Samy manotrika handatsa-dra avokoa izy rehetra;
ary samy mihaza mpiray tampo
amin’ny fandrika harato ny tsirairay.
3Vonona hanao ratsy ny tanany;
ny mpitondra sy ny mpitsara mitaky tsolotra;
ary ny lehibe milaza izay zavatra iriny,
ka miara-miteti-dratsy#7.3 miara-miteti-dratsy: tsy mazava loatra ny hevitry ny matoanteny hebreo. hahatanteraka azy,
4Ny tsara indrindra aminy dia toy ny roy,
ary ny mahitsy indrindra aminy
dia ratsy noho ny fefy tsilo.
Ho avy ny andro famaizana anareo
araka ny nambaran’ireo mpaminany mpitilinareo;
ary, ankehitriny aza, dia efa manahy mafy ianareo.
5Aza matoky namana,
ary aza miantehitra amin-tsakaiza.
Tandremo tsara ny vavanareo
na dia eo anatreham-bady aza.
6Fa ny zanakalahy maniratsira ny rainy,
ny zanakavavy manohitra ny reniny,
ny vinantovavy manohitra ny rafozam-baviny,
ary ny ankohonan’ny olona ihany no fahavalony#7.6 Ampit Mt 10.35-36 sy Lk 12.53..
7Fa izaho kosa mitodika amin’ny TOMPO
ary manantena an’Andriamanitra mpamonjy ahy,
fa hihaino ahy ilay Andriamanitro.
Fanantenana sy vavaky ny vahoaka
8Aza mihomehy ny aminay ianareo fahavalonay#7.8 Ny mpaminany eto dia miteny amin’ny anaran’ny vahoaka israelita tao Joda (izany no nanovana ny mpisolo anarana ho milaza maro); fa eo amin’ny and 11-13 kosa izy dia miteny amin’ny vahoaka jodeanina. –ianareo fahavalonay: angamba i Edôma no resahina eto (jereo Hôb 12) na fahavalo amin’ny ankapobeny.!
fa na lavo aza izahay, dia mbola hiarina;
ary na mipetraka ao amin’ny maizina aza izahay,
dia ny TOMPO no fahazavana ho anay.
9Satria efa nanota tamin’ny TOMPO izahay,
dia hozakainay ny fahatezerany,
mandra-piarony ny adinay
ka hanomezany rariny anay.
Hamoaka anay ho eo amin’ny mazava Izy
ka ho finaritra izahay hahita ny soa nataony taminay.
10Hahita izany ny fahavalonay
ka ho rakotry ny henatra,
dia ireo niteny taminay hoe:
«Aiza ihany ny TOMPO Andriamanitrareo?»
Ho finaritra izahay hahita azy ireo,
fa amin’izay dia ho tonga fanosy
toy ny fotaka eny an-dàlana izy.
11Ho avy ny andro hananganana indray
ny màndan’ny renivohitrao, ry Joda;
ka amin’izany andro izany,
dia hitarina lavitra kokoa ny faritry ny taninao.
12Amin’izany andro izany, dia hiverina ho aminao
ny mpiray tanindrazana rehetra
hatreo Asiria ka hatrany Ejipta,
hatreo Tiro ka hatrany Eofrata#7.12 hatreo Tiro ka hatrany Eofrata: araka ny dkt tranainy grika izany; fa ny RM dia manao hoe hatreo Ejipta ka hatrany Eofrata. ,
hatreo amin’ny ranomasina iray
ka hatrany amin’ny ranomasina hafa,
hatreo amin’ny tendrombohitra iray
ka hatrany amin’ny tendrombohitra hafa.
13Ary ho tonga lao ny tany sisa
noho ny asa ratsy vitan’ireo mponina ao aminy.
14TOMPO ô, ny tehinao no ento miandry ny vahoakanao,
dia ny andianondry fanananao,
izay mitoka-monina eo amin’ny tany be akata
voahodidina saha mahavokatra;
aoka izy handrasana any Basàna sy Gilehada#7.14 Ao amin’ny and 14-20 ny mpaminany* dia mijoro indray ho mpitondratenin’ny vahoaka, jereo ny and 8-10 sy ny naoty momba ny and 8. –Gilehada: jereo ny naoty tandrifin’ny Ham 1.3.
tahaka ny tamin’ny andro taloha.
15«–Toy ny tamin’ny andro
nialan’ny vahoakako tany Ejipta,
dia hanao zava-mahagaga ho azy Aho#7.15 Toy ny... ho azy Aho: misy mamboatra kely ny RM ka mandika hoe Toy ny tamin’ny andro namoahanao anay avy tany Ejipta, dia anaovy zava-mahagaga izahay. –Eo amin’ny and 14-20 dia miteny amin’ny anaran’ny vahoaka israelita indray ny mpaminany, jereo ny and 8-10 sy ny naoty tandrifin’ny and 8..–»
16Hahita izany ny firenen-kafa
ka ho menatra na dia eo aza ny heriny rehetra.
Ho gaga loatra izy ka hitampim-bava
sy ho gina sofina.
17Hilela-bovoka toy ny menarana
sy ireo biby mikisaka amin’ny tany izy.
Amin-kovitra no hialany
avy ao amin’ny tranomimanda fiereny,
ka hanatonany Anao TOMPO Andriamanitray.
Eny, hangorohoro izy ary hanaja Anao.
18Tsy misy andriamanitra mitovy aminao,
ry TOMPO mpanaisotra ny heloka.
sy mpamela ny fahadisoana.
Noho ireo sisa velona aminay vahoaka fanananao,
dia tsy mitahiry fahatezerana mandrakizay Ianao
fa tia maneho fitiavana aminay.
19Hamindranao fo indray izahay,
hohitsakitsahinao ny helokay;
ary any ambany ranomasina lalina any
no hanarianao ny fahotanay rehetra.
20Hasehonao aminay taranak’i Abrahama sy i Jakôba
ny toetranao mahatoky sy ny fitiavanao,
araka izay efa nianiananao tamin’ny razambenay
hatramin’ny andro fahagola.
Currently Selected:
Mikà 7: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
