Mark 7

Tey aa wa tang tatal

(Matthew 15:1–9)

1Jerusalem wang chamtey Phorisi tang etho thong tataltey tang Jesu relnáng thuta. 2Etho Jesu jiphantey tang aa ning thong aa ley thimal phaksat tok tho jak khol moq angta tha ning aa khita.

3Chammatakoi tey aa wa tang thong aa ley thimal jak khol hunga Phorisi tang etho adak Jehudi tang aa chamtho phaksat phaksa moq angta. 4Tangwang sangching wang thok som jio thong aa ley thimal khol eq ethi jio hun phaksat ching; etho ning ma daqhan thong adak dak angta; kok, khap, khowan etho jibching khol ching.

5Ethi rangma Phorisi tang etho thong tataltey tang aa Jesu ma pitta, “Ba jiphantey tang aa chamma í tey aa wa tang thong aa ley phan moq ang eq jak khol hun aa phaksat phaksa aa?”

6Jesu aa ning thima batta, “Nim takhi eq somtey tang! Asing wang hun nim raa Isaiah rangsamal aa witta:

‘Iri miqtang rey nung wang hun nga raa rangka phang,

Etharin ning aa tinmong irel wang rapney alo halna.

7 Ning aa nga thang hung na shumnuk phang,

chammatakoi ning aa miqtang thong sha i thong ta bat eq tatal kot aa.’”

8 Nim aa Shkewa kot aa thong tang sha shingchak eq miqtang thong aa ley sha tat inn.

9Ethi jio Jesu aa batta, “Nim aa nim thong aa ley tha phan ma Shkewa thong sha ràa moq ta shingchak aa. 10Raaq tathak, Moses aa batta, ‘Nim nu nia wa sha rangka ching’ etho ‘Utang eq tho nu ni wa shima manthun kot ajo piq sha tatik eq chak ching.’ 11Etharin nim aa tatal inn, utang eq unu nia wa shima bat aa, ‘Nga nim ni ma bara kot ching sha nga Shkewa ma sey kotáng’. Irimal bat inn ajo 12piq aa unu nia wa shima jaksom nong ching ang moq. 13Irimal ang eq nim thong rangma nim aa Shkewa raaq sha shingchak inn. Nim aa irimal adak dak thong aa ley tang hun inn.”

Miqtang thanaan saan raaq

(Matthew 15:10–20)

14Etho Jesu aa miq waan tang tha urel náng hal eq batta, “Nim thaji aa iraaq ri tat inn etho sam inn. 15Hangwang umong náng wang phan shey miq sha thanaan moq. Eshimal ang moq ang eq, umong wang chamlang thalat aa ethi wang hun miq sha thanan aa. 16Utang ma naq atha, tat inn!” #7:16 Chamtey Greek likdap tang na verse 16 ahung.

17Etho Jesu aa miqtang tha shingchak eq himnáng thuta tho ujiphantey tang aa piq ma ethi raaq tha lak eq bat kot rangma batta. 18Jesu aa ning thima batta, “Nim atho sam min i? Hangwang umong náng wang phan shey miq sha thanaan moq ta nim aa sam min i? 19Chammatakoi ira miq tin náng wang moq, etharin, piq wok mong náng wang aa etho wok wang hangnáng thalat chuwang aa.” Iri raaq ri wang Jesu aa miq thaji eq phaksat jin phaksat eq aa ta tatal kota.

20Ethi jio piq aa batta, “Miq tinmong wang chamlang thalat aa irey hun piq sha thanaan aa. 21Chammatakoi miq tinmong wang jashit tinthin, sathuk, hut hut, tatik tinthin, 22sathuk mal jashit jaksom, adak miqtang wang som ma tinthin, jashit tinthin, ethi náng eq tho chamtan jashit jaksom, alik akuk, hutdip, miik aa tashit siin, thajobat, tharangka, etho sathuk jaksom lot tang thu aa. 23Iri thaji jashit jaksom raa miq tinmong wang thu eq piq sha thanaan chak aa.”

Miqnu ashey kam

(Matthew 15:21–28)

24Ethi jio, Jesu eshiwang thalat eq Tyre ta ashey samhaq kingkang náng kata. Piq ashey himmong thináng nop ta etho utang jamoq tho tachong ma nuk moq angta, etharin piq shu shu eq jin tong moq sey angta. 25Ethina ashey miqnu angta, bari miqnu sa tha anaan tsija wang eq lota, etho ethi miqnu aa Jesu ethi náng thuta ta samta, etho piq jol eq Jesu jaa rel thináng thok bonta. 26Ethi miqnu tha Gentile phang aa jat angta, etho piq Syria mung wang Phoenicia samhaq na changta. Etho piq sa miqnu sa haanmong wang tong aa thangwa tha phan ma piq aa Jesu ma rapney tintashit eq batta. 27Etharin Jesu aa batta, “Jakho nijangsa tang wok sha taphut ching. Nijangsa tang phaksat sha som eq hi tang ma bichak kot sha qhal moq.”

28Ethi miqnu they batta, “Teyhungwa, nang aa qhakla bat u, etharin nijangsa tang eq phak eq tapha aa sha hi tang eq tho jin phak eq aa.”

29Jesu aa piq ma batta, “Nang aa irimal raaq bat tungkang o nang himnáng wang u, etho basa haanmong wang thangwa tha thalat chuwang sey angta.”

30Piq aa himnáng ka eq khi atho usa jibching na wolchey ta etho thangwa tha usa haan wang thalat chuwang ta.

Jesu aa naqbang etho angong tha taqhal aa

31Ethi jio, Jesu Tyre haq tha shingchak eq, Sidon mung wang ang eq Galilee shitim kowang etho Decapolis mung thináng kata. 32Chamtey tey miqtang Jesu relnáng ashey naqbang nia angong miq tha thok solta, etho Jesu ujak shing eq taqhal ma ning aa Jesu ma batta. 33Jesu aa ethi miq tha thaji miqtang wang adak eq, piq chen solkat ta, etho piq jaksi tang wang piq naq thani tha rikta, etho thuk eq piq phali tho lota. 34Etho Jesu aa mungtan konáng siin eq, rapney juchan wang eq tak humta, etho ethi miq ko thináng siin eq batta, “Ephphatha” ta, “thalak u!”

35Takshey lam o ethi miq naq tha thalakta etho piq phali tha uqham sey angta etho piq jaqhal eq sey raaq ta. 36Jesu aa ethina tongtey thaji miqtang thima batta, “Utang ma tho chamtho nak bat inn.” Etharin chamtan Jesu aa irimal batta, miqtang aa iri náng ahan eq iri tung araaq raa batta. 37Etho utang eq piq tung aa raaq tatta, thaji patja angta. Ning aa bat chey ta, “Piq aa chamtan jaqhal wang thaji jaksom somlo aa! Naqbang tang thima tho piq aa utat eq ma kot aa, etho angong tang thima tho may raaq sey angma kot aa!”

Currently Selected:

Mark 7: Mmmm

Highlight

Copy