Genesỳ 20
20
I Abrahama sy i Abimelèka
1Niala teo i Abrahama nankany amin’ny faritany atsimo, ka nonina tao anelanelan’i Kadesy sy i Soro, ary nivahiny tao Gerara. 2Nolazain’i Abrahama fa anabaviny#20.2 Ampit Gen 12.13; 26.7. i Sarà vadiny; koa naniraka haka an’i Sarà i Abimelèka, mpanjakan’i Gerara. 3Niseho nofy tamin’i Abimelèka anefa Andriamanitra nony alina ka nanao taminy hoe:
–Indro ho faty ianao noho ny amin’ny vehivavy izay nalainao, fa manam-bady izy io.
4I Abimelèka anefa tsy mbola nanatona akaiky an-dravehivavy akory, ka nilaza hoe:
–Tompo ô, moa haringanao koa va ny tenako sy ny fireneko na dia tsy diso aza izahay? 5Moa tsy Abrahama va no nilaza tamiko an’i Sarà hoe anabaviny? Ary moa tsy ravehivavy io va no nilaza tamiko an’i Abrahama hoe anadahiny? Koa tamin’ny fo tsotra sy tanana madio no nanaovako izany.
6Mbola tamin’io nofy io ihany no nilazan’Andriamanitra tamin’i Abimelèka hoe:
–Izaho koa dia mahalala fa tamin’ny fo tsotra no nanaovanao izany. Izaho ihany koa no nisakana anao tsy hanota amiko. Izany no tsy namelako anao hikasika azy. 7Koa ankehitriny avereno amin’ny vadiny ravehivavy. Mpaminany izy ka hivavaka ho anao, dia tsy ho faty ianao. Fa raha tsy averinao kosa izy, dia fantaro fa ho faty tokoa ianao sy izay rehetra anao.
8Dia nifoha vao maraina be i Abimelèka, ka niantso ny mpanompony rehetra ary nanambara ny zavatra rehetra taminy; dia raiki-tahotra mafy ireo olona ireo. 9Nampiantso an’i Abrahama i Abimelèka, ka nanao taminy hoe:
–Inona izao nataonao anay izao? Inona no fahotana nataoko taminao no dia saika nampidiranao heloka lehibe toy izao ny tenako sy ny fanjakako? Zavatra tsy fanao no nataonao tamiko. 10Inona, hoy aho, no kendrenao tamin’ny nanaovanao izao zavatra izao?
11Namaly kosa i Abrahama hoe:
–Nihevitra anakampo aho fa tsy misy olona matahotra an’Andriamanitra amin’ity toerana ity, koa hovonoin’ireo aho noho ny amin’ny vadiko. 12Marina ihany anefa fa anabaviko izy, iray ray izahay; saingy tsy iray reny amiko izy, ka izany no nahatonga azy ho vadiko. 13Rehefa nasain’Andriamanitra nandao ny tranon-draiko aho, dia hoy aho tamin’ny vadiko: «Izao no rohim-pihavanana hampiasainao amiko: Any amin’ny toerana rehetra izay halehantsika dia lazao hoe anadahinao aho.»
14Dia naka ondry sy osy aman’omby ary mpanompolahy sy mpanompovavy i Abimelèka, ka nomeny an’i Abrahama; naveriny taminy koa i Sarà vadiny. 15Ary hoy i Abimelèka tamin’i Abrahama:
–Indro mivoha ho anao ny taniko, koa mipetraha amin’izay mahafinaritra ny masonao.
16Hoy kosa izy tamin’i Sarà:
–Hitanao fa nomeko volafotsy arivo ny anadahinao mba ho tampi-maso amin’izay rehetra havanao fa tsy manantsiny ianao amin’izao raharaha izao#20.16 Ny tampi-maso eto dia karazana voaly isalobonan’ny vehivavy manambady, manaja ny vadiny. Koa ny fihetsik’i Abimelèka dia karazana famerenan-jo an’i Sarà..
17-18Nataon’ny TOMPO momba koa ny vehivavy rehetra tao an-tranon’i Abimelèka noho ilay raharahan’i Sarà vadin’i Abrahama. Dia nivavaka tamin’Andriamanitra i Abrahama; koa nositranin’Andriamanitra i Abimelèka sy ny vadiny ary ireo mpanompovaviny, ka afa-niteraka indray.
Currently Selected:
Genesỳ 20: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.