Ezekiela 21

Vaovao ratsy ho an’i Israely

1Ary nisy tenin’ny TOMPO tamiko nanao hoe#21.1 Amin’ny dkt sasany ny hoe 21.1-5 dia voalahatra hoe 20.45-49.:

2–Ry ilay taranak’olombelona, atodiho mianatsimo ny fijerinao, ka mitenena manandrify ny atsimo ary ijoroy ny maha-mpaminany anao mba hamelezana ny alan’i Negeba#21.2 Ny alan’i Negeba dia ao atsimon’i Joda, fa eto izy dia toa manondro an’i Joda manontolo.. 3Asaivo mihaino ny tenin’ny TOMPO izy, satria izao no lazain’ny Tompo ANDRIANANAHARY aminy: «Indro Aho handrehitra afo izay handevona ny hazonao rehetra na ireo mirobona maitso na ireo efa maina. Tsy hisy afaka hamono ny lelafo midedadeda fa hihanaka avy any atsimo ka hatrany avaratra izany, ka ho may avokoa ny tarehin’ny olona rehetra. 4Dia ho hitan’ny olona rehetra fa Izaho TOMPO no nandrehitra io afo io ka tsy misy afaka hamono azy.»

5Fa namaly Azy aho hoe:

–Indrisy, ry Tompo ANDRIANANAHARY ô, efa mimenomenona amiko ny olona ka manao hoe: «Tsy miteny afa-tsy ankamantatra izy!»

6Fa nisy indray tenin’ny TOMPO tamiko nanao hoe#21.6 Amin’ny dkt sasany ny hoe 21.6-37 dia voalahatra hoe 21.1-32; jereo ny naoty tandrifin’ny 21.1.:

7–Ry ilay taranak’olombelona, atodiho mankany Jerosalema ny fijerinao, ka mitenena miantefa amin’ny Toeramasiny, ary ijoroy ny maha-mpaminany anao mba hamelezana ny tanin’i Israely. 8Ambarao amin’ny tanin’i Israely fa izao no lazain’ny TOMPO: «Hirotsaka an-tsehatra hamely anao Aho, ary hanatsoaka ny sabatro amin’ny fitoerany ka haringako na ny olo-marina na ny olon-dratsy eo aminao. 9Ny handringanako ny olo-marina sy ny olon-dratsy eo aminao no hanatsoahako ny sabatro amin’ny fitoerany, hamelezany ny olona rehetra hatreo atsimo ka hatrany avaratra. 10Dia hoeken’ny olona rehetra amin’izay fa Izaho TOMPO no efa nanatsoaka ny sabatro tamin’ny fitoerany ka tsy hampiditra azy ao intsony.» 11Ary ianao, ry ilay taranak’olombelona, mitolokoa noho ny havesatry ny fahadisoam-panantenana; eny, mitolokoa eo imason’izy rehetra. 12Dia hanontaniana anao ny antony itolokoanao ka hovalianao hoe: «Vaovao ratsy no reko ary ho tonga izany. Ho kivy fo sy hiraviravy tanana ny besinimaro ary ho ketra-panahy sy halemy lohalika. Indro tonga izany ary tanteraka, hoy ny teny hentitra avy amiko Tompo ANDRIANANAHARY.»

Ny amin’ilay sabatra fandringanana

13Ary nisy tenin’ny TOMPO tamiko nanao hoe: 14«Ry ilay taranak’olombelona, ijoroy ny maha-mpaminany anao ka ambarao amin’ny olona fa izao no lazain’ny TOMPO:

‹Indro misy sabatra,

dia sabatra voaranitra sady mangirana!

15Noranitina handringanana olona izy

natao mangirana hanjelanjelatra#21.15 Amin’ny faran’ity and 15 ity dia misy andalana tsy azo ny heviny ka navela; io andalana io dia midika ara-bakiteny hoe sa hiravoravo isika fa ny tehim-panjakan-janako dia manao tsinontsinona ny hazo rehetra? .

16Nomeko hatao mangirana izy

mba ho azo arangaranga;

noranitina sy natao mangirana izy

mba hatolotra ny mpandringana.

17Miantsoa vonjy ianao ary midradradradrà,

ry ilay taranak’olombelona,

satria izany sabatra izany

dia mihatra amin’ny vahoakako;

iharan’io sabatra io koa

ny mpitondra rehetra eto Israely,

ka ho ringan-tsabatra miaraka amin’ny vahoakako ireo.

Koa aoka ianao handondon-tratra

18noho ny alahelo aterak’izao fitsapana izao#21.18 Aorian’ny hoe fitsapana izao, dia misy andalana tsy azo ny heviny ka navela; io andalana io dia midika ara-bakiteny hoe Ary inona no hiseho raha tsy nisy ny tehim-panjakana manao tsinontsinona? izay toa mifandray amin’ny faran’ny and 15 (jereo ny naoty momba io and io)..

Teny hentitra avy amiko Tompo ANDRIANANAHARY izany.

19Ankehitriny, ijoroy ny maha-mpaminany anao,

ry ilay taranak’olombelona,

ka mitehafa tanana ho fanaingana#21.1 Ny teha-tanana ataon’ny mpaminany Ezekiela no toa famantarana manainga an’i Nebokadnetsara hanomboka ny fandravana sy fandringanana.:

Ho indroa na intelo heny anie

no hahaloza ny velin-tsabatra,

dia ilay sabatry ny fandringanana goavana

izay manemitra hatraiza hatraiza.

20Mba hampivalaketraka ny fon’ny olona

sy hampivembena ny besinimaro

dia napetrako isam-bavahady

ny sabatra fandringanana,

ka manjelanjelatra toy ny tselatra

sady efa voavoatra hamono.

21Ry sabatra maranitra ô, kapao

mihodin-kavanana sy mihodin-kavia,

na aiza na aiza voatendry hamelezanao.

22Izaho koa dia hiteha-tanana ho fanaingana

ary dia hanampatra ny fahatezerako.

Izaho TOMPO no manambara izany›. »

Fanafihana an’i Jerosalema

23Ary nisy tenin’ny TOMPO tamiko nanao hoe: 24«Ry ilay taranak’olombelona, sorito ny lalana roa izay hahazoan’ny mpanjakan’i Babilôna ho tonga ombàn-tsabatra. Ataovy samy miainga amin’ny tany iray ihany ireo lalana roa ireo. Isaky ny vavalalana dia mariho ny tanàna izay halehany. 25Ny iray amin’ireo lalana ireo dia hitondra ny tafika babilônianina ho any Rabà#21.25 I Rabà dia renivohitry ny Hamônita, ao atsinanan’i Jôrdàna. Izy no tanàna Hamàna ankehitriny (renivohitr’i Jôrdania)., tanànan’ny Hamônita; fa ny iray kosa ho any Jerosalema, tanànamimanda any Joda. 26Hijanona eo am-bavalalana iaingan’ireo lalana roa ireo aloha ny mpanjakan’i Babilôna mba hanao sikidy. Hahontsankontsany ny zana-tsipîka, hanontaniany ny sampy ary hohadininy ny atin-kenam-biby#21.26 Tanisain’i Ezekiela eto ireo fomba fanao amin’ny sikidy.. 27Ny zana-tsipîka manondro an’i Jerosalema dia nianjera teo an-kavanany. Koa hanandra-peo hanao akoran’ady izy ary hampametraka ny kanontabe hamelezana ny vavahadin-tanàna, hampanangana ny tovon-tany ary hampandavaka ireo hady fanafihana. 28Hihevitra ny olona ao Jerosalema fa tsy misy dikany ny sikidy satria voaaron’ny fianianana natao izy. Nefa ny mpanjakan’i Babilôna dia hampahatsiaro azy ny fivadihany ka mampandre fa hoentina ho babo ireo. 29Koa izao no lazain’ny Tompo ANDRIANANAHARY: ‹Mampahatsiaro Ahy tsy tapaka ny helokareo ianareo amin’ireo fikomianareo an-karihary; ary ny asa rehetra nataonareo no mampiseho ny fahotanareo. Noho ianareo nanao izay hahatsiarovana anareo toy izany, dia hosamborin’ny fahavalo tokoa ianareo!›

30«Ary ianao, ry printsy filohan’i Israely sady olon-dratsy mpamadika, tonga ny andro hifaranan’ny fanaovanao heloka#21.30 Ny filohan’i Israely voaresaka eto dia i Tsedekià. Izay nanjo azy dia jereo 2 Mp 25.4-7.. 31Satria izao no lazain’ny Tompo ANDRIANANAHARY: ‹Halaina aminao ny marika maha mpanjaka anao, ary hoesorina ny satro-boninahitrao. Fa nivadika ny toe-javatra: ny olona ambany no hasandratra, ary ny olona ambony no haetry. 32Faharavana, faharavana, faharavana: hataoko toy izany i Jerosalema. Ho potika tanteraka ny tanàna, saingy tsy alohan’ny hahatongavan’ilay homeko fahefana hanafay azy#21.32 Ny fanatanterahana ny famaizana dia nankinina tamin’i Nebokadnetsara, fitaovan’Andriamanitra hanafay an’i Israely, jereo 23.23-24.›. »

Fanafihana ny Hamônita

33Dia nampian’ny Tompo hoe: «Ary ianao, ry ilay taranak’olombelona, mijoroa ho mpaminany ka ambarao amin’ny Hamônita#21.33 Ny Hamônita dia nifanaiky tamin’ny Edômita sy ny Môabita sy ny Fenisianina tao Tiro sy Tsidôna niaraka tamin’i Joda mba hanandrana hikomy tamin’i Babilôna niaraka tamin’ny fanampian’i Ejipta, jereo Jer 27.2-6. fa izao no lazain’ny Tompo ANDRIANANAHARY hamelezana azy ary ho setrin’ny fandatsana nataony tamin’i Israely: ‹Efa ao ny sabatra, dia sabatra voatsoaka hahafaty sy handringana ary sabatra natao mangirana hanelatselatra. 34Raha fahitana manodoka sy fanambarana mamitaka no aroso aminareo, dia efa vonona hanapaka ny vozon’ny mpamadika sy ny olon-dratsy izany; satria tonga ny andro hifaranan’ny fanaovany heloka#21.34 ny andro... heloka: jereo ny and 30.. 35Ankehitriny ampidiro amin’ny fitoerany ny sabatrareo; fa eo amin’ny toerana izay namoronako anareo sy nahaterahanareo no hanafaizako anareo. 36Hatosako aminareo ny fahavinirako ary hampihariko aminareo ny fahatezerako mirehitra, ka hatolotro eo an-tanan’ny olon-doza mpamorona fandravana ianareo. 37Ho levon’ny afo toy ny kitay ianareo, handriaka amin’ny tany ny ranareo, ary dia tsy hisy hahatsiaro anareo intsony. Izaho TOMPO no manambara izany#21.37 And 33-37: jereo ny naoty momba ny Jer 49.1.›. »

Currently Selected:

Ezekiela 21: DIEM

Highlight

Copy