Romans 4

Abraham kam wang asing miq ang aa

1Hiqtang phan ajat wa Abraham tung aa raaq chamlang ta raaq aa? Piq aa chamlang sam ta. 2Abraham jaksom wang asing miq ta angta jo tharangka ma piq ma chamlilang raaq ang wang ta, etharin Shkewa jakho na ang moq. 3Asang likwit eq chamta bat aa? “Abraham aa Shkewa tha hanta etho ira piq rangma asing miq ta wet ta.” 4Jaksomtey ma jakthang kot sha jakkot ang moq etharin ukot hun eq ching. 5Etharin barey jaksom somlot hung aa ngarey miqtang sha tolchak tey Shkewa sho han aa, ning ma ning kam sha asing ta wet aa. 6Bari ma jaksom ahung ang eq Shkewa asing miq ta shing aa, piq sunmaan tung aa raaq David aa tho ubat eq aa:

7“Bari tang jashit sha utol eq chakta,

Etho bari tang ngarey sha uhop eq chakta, ning sha sunmaan.

8Teyhungwa bari miqtang ma ngarey sha wet moq, ning sha sunmaan.”

9Eshi sunmaan raaq sha hankhup qhantey rangma chen i, etha ang moq hankhup qhan moq tey rangma tho i? Hiqtang aa irimal bat i, “Abraham rangma ukam sha asing ta wet ta.” 10Ira baluk o angta? Piq hankhup qhan jio tia hankhup qhan wey moq jakkho? Piq sha hankhup qhan jakho o piq sha asing ta wet ta, hankhup qhan jio ang moq angta. 11Piq sha jio hankhup qhan ta etho piq hankhup qhan wey moq jakho o hun Shkewa ukam tungkang o piq sha asing miq ta shing ma hankhup qhan sha ashey maal angta. Eshirangma barey kam aa etharin, hankhup qhan moq, ning thaji rangma Abraham sha ning wa angna. Ning kam tungkang o ning sha asing miq ta shing aa. 12Etho piq sha hankhup qhantey tang ma tho ning wa, bara hankhup uqhan eq ta jo tho, Abraham sha hankhup qhan jakho na chammal kam na tong ta, eshimal ning tha thanga tho utong ang aa.

Shkewa rangtum sha kam tungkang o kap aa

13Shkewa Abraham nia uphi aa lí tang ma thaji mingkang sha kot pha náng ta rangtum ta tho, eshi rangtum sha thong tungkang o ang moq angta, etharin esha ukam tungkang o piq asing miq ta shing tungkang o angta. 14Thong tattey tang sha hun Shkewa rangtum sha kap ajo kam sha chamtho raaq ahung etho rangtum sha thang hung. 15Thong eq Shkewa ajong tinqhat sha takhong aa. Etharin barina thong ahung eshina thong sha udan eq ma tho ahung.

16Eshirangma rangtum sha ukam tungkang o kap aa, irimal ang eq esha ráng manchan o cham ang aa. Esha hiqtang thaji uphi aa lí tang eq kap i, thong tattey tang ma chen ang moq, etharin Abraham mal ukamtey tang eq tho ukap eq aa. Piq sha hiqtang thaji wa. 17Asang likwit na thawit aa, “Nga nang sha daqhan phan ajat wa ta shing taphang.” Eshirangma Shkewa jakho na, bara piq aa kam ta, piq sha hiqtang wa. Shkewa utiktey miqtang ma rollung kot aa etho takhi moq phan tangwang wang anal tangwang tang thalat ma kot aa. 18Piq aa tungmang ching chamtho ahung ang eq tho tungmang shing eq kam ta etho eshirangma piq daqhan phan ajat wa angta. Asang likwit na bat aa thimal bat aa, “Ba phi aa lí tang sha taseyti tang mal daqhan angna.” 19Piq pangshashey mal angta, piq hanphung utik koko mal etho Sarah no jin hol moqtey mal sey angta tho ukam na anung ang moq angta. 20Irimal ang eq tho piq sha kam moqtey mal ang hunga Shkewa rangtum sha nàn moq angta, etho kam na aching ang eq Shkewa tha phun amun ta. 21Shkewa bari raaq raa rangtum ta, esha tahom rangma piq ma tarong atha ta Abraham aa usam eq ta. 22Eshirangma ukam tungkang o, “Piq sha asing miq ta wet ta.” 23Etho iri raaq raa, “Piq sha asing miq ta wet ta” piq rangma chen wit moq angta. 24Esha hiqtang ma tho uwit eq ta, barey kam tungkang o asing miq ta wet na etho hiqtang Teyhungwa Jesu tha utik wang thaluntey ma kam ching. 25Piq tha hiqtang ngarey rangma tatik wat ma kot ta etho hiqtang asing miq ta shing rangma tho rollung na wey thajey ta.

Currently Selected:

Romans 4: Mmmm

Highlight

Copy