Genesỳ 25
25
Ny nahafatesan’i Abrahama sy ny lisitry ny taranany
1Mbola naka vady hafa indray i Abrahama, ka i Ketorà no anarany. 2Niteraka enin-dahy tamin’i Abrahama izy, dia ireto avy izany: i Zimràna sy i Jôksàna, i Medàna sy i Midiàna ary i Jisbàka sy i Soa. 3I Jôksàna no rain’i Sebà sy i Dedàna; ny Asorita sy ny Letosita ary ny Leomita no taranak’i Dedàna. 4Ny zanakalahin’i Midiàna dia i Hefà sy i Hefera, i Hanôka sy i Abidà ary i Eldahà. Ireo rehetra ireo no taranak’i Ketorà.
5Nomen’i Abrahama an’i Itsehàka avokoa izay rehetra nananany. 6Dieny mbola velona kosa i Abrahama no samy notolorany fanomezana ireo zanaky ny vadikeliny ary nampanalaviriny an’i Itsehàka zanany hankany amin’ny tany atsinanana. 7Nahatratra dimy amby fitopolo amby zato taona no nahaveloman’i Abrahama, 8dia niala aina izy ka maty tamim-pahanterana rehefa fotsy volo tsara sy voky andro, ary voakambana tamin’ny razany. 9I Itsehàka sy i Jismahela zanany no nandevina azy tao amin’ny lava-baton’i Makpelà, ao amin’ny sahan’i Hefrôna zanakalahin’i Tsôhara izay Hetita, dia ilay saha ao akaikin’i Mamre. 10Novidîn’i Abrahama tamin’ny taranak’i Heta#25.10 Novidîn’i...Heta: jereo Gen 23.3-16. io saha io, ary tao no nandevenana an’i Abrahama sy i Sarà vadiny. 11Taorian’ny nahafatesan’i Abrahama, dia notahîn’Andriamanitra i Itsehàka zanany, izay nonina tao akaikin’ny fantsakana Lahay-Rôy#25.11 Jereo Gen 16.14..
12Izao no lisitry ny taranak’i Jismahela, zanakalahin’i Abrahama, naterak’i Hagara ilay Ejiptianina mpanompovavin’i Sarà. 13Ireto avy no anaran’ny zanakalahin’i Jismahela araka ny laharan’ny nahaterahany: i Nebaiôta sy i Kedara, i Adbeèla sy i Mibsàna, 14i Mismà sy i Domà, i Masà 15sy i Hadada, i Temà sy i Jetora ary i Nafisy sy i Kedmà. 16Ireo no zanak’i Jismahela 12 lahy, samy lehiben-tarika avy. Samy mitondra ny anarany avy ny tanànany sy ny tobiny. 17Nahatratra 137 taona i Jismahela vao niala aina, ary maty ka nakambana tamin’ny razany. 18Ny nipetrahan’ny taranak’i Jismahela dia ny faritra manomboka eo Havilà ka hatrany Sora; i Sora dia any akaikin’i Ejipta tamin’iny lalana mankany Asora iny. Nihataka tamin’ireo taranak’i Abrahama hafa no nitoerany.
JAKÔBA
I Hesao sy i Jakôba
19Izao no tantaran’i Itsehàka:
I Itsehàka dia zanakalahin’i Abrahama. 20Rehefa feno efapolo taona izy dia nanambady an’i Rebekà, anabavin’i Labàna sady zanakavavin’i Betoela izay Aramianina tao Padàna-Arama. 21Nitaraina tamin’ny TOMPO ho an’ny vadiny i Itsehàka satria tsy niteraka izy. Dia nohenoin’ny TOMPO ny fitarainany, koa nitoe-jaza i Rebekà vadiny. 22Nifandàka ireo zaza kambana tao an-kibony, ka hoy Rebekà hoe:
–Raha toy izany, nahoana re aho no nitoe-jaza?
Dia lasa nanontany ny TOMPO izy. 23Fa namaly azy ny TOMPO hoe:
Firenena roa no ao an-kibonao,
vahoaka roa tonta no haterakao.
Ny ankilany hahery noho ny andaniny,
ny zokiny hanompo ny zandriny#25.23 Jereo Rm 9.12..
24Nony tonga ny andro hiterahany, dia niteraka zaza kambana tokoa i Rebekà. 25Ilay teraka voalohany dia menamena, voloina toy ny lamba volom-biby ka natao hoe Hesao ny anarany#25.25 Amin’ny teny hebreo ny anarana hoe Hesao dia mampahatsiaro ny voambolana izay nadika voloina eto.. 26Taorian’izany dia teraka koa ny rahalahiny; nohazoniny ny voditongotr’i Hesao ka natao hoe Jakôba#25.26 Amin’ny teny hebreo ny anarana hoe Jakôba dia mampahatsiaro ny teny izay nadika hoe voditongotra eto; jereo ny 27.36 sy nta. ny anarany. Efa enimpolo taona i Itsehàka tamin’ny nahaterahan’izy mirahalahy.
27Nitombo ireo zaza, ka i Hesao dia tonga mpihaza mahay sady mpianefitra; fa i Jakôba kosa dia lehilahy bonaika, mpipetraka an-day. 28I Itsehàka dia tia an’i Hesao, satria nankafy ny hazany; fa i Rebekà kosa tia an’i Jakôba.
29Teo am-pandrahoana sakafo indrindra i Jakôba indray andro, no tonga avy any an-tsaha i Hesao sady reraka mafy, 30ka nangataka taminy hoe:
–Mba omeo kely amin’io sakafo efa menafify io aho fa reraka.
(Izany no niantsoana azy tamin’ny anaram-bositra hoe Edôma na Ilaimena#25.30 Amin’ny teny hebreo ny anarana hoe Edôma dia mampahatsiaro ny teny izay nadika hoe sakafo menafify eto.).
31Dia namaly azy i Jakôba hoe:
–Amidio amiko àry aloha ny fizokianao.
32Dia hoy i Hesao hoe:
–Inty hono aho ka ho faty, dia hataoko inona moa izay fizokiana?
33Fa namaly indray i Jakôba hoe:
–Mianiàna amiko àry ianao izao anio izao.
Dia nianiana taminy izy ka nivarotra tamin’i Jakôba ny fizokiany. 34Ary nomen’i Jakôba mofo sy voanemba masaka i Hesao ka nihinana sy nisotro. Avy eo izy dia niainga ary lasa nandeha fa tsy niraharaha ny fizokiany#25.34 Jereo Heb 12.16..
Currently Selected:
Genesỳ 25: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
