Isaià 40
40
FIZARÀNA FAHAROA
Ny fampiononana an’i Israely
Ampaherezo ny vahoakako
1Ampaherezo, ampaherezo ny vahoakako,
hoy ilay Andriamanitrareo#40.1 Ny mpaminany no miteny eto, ka manainga ireo namany na ireo mpianany..
2Omeo toky i Jerosalema
ka antsoantsoy aminy
fa tapitra ny asa an-terivozona
sady vita ny sazy nahatra taminy;
ary efa nandray indroa heny#40.2 indroa heny: jereo Eks 22.3,6.8.
tamin’ny tanan’ny TOMPO izy
ho avotry ny fahotana rehetra nataony.»
3Misy feo miantso hoe:
«Misavà lalana any an-taniefitra
ho an’ny TOMPO,
mamakia arabe any an-tany karakaina
ho an’Andriamanitsika#40.3 Ireo andalana ireo dia voatsiahy ao amin’ny Mt 3,3; Mk 1,3; Jôh 1,23 araka ny dkt grika tranainy..
4Aoka hasondrotra ny lohasaha rehetra
ary aoka haetry ny tendrombohitra
sy ny havoana rehetra!
Aoka hovana ho lembalemba ny tany be havoana
ary ho saha midadasika ny tany mikitoantoana!
5Dia hiseho ny voninahitry ny TOMPO,
ka hiara-mahita izany ny olona rehetra.
Fa ny vavan’ny TOMPO mihitsy no efa niteny#40.5 And 3-5: jereo Lk 3,4-6..»
6Misy feo manao hoe: «Miantsoa.»
fa hoy ny famaliko azy: «Inona no antso hataoko?»
Dia niteny indray izy hoe:
«Izao no antso hataonao:
Mihelina toy ny ahitra ny olona rehetra,
toy ny voninkazo eny an-tsaha ny faharetany:
7Mihamaina ny ahitra, mihamalazo ny voninkazo
rehefa seranan’ny fofonain’ny TOMPO.
–Mihelina toy ny ahitra tokoa ny olona–.
8Eny, mihamaina ny ahitra,
mihamalazo ny voninkazo,
fa ny herin’ny tenin’Andriamanitsika
no haharitra mandrakizay#40.8 Ny and 6-8 dia voatsiahy ao amin’ny 1Pt 1,24-25 ny vontoatiny, araka ny dkt tranainy grika; ampit Jak 1.10-11..»
Ny vaovao mahafaly hotorina
9Ry vahoakan’i Tsiôna
nanankinana vaovao mahafaly ô,
miakara eny an-tendrombohitra avo;
ry vahoakan’i Jerosalema
nanankinana vaovao mahafaly ô,
ingao mafy ny feonao ka aza matahotra.
Lazao amin’ireo ao tanànan’i Joda hoe:
«Indro Andriamanitrareo.
10Indro ny Tompo ANDRIANANAHARY tonga amin-kery
sady manana ny fahefana hanjaka.
Ny vahoaka, hoentiny miaraka aminy, no ho karamany
sady eo anoloany ho valin-kasasarany#40.10 Toa filazana ireo Jiosy voasesitany tao Babilônia izany. –Momba ny faran’ity and ity, dia jereo 62.11; Apôk 22.12..
11Tahaka ny mpiandry ondry
miandry ny andian’ondriny Izy
ka manangona ireny amin’ny baikon-tanany;
trotroiny eo an-tratrany ny zanak’ondry
ary roahiny miadana ny ampianahany#40.11 Ampit Ezek 34.15; Jôh 10.11..»
Lehibe sy hendry ilay Tompon’izao rehetra izao
12Iza no nahafatra ny ranomasina teo am-pelatanany
na naharefy ny lanitra tamin’ny irain-jehiny?
Iza no nahangona ny vovotany
tamin’ny vata famarana tokana
ary nandanja ny tendrombohitra sy ny havoana
tamin’ny mizana anankiray monja?
13Iza no naharefy ny Fanahin’ny TOMPO,
iza no nahatakatra ny fikasany#40.13 Ampit Rm 11.34; 1Kôr 2.16; jereo 46.11.?
14Iza no nakany hevitra ka nampatsilo Azy
na nampianatra Azy ny fahaiza-mitsara,
sy nanoro Azy ny fahalalana
ary nampahafantatra Azy ny fahaiza-manavaka?
15Eo anatrehan’ny TOMPO, indreo ny firenena
fa toy ny rano indray mitete avy amin’ny siny,
na toy ny fasika madinika iray eo ambony mizana;
ary indreo ny mponina any amin’ny nosy
fa ingaina toy ny vovotany maivan-kely.
16Ny biby fihaza ao Libano amin’ny TOMPO
tsy ampy hatao sorona dorana manontolo;
ary ny hazo ao anatin’ny alany
tsy ampy hatao kitay amin’izany.
17Toy ny tsinontsinona ny firenen-drehetra
eo anatrehan’ny TOMPO;
toy ny tsy misy sady zava-poana ireny aminy.
Tsy misy tahaka an’Andriamanitra
18Koa ampitovînareo amin’iza moa Andriamanitra?
Endrik’inona no ampanahafinareo Azy?
19Raha ny sampy no tenenina
dia mpanao taozavatra no nandrendrika azy,
mpanefy firavaka no nandrakotra azy takela-bolamena
ary nandrenty azy rojo volafotsy#40.19 Ampit Asa 17.29..
20Ny mahantra izay tsy afaka mandany toy izany
dia mifidy vatan-kazo tsy mety lo,
ary mitady mpandrafitra mahay
mba hanangana sampy tsy hihozongozona.
21Moa tsy fantatrareo na efa renareo ve,
moa tsy nambara taminareo
hatrany am-piandohana ve,
ary moa tsy noeritreretinareo ve
ilay mpanangana ny fanorenan’ny tany?
22Izy no mipetraka amin’ny sezafiandrianana
eo ambonin’ny habakabaka izay andohalambon’ny tany;
ka toy ny vitsika no fijeriny ny olona avy eny.
Izy no nanenjana ny lanitra toy ny lambabe
ary namelatra azy toy ny lay hitoerany.
23Izy no mahatonga ny mpitondra ho tsinontsinona
sy maha zava-poana ny mpifehy ny tany.
24Vao tonga eo amin’ny toerany ireny,
vao manomboka miely patrana,
vao miorim-paka amin’ny tany,
dia tsofin’ny fofonain’ny TOMPO ka mihamalazo;
ary indreny fa voapaoka
toy ny mololo indaosin’ny tadio.
25«Koa hampitovînareo amin’iza Aho
ary hoharinareo amin’iza,
hoy ilay Andriamanitra masina?»
26Atopazo eny an-danitra ny masonareo
ka jereo: Iza no nahary ny kintana?
Tsy iza fa Ilay mamoaka azy isan-tokony
toy ny andian-tafika hanao matso
sy miantso azy rehetra amin’ny anarany avy.
Lehibe loatra ny heriny
ary tena hentitra ny fahefàny
ka tsy misy mitsoaka an-daharana ireo.
Manavao ny herin’ny reraka ny Tompo
27Ry vahoaka Israely, firenen’i Jakôba,
nahoana ianao no miteny sy manamafy hoe:
«Tsy hitan’ny Tompo akory izay mahazo ahy,
lalovan’Andriamanitra fotsiny ny zoko?»
28Tsy fantatrao sady tsy efa renao va
fa ny TOMPO dia Andriamanitra mandrakizay?
Izy no namorona ny tany manontolo.
Tsy mba reraka Izy na sasatra,
ary tsy misy fetra ny fahalalàny.
29Manome hery ny reraka Izy
ary manatanjaka ny malemy.
30Ny tanora aza dia mihareraka sy mety sasatra,
ny mahery tompon-daka aza dia mety ho solafaka.
31Fa izay matoky ny TOMPO kosa
dia hahazo hery vaovao hatrany,
ka hisidina ambony toy ny voromahery.
Hihazakazaka izy nefa tsy ho sasatra,
handeha izy nefa tsy ho reraka.
Currently Selected:
Isaià 40: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
