Ezekiela 38

Loza mananontanona an’i Gôga

1Ary nisy tenin’ny TOMPO tamiko nanao hoe: 2«Ry ilay taranak’olombelona, mitodiha manandrify an’i Gôga, filoha faratampon’ny vahoakan’i Mesèka sy i Tobala, any amin’ny tanin’i Magôga#38.2 Mesèka sy Tobala: jereo 27.13 sy nta. –Ny anarana hoe Gôga sy tanin’i Magôga izay miseho eto sy ao amin’ny toko 39 ary ao amin’ny Gen 10.2-3 sy ao amin’ny Apôk 20.8 dia mifono hevi-miafina. Toa filazana an’ohatra ny fahavalo izy ireo ka tsy tokony hokarohina ny misy azy ara-jeôgrafia., ka ijoroy ny maha-mpaminany anao manoloana azy. 3Ambarao aminy fa izao no lazain’ny Tompo ANDRIANANAHARY: Hirotsaka an-tsehatra hamely anao Aho, ry Gôga filoha faratampon’ny vahoakan’i Mesèka sy i Tobala. 4Hasiako farango vy eo amin’ny valanoranonao mba hitarihako anao an-keriny. Hotereko hivoaka ny taninao ianao sy ny tafikao manontolo, dia ny soavaly sy ny mpitaingina azy samy mareva-pitafiana mbamin’ny miaramila marobe samy mirongo ampinga sy sabatra. 5Hiaraka aminao ny miaramilan’i Persia sy i Etiôpia ary i Poto#38.5 Poto: jereo 27.10 sy nta., samy mirongo ampinga sy fiarovan-doha avokoa; 6toy izany koa ny antoko miaramila rehetra avy any Gômera sy avy any Bety-Tôgarmà#38.6 Gômera sy Bety-Tôgarmà: dia ilazana firenena madinidinika any Armenia. any am-parany avaratra mbamin’ny vatan-dehilahy avy amin’ny firenena maro hafa. 7Ry Gôga, miomàna ary mivonòna ianao sy ireo vahoaka rehetra voaangonao ho eo ambany fifehezanao. 8Ary any aoriana any, rehefa afaka taona maromaro, dia ianao no hasaiko maka an-keriny ny tanin’i Israely. Fa rehefa afaka tamin’ny ady ny mponina tao, dia niala tamin’ny firenena maro nielezany ary novorîna teo an-tendrombohitr’i Israely izay efa lao hatry ny ela. Fa rehefa navoaka avy tany amin’ireo firenen-kafa izy rehetra, dia niaina tamim-pilaminana. 9Fa ianao sy ireo antoko miaramilanao ary ireo firenena maro momba anao no hanafika azy, ka ho tonga eo aminy tahaka ny fiavian’ny rambon-danitra ary handrakotra ny taniny toy ny andian-drahona matevina.

10«Izao no lazain’ny Tompo ANDRIANANAHARY: Amin’izany andro izany dia hisy hevitra maro ho tonga ao an-tsainao ka hamorona teti-dratsy ianao. 11Hanapa-kevitra ianao fa hiakatra hamely ireo olona finaritra miaina am-pilaminana avokoa ao amin’ny tany izay tsy mba misy tanàna voahodidina manda na manana vavahady mihidy. 12Hankao ianao mba handroba sy handravarava ary hamely ireo tanàna izay efa rava taloha saingy onenana indray ankehitriny; hankao ianao hamely vahoaka iray nangonina avy any amin’ny firenen-kafa, ka nihary biby fiompy sy fananana indray, ary monina eo amin’ny foiben’izao tontolo izao#38.12 foiben’izao tontolo izao: toa i Jerosalema izany, ampit 5.5.. 13Hanontany anao ny mponina ao Sebà sy Dedàna ary koa ireo mpandranto rehetra any Tarsisy na any amin’ireo tanàna akaikiny ka hanao hoe#38.13 Sebà: fanjakana arabo, jereo 1 Mp 10.1; Sal 72.10. –Dedàna: jereo ny naoty momba ny 25.13. –Tarsisy: jereo ny naoty momba ny 27.12. –ireo tanàna akaikiny: araka ny dkt grika tranainy izany; fa ny RM kosa manao hoe sy ny liona tanorany (teny mety manondro ny mpanjaka, jereo 19.2-3).: ‹Moa handroba sy handrava ve no namorianao ny tafikao? Moa hangorona volafotsy sy volamena ary handroba biby fiompy sy fananana ka hahazo babo betsaka ve no nahatongavanao?›

14«Koa ijoroy ny maha-mpaminany anao, ry ilay taranak’olombelona, ary ambarao amin’i Gôga fa izao no lazain’ny Tompo ANDRIANANAHARY: Amin’ny andro hiainan’i Israely vahoakako am-pilaminana no hiainganao#38.14 hiainganao: araka ny dkt tranainy grika izany; fa ny RM kosa manao hoe hahafantaranao izany. ; 15ary ho tonga avy any amin’ny taninao any am-parany avaratra ianao, arahin’ny miaramila avy amin’ny firenena maro; samy mitaingin-tsoavaly avokoa ianareo ka mivondrona ho tafika goavana sy mahery. 16Hanafika an’i Israely vahoakako ianao, ka hanarona ny taniny toy ny andian-drahona matevina. Any aoriana be any no hisehoan’izany. Haniraka anao hanafika ny taniko Aho, ry Gôga, mba hieken’ny hafa firenena fa Izaho no Andriamanitra masina; ary ianao no fitaovana hanehoako izany eo imasony amin’ny hamelezako anao.

17«Izao no lazain’ny Tompo ANDRIANANAHARY: Ianao no ilay nambarako hatry ny fahiny elabe, fony Aho nandidy ireo mpanompoko, dia ny mpaminanin’i Israely, hilaza ny hafatro nandritra ny taona maro; ianao no nasaiko tonga hamely ny fireneny. 18Nefa amin’ny andro izay hamelezanao tokoa an’i Israely, ry Gôga, dia ho romotry ny hatezerana Aho; teny hentitra avy amiko Tompo ANDRIANANAHARY izany. 19Noho ny fahasaro-piaroko sy ny fahatezerako mirehitra dia mianiana Aho fa amin’izay andro izay dia hisy horohoron-tany mahatsiravina hamely ny tanin’i Israely. 20Koa na ny trondro any an-dranomasina na ny voro-manidina na ny bibidia na ny bibikely isan-karazany mihetsiketsika amin’ny tany na ny olombelona rehetra eny ambonin’ny tany dia samy hangorohoro eo anatrehako. Ny tendrombohitra hietry, ny harana hikoa ary ny manda hirodana#38.20 Ireo dia famantarana mampiavaka ny andron’ny fitsaran’Andriamanitra, jereo Jer 4.24; Is 2.10; Jl 4.16.. 21Ary ianao dia hampihorohoroiko amin’ny fomba maro#38.21 Araka ny dkt grika tranainy izany, fa ny RM kosa manao hoe hiantso ady Aho hamelezana anao eny amin’ny tendrombohitro rehetra eny. ; teny hentitra avy amiko Tompo ANDRIANANAHARY izany. Hifamono ny miaramilanao. 22Hofaiziko amin’ny areti-mifindra sy amin’ny fandringanana ianao. Harotsako aminao sy amin’ny tafikao ary amin’ireo firenena maro mpomba anao ny oram-be mivatravatra sy ny havandra arahina solifara mivaivay. 23Toy izany no hanehoako eo imason’ny firenen-kafa marobe fa Izaho dia Andriamanitra lehibe sady masina; amin’izay dia hoeken’ireo fa Izaho no TOMPO.

Currently Selected:

Ezekiela 38: DIEM

Highlight

Copy