Hebreo 13

Ny fanompoana sitrak’Andriamanitra

1Mifankatiava hatrany toy ny mpiray tampo ao amin’i Kristy. 2Tsarovy ny fampiantranoam-bahiny. Nisy tokoa izay mahavatra nanao izany ka hay anjely aza no nampandrosoiny nefa tsy fantany#13.2 Jereo Gen 18.1-8; 19.1-3.. 3Tsarovy ny voafonja, ka hevero ho toy ny miaraka voafonja aminy koa ny tenanareo; tsarovy ny ampahorîna, ka hevero ho toy ny ampahorîna tahaka azy ireo koa ny tenanareo.

4Aoka samy hanaja ny fanambadiana, ary aoka tsy hifanitsakitsaka ny mpivady; fa hohelohin’Andriamanitra ny mpijangajanga sy mpaka vadin’olona. 5Aza avela hahazo laka amin’ny fiainanareo ny fitiavam-bola; aoka ianareo hianina amin’izay anananareo, fa hoy Andriamanitra: «Tsy handao anao mihitsy Aho, ary tsy hahafoy anao velively#13.5 Izany teny izany dia miainga avy amin’ny andinin-tSoratra Masina toy ny Fifan 31.6, 8; Jos 1.5..» 6Ka dia sahintsika ny manao hoe:

«Ny Tompo no mpanampy ahy,

ka tsy hatahotra aho.

Inona no ho azon’olona atao amiko?»

7Tsarovy ireo mpitarika anareo ara-pivavahana, izay efa nitory ny tenin’Andriamanitra taminareo; hevero izay niafaran’ny fiainany#13.7 Ny niafaran’ny fiainany: misy mihevitra fa mampahatsiaro ny nanaovana martiora ireo mpitarika ara-pivavahana ireo izany. Ampit 10.32-35. ka alao tahaka ny finoany. 8I Jesoa Kristy no tsy miova omaly sy anio ary mandrakizay. 9Aza mety havilivilin’ny fampianarana samihafa tsy araka an’i Kristy ianareo; tsara manko raha ampaherezina amin’ny fahasoavan’Andriamanitra ny fonareo, fa tsy amina fitsipika momba ny hanina izay tsy mahasoa ireo mahavatra azy#13.9 Ampit Rm 14.2-23; 1Kôr 8.8; Kôl 2.16-22; 1Tim 4.3..

10Ireo mpanaraka fanompoam-pivavahana ao amin’ny toeram-pivavahana jiosy dia tsy mahazo mihinana amin’izay sorona atao eo amin’ny alitarantsika#13.10 Dia ny alitaran’ny Toeramasina Indrindra any an-danitra. Ampit 9.11-14.. 11Entin’ny mpisorombe ao amin’ny Toeramasina Indrindra ny ran’ny biby hatao sorona ho fanalana ny ota; fa ny fatin’ireo biby ireo kosa dia dorana any ivelan’ny toby#13.11 Jereo Fisor 16.27.. 12Izany koa no anton’ny nahafatesan’i Jesoa tany ivelan’ny tanàna#13.12 Jereo Jôh 19.17, 20., mba hanadio ny vahoaka amin’ny ra nafoiny. 13Aoka àry isika hivoaka ny toby hankeo amin’i Jesoa, ka hiara-mizaka aminy ny fandatsana nozakainy. 14Fa tsy manana tanàna maharitra eto an-tany isika; fa ilay tanàna ho avy no katsahintsika#13.14 Ampit 11.10, 16.. 15Koa amin’ny alalan’i Jesoa aoka hatolotsika ho sorona ho an’Andriamanitra mandrakariva ny fideràntsika Azy, dia fiderana ventesin’ny molotr’ireo olona miaiky an’Andriamanitra ho Tompo. 16Aza hadinoina ny fanaovan-tsoa sy ny fifanampiana, fa sorona toy izany no sitrak’Andriamanitra.

17Manoava an’ireo mpitarika anareo ara-pivavahana, ka maneke azy. Fa ireo no miambina hatrany ny fanahinareo, toy ny olona mbola hampamoahin’Andriamanitra ny amin’izany. Raha manoa ianareo, dia amin’ny hafaliana no hanaovan’ireo ny raharahany; fa raha tsy manoa ianareo, dia amin’ny fisentoana no hanaovany azy ka tsy hahasoa anareo izany.

18Mivavaha ho anay; satria matoky izahay fa mahitsy fieritreretana, ka satrinay tokoa ny hanana fitondrantena tsara amin’ny zavatra rehetra. 19Iangaviako manokana ianareo hangataka amin’Andriamanitra mba hamerenany ahy faingampaingana atỳ aminareo#13.19 Tsy milaza mazava izay anton-javatra mahasampona azy ny mpanoratra..

Vavaka famaranana

20Andriamanitra dia efa nitondra an’i Jesoa Tompontsika hiala amin’ny fahafatesana, i Jesoa Tompontsika Izay Mpiandry lehibe miahy ny ondry noho ny ra nafoiny ho antoky ny Fanekempihavanana mandrakizay. 21Andriamanitra loharanon’ny fiadanana anie hahatonga anareo ho vonon-kanao ny asa soa rehetra mba hanatanterahanareo ny sitrapony; ka hataony ao anatintsika amin’ny alalan’i Jesoa Kristy anie izay sitrany. Ho an’i Jesoa Kristy anie ny voninahitra mandrakizay mandrakizay! Amen.

Hafatra sy fanaovam-beloma

22Mangataka aminareo aho, ry havana; raiso tsara izany lahateny fampaherezana izany, fa teny fohifohy ihany no andefasako azy an-tsoratra aminareo. 23Aoka ho fantatrareo fa efa afaka i Timôty havantsika#13.23 Jereo Asa 16.1., koa raha tàhiny tonga faingampaingana izy, dia hiaraka aminy hamangy anareo aho.

24Veloma any amin’izay rehetra mpitarika anareo ara-pivavahana sy any amin’ny havana rehetra iray finoana. Manao veloma anareo ny havana avy any Italia#13.24 havana avy any Italia: kristianina avy any Italia fa sendra mandalo na miara-monina any an-toeran-kafa ivelan’i Italia ao amin’ny fanjakambe rômanina; na koa jiosy kristianina voaroaka avy any Italia..

25Homba anareo rehetra anie ny fahasoavan’Andriamanitra!

Currently Selected:

Hebreo 13: DIEM

Highlight

Copy