1 Tantara 12
12
Ireo niaraka tamin’i Davida voalohany tany Tsiklaga
1Ireto kosa ny olona tonga tany amin’i Davida tao Tsiklaga#12.1 Tsiklaga: jereo 1 Sam 27.6 sy nta. fony izy mbola niery an’i Saoly, zanakalahin’i Kisy; izy ireo dia lehilahy mahery mpanampy an’i Davida amin’ny ady, 2sady mpitondra tsipìka sy antsamotady ka mahay manavia sy manavanana raha mandefa vato sy zana-tsipîka.
Ireto ny avy amin’ny tarik’i Saoly, anisan’ny fokon’i Benjamîna: 3i Ahihezera, filohany, sy i Joasy rahalahiny, zanakalahin’i Semahà avy any Gibehà; i Jeziela sy i Peleta, zanakalahin’i Hazmavety; i Berekià sy i Jehò, avy any Hanatôta; 4i Jismahià, avy any Gibehôna, lehilahy mahery tao amin’ny «andian’ny telopolo lahy#12.4 andian’ny telopolo lahy: jereo 2 Sam 23.8-39. –Amin’ny dkt sasany dia ny and 5 no faran’ny and 4; ary ny and 6-41 kosa dia voalahatra ho and 5-40.», sady anankiray amin’ny lehibeny; 5i Jeremià sy i Jahaziela ary i Jôhanàna; i Jôzabada, avy any Gederà; 6i Elehozay sy i Jerimôta mbamin’i Behalià sy i Semarià ary i Sefatià, samy avy any Harofa; 7i Elkanà sy i Jisià mbamin’i Hazarela sy i Jôhezera ary i Jasôbehama, samy taranak’i Kôra; 8ary i Jôhelà sy i Zebadià, samy zanakalahin’i Jerôhama, avy any Gedôra.
9Nisy koa olona avy amin’ny fokon’i Gada, niendaka hanatona an’i Davida tao amin’ny toby fiarovana tany an-taniefitra. Izy ireo dia lehilahy maherifo, miaramila mahay miady sady zatra mampiasa ampinga sy lefona: masiaka toy ny liona no fahitana azy, ary faingam-pandeha toy ny gazela eny an-tendrombohitra. 10-14Miisa 11 ry zareo: dia i Hezera sy i Hôbadià, i Eliaba sy i Mismanà, i Jeremià sy i Hatahy, i Eliela sy i Jôhanàna mbamin’i Elzabada sy i Jeremià ary i Makbanay. 15Mpitari-tafika ireo avy amin’ny taranak’i Gada ireo ka ny kely indrindra aminy dia mahatoraka#12.15 mahatoraka na mifehy. ny zato lahy, ary ny lehibe aminy mahatoraka ny arivo. 16Izy ireo no niampita an’i Jôrdàna tamin’ny volana voalohany amin’ny taona, raha iny mbola nihoatra iny avokoa ny morony, ka nampandositra ny mponina rehetra teny amin’ny lohasaha atsinanana sy andrefana.
17Nisy koa avy amin’ny fokon’i Benjamîna sy i Joda tonga hitady an’i Davida tao amin’ny toby fiarovana. 18Dia nivoaka hitsena azy i Davida ka nanao taminy hoe:
–Raha fihavanana no ahatongavanareo atỳ amiko mba hanampy ahy, dia amin’ny foko tokoa no hikambanako aminareo; fa raha hamadika ahy kosa mba hanolotra ahy amin’ny fahavaloko, na tsy nanao an-keriny aza ny tanako, dia aoka ilay Andriamanitry ny razantsika no hijery sy hamaly anareo!
19Tamin’izay, dia nentanin’ny Fanahin’Andriamanitra i Hamasay, filohan’ny «andian’ny telopolo lahy», ka niantso hoe:
–Anao izahay, ry Davida ô!
Miandany aminao izahay, ry zanakalahin’i Jisay!
Fiadanana, fiadanana anie ho anao
ary fiadanana anie ho an’ireo mpanampy anao,
satria ilay Andriamanitrao no efa manampy anao!
Dia noraisin’i Davida ireo ka notendreny ho isan’ny filohan’ny andian-tafika.
20Ary nisy avy amin’ny fokon’i Manase lasa nikambana tamin’i Davida fony izy nomba ny Filistinina mba hiady amin’i Saoly; saingy tsy nanampy ny Filistinina ry i Davida, satria rehefa nifampidinika ny andrianan’ny Filistinina dia nampiverina azy, fa hoy ireo hoe: «Hikambana amin’i Saoly tompony i Davida, ka hanolotra antsika aminy#12.20 hikambana... antsika aminy: mampahatsiaro ny fitantarana ao amin’ny 1 Sam 29.1-5.». 21Koa raha niverina ho any Tsiklaga iny i Davida no tonga nikambana taminy kosa ireo olona anisan’ny fokon’i Manase, dia i Hadnà sy i Jôzabada, i Jedihaela sy i Mikaela mbamin’i Jôzakara sy i Elihò ary i Tsiletahy izay samy mpifehy arivo tao amin’i Manase. 22Nanampy ny andian-tafik’i Davida ireo satria lehilahy mahery avokoa, ary nanjary komandy tao amin’ny tafiny. 23Isan’andro isan’andro dia nisy olona tonga tany amin’i Davida hanampy azy hany ka nanjary lehibe dia lehibe tokoa ny tafik’i Davida#12.23 hany... tafik’i Davida: ny hita ao amin’ny RM dia hoe mandrapahatongany ho toby lehibe toy ny tobin’Andriamanitra; kanefa toa fomba fiteny hebreo enti-milaza ny zavatra goavana tsy hita lany ity hoe toy ny tobin’Andriamanitra ity..
Ny isan’ireo mpomba an’i Davida tonga tany Hebrôna
24Izao no isan’ny vatan-dehilahy vonona hiady izay tonga tany amin’i Davida tao Hebrôna mba hamindra aminy ny fanjakàn’i Saoly araka ny baikon’ny TOMPO:
25Tamin’ny taranak’i Joda, dia nisy 6 800 lahy mpitondra ampinga sy lefona sady vonona hiady. 26Tamin’ny i Simehôna, dia nisy 7 100 lahy maherifo an’ady. 27Tamin’ny taranak’i Levỳ, dia nisy 4 600 lahy, 28niampy an’i Jôiadà, filohan’ny taranak’i Aharôna, niaraka tamin’ny 3 700 lahy, 29sy niampy an’i Tsadôka, tovolahy maherifo, niaraka tamin’ny 22 lahy samy filoha teo amin’ny fianakavian-drainy. 30Tamin’ny taranak’i Benjamîna, mpiray foko amin’i Saoly, dia nisy telo arivo lahy; ka ny ankamaroan’ireo, talohan’izao, dia mpikarakara ny ankohonan’i Saoly. 31Tamin’ny taranak’i Efraîma, dia nisy 20 800 lahy, samy maherifo sady nalaza teo amin’ny fianakaviany avy. 32Tamin’ny antsasa-pokon’i Manase, dia nisy 18 000 lahy izay notsongaina anarana mba handeha hampanjaka an’i Davida. 33Tamin’ny taranak’i Jisakara, dia nisy manamboninahitra roanjato lahy sy ireo mpiray foko rehetra teo ambany fifehezany; ireo manamboninahitra ireo dia samy nahay mamantatra tsara ny fotoana mety sy ny fomba tokony hikatrohan’ny Israelita. 34Tamin’i Zebolòna, dia nisy miaramila 50 000, zatra ady sy vonon-kiantafika, nirongo fiadiana isan-karazany sady afaka miara-mientana tsara#12.34 sady afaka...mientana tsara: dkt hafa sady vonona hanampy an’i Davida tsy am-pisalasalana, araka ny stf hebreo vitsivitsy sy ny dkt grika Septoazinta.. 35Tamin’i Naftalỳ, dia nisy manamboninahitra arivo lahy arahin’ny miaramilany 37 000 nirongo ampinga sy lefona. 36Tamin’i Dana, dia nisy 28 600 lahy, vonon-kiantafika. 37Tamin’i Asera, dia nisy miaramila 40 000, zatra ady sy vonon-kiantafika. 38Tamin’ireo teny ampita atsinanan’i Jôrdàna, izany hoe tamin’ny Reobenita sy ny Gadita ary ny antsasa-pokon’i Manase, dia nisy 120 000 ny lehilahy mirongo fiadiana isan-karazany.
39Ireo miaramila rehetra vonon-kilahatra hiady ireo no tonga tao Hebrôna tamin’ny fony manontolo mba hampanjaka an’i Davida amin’i Israely lafy valo; ary ny Israelita sisa rehetra koa niray fo mba hampanjaka an’i Davida. 40Dia nijanona telo andro tao Hebrôna niaraka tamin’i Davida ireo miaramila ka nihinana sy nisotro izay efa nomanin’ireo havany ho azy. 41Ankoatra izany koa, ny olona avy amin’ny faritany akaiky, ary hatrany amin’i Jisakara sy Zebolòna ary i Naftalỳ aza, dia nitondra sakafo ho azy ireo tamin’ny boriky sy rameva ary molè sy omby; dia koba lafarinina, mofo aviavy, voaloboka maina, divay, menaka, ary omby sy ondry aman’osy betsaka koa; satria nisy firavoravoana tao Israely.
Currently Selected:
1 Tantara 12: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
