Isaià 26
26
Tanàna mahery sy sarotra iakarana
1Amin’izany andro izany, ao amin’ny tanin’i Joda
dia hihirana izao hira izao:
«Manan-tanàna mafy isika.
Manda roa sosona no nataon’ny TOMPO
mba ho fiarovana azy.
2Vohay ireo vavahady
hidiran’ny firenena mahatoky
izay mitana ny fahamarinana#26.2 Ampit Sal 118.19-20..
3Ny toe-tsainy tsy miovaova;
ka omenao fiadanana hatrany izy
satria matoky Anao, TOMPO ô.
4Matokia ny TOMPO hatrany hatrany ianareo,
satria ny TOMPO no vatolampy mandrakizay.
5Izy no nampietry ireo mpiteronterona
sy nandrodana ny tanàna sarotra iakarana;
eny, nampidaboka azy tamin’ny tany Izy
ka nampitrosona azy tamin’ny vovoka
6mba hohitsahin’ny mahantra sy ny malemy.
Vavaka amin’ny fotoana farany
7TOMPO ô, toroanao lala-mahitsy ny olo-marina;
ary tsy miolikolika ny lalana soritanao ho azy.
8Eny, lalana atoron’ny didim-pitsaranao
no anantenanay Anao, TOMPO ô.
Ny hanonona ny anaranao sy hahatsiaro Anao
no hetahetam-ponay.
9Maniry ny atrehinao aho amin’ny alina;
eny, mitady Anao ny fanahiko ato anatiko.
Rehefa ny didim-pitsaranao
no ampiharinao amin’ny tany,
dia hahay hitondratena mahitsy
ny mponina eran’izao tontolo izao.
10Fa raha amindrana fo ny olon-dratsy,
dia tsy hahatakatra ny fahamarinana,
fa hamilivily ny rariny eto an-tany
ka tsy hahita ny fiandrianan’ny TOMPO.
11TOMPO ô, manandra-tanana handrahona Ianao
kanefa tsy ahoan’ireo olon-dratsy akory.
Aoka ho menatra izy raha mahita
ny zotomponao hiaro ny vahoakanao;
eny, aoka handevona azy ny afo
izay natokanao ho an’ny fahavalonao#26.11 Ampit Heb 10.27.!
12TOMPO ô, Ianao no manome anay ny fiadanana
ary Ianao koa no mahatomombana ho anay
ny asa rehetra nataonay.
13Ry TOMPO Andriamanitray ô,
tompo maro no efa notompoinay talohanao;
nefa ny anaranao ihany no satrinay hotsaroana.
14Ny maty tsy ho velona intsony
ary ny matoatoa tsy hitsangana koa;
fa efa nirotsaka handringana azy Ianao
ka nolevoninao mbamin’ny fahatsiarovana azy.
15TOMPO ô, nampitomboinao ny firenenay,
ary izany no nahazoanao voninahitra;
eny, nampitomboinao ny firenenay
ka nitarinao halalaka avokoa ny sisin-taniny.
16TOMPO ô, fony azom-pahoriana izahay,
dia nitady Anao tokoa;
ary niantso vonjy taminao izahay,
rehefa voaterin’ny famaizanao.
17Toy ny vehivavy mihetsi-jaza hiteraka
ka miolanolana sy mitaraina mafy,
dia toy izany izahay
teo anatrehanao, TOMPO ô.
18Izahay koa dia mova tsy efa bevohòka
sy efa nihetsi-jaza hiteraka,
nefa tahaka ny zava-poana no naterakay.
Tsy nahay nitondra fanafahana
ho an’ny tany izahay,
tsy nahay nitondra mponina vaovao
ho an’izao tontolo izao.
Fitsanganan’ny maty sy famaizana ireo heloka bevava
19Ho velona indray ireo maty ao aminao, ry fireneko,
ary hitsangana ny fatiny.
Hifoha sy hanao hobim-pifaliana
ireo matory ao amin’ny vovo-tany,
fa handefasan’ny Tompo andom-pahazavana ianao
ka hateraky ny tany indray ireo nodimandry.
20Ndeha miditra any an-tranonao, ry fireneko,
ka hidio mafy ny varavarana;
miere kely indray mipy maso monja ianao
mandra-pisindan’ny fahatezeran’ny Tompo.
21Fa indro ny TOMPO mivoaka ny fonenany
mba hanadina ny mponina amin’ny tany
momba ny heloka vitany.
Hasehon’ny tany ireo ra notrohiny
ary tsy hafeniny intsony
ireo novonoina ho faty teo aminy.
Currently Selected:
Isaià 26: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
