Ezekiela 18

Andriamanitra mitsara ny olona araka ny fitondrantenany avy

1Nisy tenin’ny TOMPO tamiko nanao hoe: 2«Ahoana moa no amerimberenanareo izao ohabolana izao ao amin’ny tanin’i Israely hoe:

‹Ny ray aman-dreny no nihinana voaloboka marikivy,

ka ny zanany ve no hadilo nify?›

3Velona Izaho Tompo ANDRIANANAHARY, ka manao teny hentitra sy mianiana fa tsy hotononinareo any Israely intsony izany. 4Fa samy Ahy avokoa ny ain’ny tsirairay avy, na ny an’ny ray aman-dreny na ny an’ny zanany; koa izay olona manota ihany no ho faty#18.4 Momba ny and 4-20, jereo 14.12-20; Deot 7.10; 24.16; Jer 31.29-30 sns..

5«Aoka hatao hoe misy lehilahy marina iray ka manao izay marina sy mahitsy. 6Tsy mihinana amin’ny sakafom-panompoan-tsampy eny an-tendrombohitra izy na manompo ireo sampin’ny Israelita, tsy mandoto ny vadin’ny namany na matory amin’ny vehivavy voan’ny fadimbolana#18.6 eny an-tendrombohitra: jereo 6.2 sy nta. –Ny vehivavy voan’ny fadimbolana dia heverina ho maloto* ara-pivavahana, jereo Lev 18.19.. 7Tsy mitsentsitra na mangalatra izy fa mamerina ny antoka amin’ny mpitrosa, ary manome hanina ho an’ny noana sy fitafiana ho an’ireo tsy manana. 8Tsy mampindram-bola mba hahazoana zana-bola sy tombony izy#18.8 zana-bola sy tombony: jereo Lev 25.36-37., tsy miray tsikombakomba amin’ny tsy marina fa manao fitsarana tsy miangatra. 9Manaraka ny lalànako sy mitandrina ny fitsipiko izy mba hanao izay mahitsy. Olo-marina io lehilahy io ka ho velona tokoa. Teny hentitra avy amiko Tompo ANDRIANANAHARY izany.

10«Raha ohatra io lehilahy io manan-janaka lahy mandroba sy mamono olona ho faty na manao zavatra mitovy karazana amin’izany. 11Tsy nanao ireo zavatra ireo akory ny rainy, fa ity zanany no mihinana amin’ny sakafom-panompoan-tsampy eny an-tendrombohitra, mandoto ny vadin’ny namany, 12mitsentsitra ny mahantra sy ny fadiranovana, mangalatra amin’ny olona, tsy mamerina ny antoka izay nomen’ireo mpitrosa azy, manompo sampy sady manao zavatra maharikoriko, 13mampindram-bola mba hahazoana zana-bola sy tombony. Moa tokony ho velona ve io zanany lahy io? Tsia! Nanao ireo zava-dratsy rehetra maharikoriko ireo izy, ka ho faty tokoa ary ho tompon’andraikitry ny fahafatesany.

14«Raha misy kosa lehilahy iray manan-janaka lahy. Izany zanany lahy izany, rehefa nahita ny fahotana rehetra nataon-drainy, dia tsy manahaka azy. 15Tsy mihinana amin’ny sakafom-panompoan-tsampy eny an-tendrombohitra izy na manompo ireo sampin’ny Israelita ary tsy mandoto ny vadin’ny namany. 16Tsy mitsentsitra na mangalatra izy sady tsy mitaky antoka amin’ny mpitrosa ary manome hanina ho an’ny noana sy fitafiana ho an’ny tsy manana, 17tsy miray tsikombakomba amin’ny tsy marina#18.17 ny tsy marina: araka ny dkt grika tranainy izany; ny RM kosa manao hoe ny mahantra. na mampindram-bola mba hahazoana zana-bola sy tombony. Manatanteraka ny fitsipiko sy manaraka ny lalànako, ka tsy ho faty noho ny fahadisoan-drainy fa ho velona tokoa. 18Ny rainy izay nampahory sy nangalatra#18.18 nangalatra: araka ny dkt tranainy sasany izany; ny RM kosa manao ohe nangalatra ny rahalahiny. ary nampijaly ny vahoaka nanodidina azy ihany no ho faty noho ny fahadisoana nataony.

19«Nefa ianareo manontany hoe: Nahoana ny zanaka no tsy mba mizaka ny fahadisoan-drainy? Satria manao izay marina sy mahitsy izy ary mitandrina sy manatanteraka ny lalànako rehetra, ka dia ho velona tokoa. 20Ny olona nanota ihany no ho faty. Ny zanaka tsy hizaka ny fahadisoan’ny ray aman-dreniny, ary ny ray aman-dreny tsy hizaka ny fahadisoan’ny zanany. Ny olo-marina dia hovaliana soa noho ny fahamarinany ary ny olon-dratsy kosa hofaizina noho ny faharatsiany#18.20 Jereo ny naoty momba ny and 4..»

Fananarana hanao ny tsara

21«Raha misy olon-dratsy miala amin’ny fahotana rehetra nataony, ka mitandrina ny lalànako rehetra ary manao izay marina sy mahitsy, dia tsy ho faty izany olona izany fa ho velona tokoa. 22Hohadinoina ny heloka rehetra vitany ka ho velona izy noho ny marina ataony. 23Moa sitrako ve ny hahita ny olon-dratsy ho faty? Izaho Tompo ANDRIANANAHARY dia manao teny hentitra fa ny hiovany fitondrantena mba hahavelomany no sitrako. 24Kanefa raha misy olo-marina miala amin’ny fahamarinany ka manao heloka araka ny zavatra rehetra maharikoriko izay fanaon’ny olon-dratsy, dia heverinareo ho velona ve izy? Tsia. Hohadinoina ireo asa tsara rehetra nataony, ka ho faty izy noho ny hadisoana amam-pahotana vitany. 25Hoy ianareo hoe: ‹Tsy marina ny fitòndran’ny Tompo!› Henoy tsara Aho, ry Israelita: Ny fitòndrako ve no tsy marina? Tsy ny fitondranareo ve no tsy marina? 26Raha misy olo-marina miala amin’ny fahamarinany, ka manao heloka ary maty amin’izany, dia maty noho ny heloka nataony ihany izy. 27Raha misy kosa olon-dratsy miala amin’ny faharatsiana nataony, ka manao izay marina sy mahitsy, dia mamonjy ny ainy izy. 28Ho velona tokoa izy fa tsy ho faty satria nahatsapa ny asa ratsiny ka niala tamin’izany. 29Kanefa hoy ianareo Israelita hoe: ‹Tsy marina ny fitòndran’ny Tompo.› Tsy ny fitòndrako no tsy marina fa ny anareo! 30Noho izany, Izaho Tompo ANDRIANANAHARY dia hitsara anareo Israelita tsirairay avy araka ny fitondrantenany; teny hentitra avy amiko izany. Koa ovay ny toe-dratsy, ialao ny hadisoana rehetra fanaonareo, dia tsy hisy intsony zavatra hitarika anareo amin’ny heloka. 31Esory ho afaka aminareo ny asa ratsy rehetra fanaonareo; ka mihavaoza fo amam-panahy ianareo. Ahoana no te ho faty ianareo, ry Israelita? 32Fa tsy sitrako ny hahafaty ny olona. Teny hentitra avy amiko Tompo ANDRIANANAHARY izany. Ovay ny toe-dratsy, dia ho velona ianareo.›

Currently Selected:

Ezekiela 18: DIEM

Highlight

Copy