1 Tantara 18
18
Ny nandresen’i Davida ireo firenena manodidina
(Jereo 2 Sam 8.1-14)
1Taorian’izany, dia nandresy ny Filistinina i Davida ka nampilefitra azy ary nalainy teo an-tanan’ny Filistinina i Gata sy ireo tanàna kely manodidina azy. 2Nandresy ny Môabita koa izy; dia tonga olom-pehezin’i Davida ireo sady mpandoa hetra ho azy. 3Mbola resin’i Davida koa i Hadadehezera mpanjakan’i Tsôbà, akaikin’i Hamata#18.3 Tsôbà: fanjakana ao avaratr’i Damasy. –Hamata: tanàna sy fanjakana mbola any avarabaratra kokoa; jereo and 9 ary koa ny 2 Sam 8.9 sy nta.; tamin’iny nanitaran’i Hadadehezera ny fanjakany teny amoron’ny ony Eofrata iny indrindra no nandresen’i Davida azy. 4Kalesy arivo sy mpitaingin-tsoavaly fito arivo ary miaramila an-tongotra 20 000 no voababon’i Davida taminy; saingy nasain’i Davida nokapain-tongotra avokoa ny soavalin-kalesy fa ny tokony ho amin’ny kalesy zato ihany no sisa notazoniny. 5Dia tonga ny Sirianina avy any Damasy mba hamonjy an’i Hadadehezera mpanjakan’i Tsôbà; kanefa nahafatesan’i Davida miaramila 22 000 koa ny Sirianina. 6Nametrahan’i Davida governora tany Siria, faritr’i Damasy; ka dia tonga olom-pehezin’i Davida sady mpandoa hetra ho azy ny Sirianina. Fa nampandresy an’i Davida tamin’izay fanafihany rehetra ny TOMPO. 7Ary nalain’i Davida ny ampinga volamena izay teny amin’ny mpanompon’i Hadadehezera ka nentiny tany Jerosalema. 8Nahazoan’i Davida halimo be dia be koa tao Tibihata sy Kona, izay samy tanànan’i Hadadehezera; ka izany halimo izany no nanaovan’i Salômôna ilay fitobian-drano boribory goavana mbamin’ireo andry sy ireo fanaka halimo#18.8 Tibihata, Kona: tanàna roa any Siria heverina ho teo amin’ny manodidina an’i Bahalbeka ankehitriny. –fitobian-drano boribory goavana sy ny andry ary ny fanaka rehetra vita varahina: jereo 1 Mp 7.23-26, 15-22, 45. (tao an-tempoly).
9Ren’i Tôhỳ, mpanjakan’i Hamàta, fa resin’i Davida avokoa ny tafik’i Hadadehezera mpanjakan’i Tsôbà; 10dia nirahin’i Tôhỳ ho any amin’i Davida mpanjaka i Hadôrama zanany lahy mba hiarahaba sy hidera azy noho ny niadiany tamin’i Hadadehezera ka nandreseny azy, satria mpiady tamin’i Tôhỳ io Hadadehezera io; koa fanaka volamena sy volafotsy ary halimo isan-karazany no nampitondrain’i Tôhỳ ho an’i Davida. 11Ireo fanaka ireo koa dia natokan’i Davida mpanjaka ho an’ny TOMPO, niaraka tamin’ny volafotsy sy volamena izay nentiny avy any amin’ny firenena hafa rehetra: dia ny Edômita sy Môabita ary Hamônita mbamin’ny Filistinina sy Hamalekîta.
12I Abisay, zanakalahin’i Tseroià, dia nandresy ny Edômita tokony ho 18 000 lahy, tao amin’ny Lohasahan-tsira#18.12 Lohasahan-tsira: jereo 2 Sam 8.13 sy nta; jereo koa Sal 60.2.. 13Dia nametrahany governora tao Edôma, ka tonga olom-pehezin’i Davida ny Edômita rehetra; ary nampandresy an’i Davida tamin’izay fanafihany rehetra ny TOMPO.
Ireo mpiasam-panjakan’i Davida
(Jereo 2 Sam 8.15-18)
14Dia nanjaka tamin’i Israely manontolo i Davida ka nanao ny rariny sy ny fahamarinana tamin’ny vahoakany rehetra. 15I Jôaba zanakalahin’i Tseroià, no lehiben’ny tafika; i Jôsafata zanakalahin’i Ahiloda, no mpitondra tenin’ny mpanjaka, 16i Tsadôka zanakalahin’i Ahitoba mbamin’i Abimelèka zanakalahin’i Abiatara no mpisorona; i Savesà no mpitantsoratra; 17i Benaià, zanakalahin’i Jôiadà, no lehiben’ny Keretita sy Peletita mpiambina ny mpanjaka; ary ireo zanakalahin’i Davida kosa dia mpiara-miasa akaiky amin’ny mpanjaka.
Currently Selected:
1 Tantara 18: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
