Isaià 7
7
Hafatra ho an’i Ahaza mpanjaka
1Tamin’ny andro nanjakàn’i Ahaza, zanakalahin’i Jôtama sady zafikelin’i Hozià mpanjakan’i Joda, dia niakatra i Retsîna mpanjakan’i Siria sy i Peka, zanakalahin’i Remalià sady mpanjakan’i Israely, mba hanafika an’i Jerosalema, kinanjo tsy nahafaka azy#7.1 Momba ny ady nifarimbonan’ny Sirianina sy ny Efraimita, jereo 2 Mp 16.5; 2 Tan 28.5-6 sy ny sava lalana.. 2Dia nampandrenesina i Ahaza, taranak’i Davida, sy ny tao an-dapany fa efa mitoby any Efraîma#7.2 Efraîma: foko be indrindra amin’ny fanjakana israelita tany avaratra sady mifanakaiky amin’i Jerosalema ny faritaniny. ny Sirianina. Koa taitra ny fon’ny mpanjaka sy ny an’ny vahoakany, tahaka ny hazo any an’ala rehefa tsofin’ny rivotra.
3Dia hoy ny TOMPO tamin’i Isaià:
–Mivoaha ny trano ianao mba hitsena an’i Ahaza, dia ianao sy i Seara-Jasoba zanakao lahy, fa efa mby amin’ny lakandrano ambony izy, eo amin’izay lalana mankany amin’ny sahan’ny mpanasa lamba#7.3 Ny anarana hoe Seara-Jasoba dia midika hoe hisy sisa hiverina. –lakandrano ambony, lalana mankany amin’ny sahan’ny mpanasa lamba: jereo 2 Mp 18.17 sy nta.. 4Ary lazao aminy hoe: «Tandremo! Aza taitaitra foana, aza matahotra. Aoka tsy ho ketraka ny fonao noho ny fahatezeran’i Retsîna avy any Siria sy ny fahatezeran’ny zanakalahin’i Remalià, fa tapa-porohana midonaka ihany ireo. 5Ny Sirianina ary i Peka sy ny Efraîmita dia efa niray tetika tokoa hanisy ratsy anao ka nanao hoe: 6‹Andeha isika hiakatra hamely an’i Joda mba hampitahotra azy, ka hoterentsika hanaraka antsika izy; dia ilay zanakalahin’i Tabeela#7.6 Ny Sirianina sy ny Israelita tavaratra dia te hitaona ny fanjakan’i Joda hiady amin’ny Asirianina, izay efa mananontanona. –ilay zanakalahin’i Tabeela: toa olona avy any Siria izany. no hatsangantsika hanjaka ao aminy.› 7Izao kosa no lazain’ny Tompo ANDRIANANAHARY:
‹Tsy ho tanteraka sady tsy hisy izany
8-9I Damasy manko no renivohitr’i Siria,
ary ao ihany i Retsîna no filoha;
i Samaria no renivohitr’i Efraîma,
ary ao ihany i Peka no filoha.
I Efraîma, ao anatin’ny 65 taona,
dia tsy ho vanon-ko firenena intsony.›
Kanefa raha tsy ny TOMPO no itokianareo,
dia tsy ho azo itokiana haharitra koa ianareo.»
Ilay Himanoela
10Dia mbola nanafatra an’i Ahaza ny TOMPO ka nanao hoe:
11–Angataho famantarana ny TOMPO Andriamanitrao mba ho antoka ho anao, na any amin’izay fanambanin’ny toeran’ny maty izany na eny an-danitra ambony eny.
12Fa novalian’i Ahaza hoe:
–Tsia, tsy hangataka na inona na inona aho fa tsy te haka fanahy ny TOMPO.
13Dia hoy i Isaià taminy:
–Mihainoa ahy ianao sy ny fianakavianao izay samy taranak’i Davida. Moa tsy ampy anareo ve ny manasatra ny olombelona no dia hanasatra an’Andriamanitra koa ianareo? 14Noho izany àry, dia ny Tompo mihitsy no hanome famantarana ho anareo: jereo fa hitoe-jaza ny vehivavy ka hiteraka zazalahy ary ny anarany hataony hoe Himanoela, izany hoe «Andriamanitra miaraka amintsika#7.14 Jereo Mt 1.23..» 15Rononomandry sy tantely no ho sakafony ambara-pahalalàny mandà ny ratsy sy mifidy ny tsara. 16Fa raha tsy mbola mahalala handà ny ratsy sy hifidy ny tsara akory izany zaza izany, dia hilaozan’ny mponina ny tanin’ireo mpanjaka roa izay mampitahotra anao ireo. 17Kanefa hataon’ny TOMPO tonga aminao sy ny vahoakanao ary ny taranakao ny toe-javatra izay tsy mbola nisy hatramin’ny andro nisarahan’i Joda tamin’ny fanjakan’i Israely ka hatramin’izao, dia ny hanafihan’ny mpanjakan’i Asiria izany.
Fananiham-bohitra sy ny vokany
18Amin’izany andro izany ny TOMPO
dia hisioka hiantso ny lalitra
izay any amin’ny vinany misampana
iafaran’ilay onin’i Ejipta;
ary hisioka koa Izy hiantso
ny renitantely izay any Asiria.
19Dia indray ho avy ireny ka hipetraka
eny an-tevana kisolasola sy eny an-tsefatsefa-bato
ary koa eny amin’ny kirihitra rehetra eny
sy eny amin’ny toerana rehetra fampisotroam-biby.
20Amin’izany andro izany ny Tompo
dia hanofa hareza avy eny am-pitan’i Eofrata:
filazana ny mpanjakan’i Asiria izany;
ka ho voaharatra avokoa ny lohanareo rehetra
sy ny volon-tongotrareo ary koa ny volom-bavanareo#7.20 loha voaharatra: jereo ny naoty momba ny 3.17. –volombava voaharatra: marika heverina ho manala baràka (2 Sam 10.4-5)..
21Amin’izany andro izany koa ny isam-batan’olona
dia samy hiompy ombivavy iray sy osivavy roa;
22ka noho ny habetsahan’ny ronono avy aminy
dia rononomandry no hohanin’ny olona
fa rononomandry sy tantely no ho foto-tsakafo
ho an’izay rehetra sisa tavela eto amin’ny tany.
23Amin’izany andro izany koa ny saha rehetra
nisy voaloboka arivo fototra
izay mitentina volafotsy arivo
dia ho rakotry ny tsilo sy ny songosongo.
24Koa ho tonga hihaza ao ny olona
miaraka amin’ny tsipîka sy ny zana-tsipîka.
Izany tany manontolo izany tokoa
dia ho rakotry ny tsilo sy ny songosongo.
25Ary ny amin’ireo havoana
izay novolena tamin’ny lapika
dia tsy ho azo aleha intsony
noho ny tahotra ny tsilo sy ny songosongo,
fa havela ho kijàna fiandrasana omby
sy ho tany firaofan’ny ondry aman’osy.
Currently Selected:
Isaià 7: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
