Daniela 6

1Ary i Dariôsa, ilay Medianina, no nandray ny fanjakana teo amin’ny faha-62 taonany#6.1 Io Dariôsa izay Medianina io dia tsy mba voalaza mihitsy na aiza na aiza ao amin’ny tantara tranainy afa-tsy eto ihany. –Ao amin’ny dkt sasany ny and 6.1-29 dia mitondra ny laharana 5.31–6.28..

Mamandrika an’i Daniela ireo fahavalony.

2Sitrak’i Dariôsa ny hanendry solotenan’andriamanjaka 120 izay hanapaka manerana ny fanjakana#6.2 Ny solotenan’andriamanjaka dia ireo governora mitondra faritany tao amin’ny fanjakana manontolo.. 3Ary teo ambonin’ireo dia nisy telo lahy mpitantan-draharaha, ka i Daniela ny anankiray; izy telo lahy no hanaovan’ireo solotenan’andriamanjaka tatitra mba tsy hisy hanimba ny tombon-tsoan’ny mpanjaka. 4Ary nihoaran’io Daniela io avokoa ireo mpitantan-draharaha anankiroa sy ireo solotenan’andriamanjaka tamin’ny fananany fanahy tena fatratra, koa nokasain’ny mpanjaka hatao lehibe eo amin’ny fanjakana manontolo izy#6.4 Tetehina ho praiminisitra mihitsy izany i Daniela.. 5Noho izany ireo mpitantan-draharaha ambony sy ireo solotenan’andriamanjaka dia nikaroka izay hiampangana an’i Daniela momba ny raharaham-panjakana; kanefa tsy nahita izay fahadisoany na tsininy akory ireo, satria nahatoky izy, fa tsy nisy mihitsy lesoka na tsiny teo aminy. 6Tamin’izay dia hoy ireo lehilahy ireo: «Tsy ho hitantsika mihitsy izay hiampangantsika io Daniela io raha tsy zavatra momba ny lalànan’ny Andriamaniny ihany».

7Dia dodona nankany amin’ny mpanjaka ireo mpitantan-draharaha ambony sy solotenan’andriamanjaka, ary nanao taminy hoe:

–Ho ela velona anie ianao, ry Dariôsa mpanjaka! 8Ny mpitantan-draharaha ambony ato amin’ny fanjakana sy ny mpanapaka sy ny solotenan’andriamanjaka sy ny mpanolotsaina ary ny governora dia nifanaraka fa tokony hamoaka lalàm-panjakana ianao, ry mpanjaka, fa ato anatin’ny telopolo andro, na iza na iza manao fivavahana na amin’Andriamanitra na amin’olona, afa-tsy aminao ihany, ry mpanjaka ô, dia hatsipy ao an-davaky ny liona izy. 9Ankehitriny, ry mpanjaka ô, avoahy ny didy ka asio sonia mba tsy ho azo ovana, araka ny lalànan’ny Medianina sy ny Persianina izay tsy azo foanana.» 10Koa dia nosoniavin’i Dariôsa mpanjaka izany didy aman-dalàna izany.

Natsipy tao an-davaky ny liona i Daniela

11Ary nony fantatr’i Daniela fa nosoniavin’ny mpanjaka ny didy, dia nody tany an-tranony izy; ary novohany ny varavarankeliny tany ambony rihana nanandrify an’i Jerosalema. Intelo isan’andro izy no nandohalika nivavaka sy nidera an’ilay Andriamaniny satria efa fanaony hatry ny taloha izany. 12Dodona erỳ ireo lehilahy ireo nitsikilo ka nahita an’i Daniela nivavaka sy nitalaho tamin’ny Andriamaniny; 13dia nanatona ny mpanjaka izy ary niteny teo anatrehany momba ilay didy ka nanao hoe:

–Ry mpanjaka ô, moa tsy nisy didy nosoniavinao va fa ato anatin’ny telopolo andro, na zovy na zovy no hanao fivavahana na amin’Andriamanitra na amin’olona, afa-tsy aminao ihany, dia hatsipy ao an-davaky ny liona?

Dia namaly kosa ny mpanjaka nanao hoe:

–Marina tokoa izany, dia araka ny lalànan’ny Medianina sy ny Persianina izay tsy azo foanana.

14Fa niteny indray ireo ka nanao teo anatrehan’ny mpanjaka hoe:

–I Daniela, isan’ireo babo avy any Joda, dia tsy mba miraharaha anao na ny didy izay nosoniavinao, ry mpanjaka ô; fa intelo isan’andro izy no manao fivavahana amin’ny Andriamaniny.

15Nalahelo mafy ny mpanjaka raha nandre izany zavatra izany; dia nisaintsaina ny hanavotra an’i Daniela izy ary nitady izay hamonjena azy mandra-pilentiky ny masoandro. 16Fa dodona niverina tany amin’ny mpanjaka ireo lehilahy ireo ka nanao taminy hoe:

–Aoka ho fantatrao, ry mpanjaka, fa araka ny lalànan’ny Medianina sy ny Persianina, ny didy aman-dalàna izay navoakan’ny mpanjaka dia tsy azo ovana.

17Tamin’izay dia nanome baiko ny mpanjaka mba halaina i Daniela ka hatsipy ao an-davaky ny liona. Dia niteny kosa ny mpanjaka ka nanao tamin’i Daniela hoe: «Andriamanitrao, Izay tompoinao fatratra, no hany hamonjy anao!»

18Dia nisy vato natampina ny vavan-davaka; ary ny mpanjaka nanomboka izany tamin’ny tombokaseny sy tamin’ny an’ireo olo-manan-kajany mba tsy hisy hovana ny amin’i Daniela. 19Dia nody tany an-dapany ny mpanjaka ary tsy nihinan-kanina nandritra ny alina sady tsy nampiditra vehivavy#6.19 nampiditra vehivavy: tsy azo antoka loatra ny hevitry ny teny aramianina nadika eto. teo anatrehany, na dia tsy nahita tory aza.

Nivoaka tsy naninon-tsy naninona avy tao an-davaky ny liona i Daniela.

20Fa raha vao nangiran-dratsy ny andro, dia nifoha ny mpanjaka ka nandeha faingana nankany amin’ny lavaky ny liona. 21Ary raha nanatona ny lavaka izy, dia niantso an’i Daniela tamin’ny feo malahelo hoe:

–Ry Daniela mpanompon’Andriamanitra velona ô, moa Andriamanitrao Izay tompoinao fatratra va afaka namonjy anao tamin’ny liona?

22Dia niteny tamin’ny mpanjaka i Daniela hoe:

–Ho ela velona anie ianao, ry mpanjaka! 23Ny Andriamanitro efa naniraka ny anjeliny hanakombona ny vavan’ny liona tsy handratra ahy, satria hita tsy manan-tsiny teo anatrehany aho; ary tsy nanao ratsy teo anatrehanao koa aho, ry mpanjaka.

24Tamin’izay dia faly tokoa ny mpanjaka, ka nasainy nakarina avy ao an-davaka i Daniela; rehefa tafakatra izy, dia tsy nahitana ratra akory satria natoky an’ilay Andriamaniny. 25Ary nanome baiko ny mpanjaka mba halaina ireo lehilahy izay niampanga an’i Daniela ka hatsipy ao an-davaky ny liona izy mbamin’ny vady aman-janany. Fa raha tsy mbola nipaka tamin’ny vody lavaka akory izy mianakavy, dia nifandrombahan’ny liona ka nopotipotehiny ny taolany rehetra.

26Taorian’izany i Dariôsa mpanjaka dia nanoratra ho an’ny vahoaka avy amin’ny foko sy firenena ary samy hafa fiteny rehetra izay monina ambonin’ny tany tontolo hoe:

–Hitombo anie ny fiadananareo!

27Mamoaka izao didy izao aho mba hangovitan’ny olona sy hatahorany eo anatrehan’ny Andriamanitr’i Daniela manerana ny fanjakako.

Fa Izy no Andriamanitra velona

sady maharitra mandrakizay;

ny fanjakany tsy mety rava

ary ny fanapahany haharitra tsisy farany.

28Izy no mamonjy sy manafaka

ary manao famantarana sy zava-mahagaga

any an-danitra sy etỳ an-tany;

Izy no namonjy an’i Daniela

ho afaka tamin’ny vahohon’ny liona.»

29Ary izany Daniela izany dia nitana toerana ambony tamin’ny nanjakan’i Dariôsa sy tamin’ny nanjakan’i Kirôsa ilay Persianina.#6.29 Jereo Hez 1.1 sy nta.

Currently Selected:

Daniela 6: DIEM

Highlight

Copy