Isaià 9
9
1Ny vahoaka mandeha ao anatin’ny haizina
dia hahita hazavana lehibe;
ary ny olona mipetraka ao amin’ny tany
izay tandindomin’ny fahafatesana
dia hiposahan’ny hazavana.
2Nohamaroinao ny fifaliany
ary nampitomboinao ny firavoravoany.
Miravoravo eo anatrehanao izy
tahaka ny iravoravoana amin’ny fararano
sy anaovana antsoantsom-pifaliana
rehefa injay mizara babo ny olona.
3Fa ny ziogam-pamoretana nanindry ny vahoakanao
ny tsora-kazo nikapohana ny lamosiny,
ny kibay namelezan’ny mpampiasa azy
dia samy hopotehinao avokoa
toy ny tamin’ny andro nampandosiranao ny Midianita#9.3 Fahatsiahivana ny fandresen’i Gidehôna (Mpits 6–7) izany..
4Fa ny kiraro rehetra entim-pahavalo
ka mikatrokatroka mampihozongozon-tany
ary ny fitafiana rehetra voahorona mihosin-dra
dia samy hodorana avokoa ho levon’ny afo.
5Satria misy zaza teraka ho antsika,
zazalahy no omena antsika;
eny an-tsorony ny mari-piandrianany,
ary ny anaram-boninahiny dia hatao hoe:
Mpitondra mahay, Andriamanitra mahery,
Ray mandrakizay, Andriana mitondra ny fiadanana.
6Hanao izay hanitarana ny fahefàny izy
ary hampisy fiadanana tsy misy fetra.
Ny sezafiandrianan’i Davida no hipetrahany
ary ny fanjakany no hofeheziny
ka haoriny sy hohamafisiny
amin’ny rariny sy ny hitsiny,
hatramin’izao ka ho mandrakizay#9.6 And 6: jereo Lk 1.32-33..
Izany no hotanterahin’ny TOMPOn’izao rehetra izao,
vokatry ny firedaredam-pitiavany.
Toa totohondry voavonkina ny fandrahonan’ny Tompo
(Jereo 5.25)
7Namoaka didim-pitsarana ny Tompo
ho fanoherana ny taranak’i Jakôba,
ka ny fanjakan’i Israely no niharan’izany#9.7 Ny fanjakan’i Israely na fanjakana avaratra dia tafasaraka tamin’ny fanjakan’i Joda efa ho 200 taona eo ho eo izao (jereo 1 Mp 12)..
8Samy mahalala izany avokoa
ny mpiray firenena rehetra,
dia ny fanjakan’i Efraîma manontolo
sy ny mponina ao Samaria#9.8 Efraîma: jereo 7.2 sy nta. –Samaria: renivohitry ny fanjakan’i Israely faha-Isaià..
Fa tamin’avonavona sy fireharehana
no nitenenan’izy ireny hoe:
9«Rindrina biriky no nirodana
fa rindrim-bato kosa no hatsanganay.
Tsivalan-kazo aviavy no nadaboka
fa tsivalan-kazo sedera kosa no hasolonay azy.»
10Kanjo nomen’ny TOMPO tombon-dahiny
ny fahavalon’i Israely, dia i Retsîna#9.10 Retsîna: jereo 7.1. izany;
eny, notairiny tokoa ireo fahavalony,
11dia ny Sirianina teo anoloany
ary ny Filistinina tao an-damosiny,
ka nandrapaka an’i Israely indraim-bava.
Saingy, na teo aza izany rehetra izany,
dia mbola tsy afaka ny fahatezeran’ny TOMPO
fa mihinji-tanana mandrahona ihany Izy.
12Dia toy izany no nikapohan’Andriamanitra ny vahoakany;
kanefa tsy niverina tamin’Andriamanitra ihany izy,
tsy notadiaviny ny TOMPOn’izao rehetra izao.
13Koa tanatin’ny indray andro monja
no namongoran’ny TOMPO an’i Israely,
na ny any an-tampony na ny any am-potony,
na ny sampandrofia na ny volotara.
14Fa ny loholona sy ny manankaja no tampony,
ary ny mpaminany mampianatra lainga no fotony.
15Ny mpitarika ity firenena ity
dia tsy nanao afa-tsy ny nampivoana azy,
ka izay rehetra notarihiny
dia nandeha tamin’ny lalan-tsiizy avokoa.
16Noho izany, dia tsy hiantran’ny Tompo ireo tanorany
ary tsy hamindrany fo ireo kamboty sy mpitondratenany.
Fa olona tsy mahatoky sady mpanao ratsy izy rehetra
ary ny vavany samy miteny hadalana avokoa.
Saingy, na teo aza izany rehetra izany,
dia tsy mbola afaka ny fahatezeran’ny Tompo
fa mihinji-tanana mandrahona ihany Izy.
17Eny, midedadeda tokoa ny faharatsiana
toy ny afo mandoro ny tsilo sy ny songosongo
sady mandrehitra ny kirihitr’ala
ka mampisavoana ny setroka mitambolina.
18Tezitra mafy ny TOMPOn’izao rehetra izao,
ka dia mirehitra izany tany izany
ary toy ny levon’ny afo ny vahoakany.
Tsy misy olona miantra ny namany:
19andidiana ny eo an-kavanana
nefa mbola noana ihany ny tena,
ihinanana ny eo an-kavia
nefa mbola tsy voky ihany.
Samy mihinana ny havany avokoa izy:
20ny fokon’i Manase mihinana ny fokon’i Efraîma,
ny an’i Efraîma kosa mihinana ny an’i Manase,
ary izy roa tonta no indray mamely ny fokon’i Joda.
Saingy, na teo aza izany rehetra izany,
dia mbola tsy afaka ny fahatezeran’ny TOMPO
fa mihinji-tanana mandrahona ihany Izy.
Currently Selected:
Isaià 9: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
