Jôba 31
31
Valinteny farany nataon’i Jôba (farany): Loha mitraka no anatrehako an’Andriamanitra
1Efa nanao fanekena tamin’ny masoko aho,
fa tsy hanam-pijery mitsiriritra tovovavy.
2Raha tsy izany dia inona no lova ho ahy
avy amin’ilay Andriamanitra Tsitoha
any amin’ny toerana ambony any?
3Tsy loza va no anjaran’ny ratsy fanahy,
ary fahoriana ho an’ny mpanao heloka?
4Moa tsy hitan’Andriamanitra ve ny toetrako?
Moa tsy manisa ny diako rehetra ve Izy?
*
5Raha tàhiny nandeha tamin’ny lainga aho
na nihazakazaka ho amin’ny fitaka,
6dia enga anie holanjain’Andriamanitra
amin’ny mizana tsy mandainga
hahafantarany fa tsy manan-tsiny aho.
7Fa raha niala tamin’ny lalany ny diako
na nanaraka ny filan’ny maso ny foko
na nisy tsiny niraikitra tamin’ny tanako,
8dia aoka olon-kafa no hihinana izay nafafiko
na aoka hongotana ny zavatra izay namboleko.
*
9Raha tàhiny sodokam-behivavy iray ny foko
ka namitsaka teo am-baravaran’ny namako aho,
10dia aoka hampiasain’olon-kafa ny vadiko#31.10 hampiasaina na hasaina manodina vato fikoseham-bary.,
ary aoka ny olon-drehetra no handry aminy!
11Fa fanitsakitsaham-bady izany nataoko izany,
eny, heloka melohin’ny mpitsara.
12Afo mandevona hatrany am-pahaverezana izany,
ka handrava ny vokatro manontolo.
*
13Raha tàhiny nanan-drariny ny mpanompolahiko
na ny mpanompovaviko izay nifamaly tamiko,
dia tsy nolaviko fa notandroviko tokoa.
14Raha tsy izany, dia inona no hataoko,
rehefa hitsangana hiampanga ahy Andriamanitra?
Ary inona no havaliko, rehefa mamototra Izy?
15Moa tsy Andriamanitra iray ihany
no nahary anay tao an-kibon-dreninay,
sady Izy koa no namolavola anay tao am-bohoka
na ny tenako na ireo mpanompoko ireo?
*
16Moa efa nanosi-bohon-tanana ny mahantra ve aho
ka nahapahina ny mason’ny mpitondratena,
17na nihinana samirery ny mofoko,
ka tsy namela akory ho an’ny kamboty?
18Fa hatramin’ny fahatanorako aho
dia tahaka ny ray niahy ny kamboty;
ary hatramin’ny fahazazako aho
ny mpitondratena no nikarakara.
19Moa efa nahita mahantra mitanjaka ve aho
na fadiranovana tsy nanan-kitafy,
20ka tsy nisaotra ahy ny tenany
noho izy nomeko akanjo nanafana azy
dia akanjo natao tamin’ny volon’ondriko?
21Raha naninji-tanana hampahory ny kamboty aho
satria mahita fa iandaniam-pitsarana,
22dia aoka ny soroko hiendaka amin’ny toerany
ary ny sandriko hitsoaka amin’ny kihoko.
23Satria matahotra ny famaizan’Andriamanitra aho
ka tsy afa-manoatra manoloana ny fiandrianany.
*
24Moa nametra-pitokiana tamin’ny volamena ve aho
na nanao taminy hoe: «Ianao no aroko»?
25Tsy nifaliako noho ny habetsahan’ny fananako
sy ireo harena voaangon’ny tanako.
26Raha nahita ny masoandro mamirapiratra aho
na ny volana mizotra mangarangarana,
27moa voababo mangingina hitsaoka azy ve ny foko,
ary moa nanoroka tanana ve aho ho fanajana azy?
28Ny fanaovako izany zavatra izany
dia heloka melohin’ny mpitsara ihany koa,
satria fandavako an’Andriamanitra Avo Indrindra.
*
29Moa faly tamin’ny fahavoazan’ny fahavaloko ve aho
na nibitabitaka raha nianjadiam-pahoriana izy?
30Tsia, fa tsy navelako hanota akory ny vavako
ka hanompa azy sy hanozona azy ho faty.
31Moa ny fianakaviambeko tsy efa nanao hoe:
«Iza no tsy novokisany hena?»
32Tsy nandry tany alatrano ny vahiny,
fa novohako varavarana hatrany#31.32 Momba ny fandraisam-bahiny: jereo Gen 18.6-8..
*
33Moa nanafina ny fahadisoako
tahaka ny sarambaben’olona#31.33 Dkt hafa: tahaka an’i Adama fahizay. ve aho
na nikobona ny heloko tato anatiko?
34Tsia, tsy natahotra ny vavam-bahoaka aho
na nanahy ny fanaratsian’ny fokonolona,
ka hoe hangina ary tsy sahy hivoaka ny trano.
*
35Satriko mba hisy hihaino ahy,
fa azoko soniavina izay voalazako#31.35 Ny sonia antsoina eto dia ny tào, litera farany amin’ny abidỳ hebreo. Dkt hafa izay no teniko farany.!
Hamaly ahy anie Andriamanitra Tsitoha.
Fa ny amin’ny taratasy fiampangana
voasoratry ny mpifanandrina amiko
36dia hiantsorohako tokoa izany
ary hisatrohako toy ny satroboninahitra aza.
37Hambarako amin’Andriamanitra
ny zavatra tsirairay nataoko;
ary toy ny zanak’andriana aho#31.37 Misy mamindra ny and 35-37 ao aorian’ny and 40a satria ireo no tena mamarana ny lahatenin’i Jôba.
ka tsy matahotra hanatona Azy.
*
38Raha niantso tody tamiko ny tany voleko
ka niara-nitomany ny vavasako,
39raha nihinam-bokatra maimaim-poana aho
ka tsy nanaja ny zon’ireo mpiasako,
40dia aoka ny tsilo no haniry hisolo ny varimbazaha
ary ny ahi-dratsy no hirobona hisolo ny ôrza!
*
Tapitra ny tenin’i Jôba.
Currently Selected:
Jôba 31: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
