Mark 6

Nazareth miqtang aa Jesu tha shingchak aa

(Matthew 13:53–58; Luke 4:16–30)

1Jesu ethiwang thalat eq ujiphantey tang tha sol eq usamhaq thináng wey wel ta. 2Sabbath saal tho, piq aa Synagogue náng ka eq tatal kota. Daqhan miqtang ethina angta etho ning atho piq raaq tha tat eq rapney rong patja ta. Ning aa pitta, “Piq aa iri tang tatal ri bari wang kap aa? Piq ma chamlang thunglam kot aa? Piq aa patja jaksom chamal eq som aa? 3Piq sha bang huntey ang moq i? Piq Mary sa miqwasa ang moq i? James, Joseph, Judas etho Simon ning shi piq pho ang moq i? Piq no miqnu tang tho irina hiqtang jamna tong moq i?” Etho ning aa piq tha shingchak ta.

4Jesu aa ning thima batta, “Ashey rangsamal shey uhim, uphan ajat tang etho usamhaq sha dak chak eq adak thaji haqna rangka kap aa.”

5Ning aa kam moq tungkang o piq aa ethina ahan patja jaksomlot jinsom lot moq angta, etharin piq aa chamtey tey miqtang atakasa tang tho jak shing eq piq aa jin taqhal eq ta. 6Ning aa kam moq tungkang o piq sha patja angta.

Jesu aa ujiphantey wasi wani takat aa

(Matthew 10:5–15; Luke 9:1–6)

Ethi jio Jesu aa tatal eq arel qhim tang náng lingqhing ta. 7Etho ujiphantey wa asi wani tha hal eq, ani ani tal eq adak adak haq náng takat ta. Ning thima piq aa anaan tsija tang phan ma tarong kota. 8Etho ning thima batta, “Ukat tok o ashey uthin eq ching kantha shing eq adak chamtho nak som inn; phaksat eq ma nak som inn, thongkhak nak hol inn, ngin tho nak som inn. 9Jaakhong nak inn etho adak samqhong nak rap som inn.” 10Etho piq aa ethináng eq tho wey bat eq ta, “Bari himtey eq nim sha thawan phin jo, eshi haq sha shingchak wey min ling, nim eshi him sho hun tong inn. 11Etho chamtey tey haq wang miqtang shey nim sha thawan moq ang ajo etho nim tung aa raaq sha tat moq ang ajo, nim jaa wang buk shi thal nak shing eq ethiwang thalat chuwang inn. Esha ning ma uthun raaq angna!”

12Eshirangma ning tha ka eq miqtang thima tin kaley inn ta phanchan ta. 13Ning they daqhan thangwa tang tha phanta, etho ahan atakasa miqtang thima naman jik ko eq taqhal ta.

John jungthalamtey wa tik

(Matthew 14:1–12; Luke 9:7–9)

14Etho lungwang Herod aa Jesu tung aa raaq tat ta chammatakoi thaji miqtang aa Jesu miing tha usam eq ta. Chamtey miqtang eq batta, “Jung thalamtey wa John weyjey angta! Ethi rangma piq aa daqhan patja jaksom kap somlo aa.”

15Chamtey eq batta, “Piq raa Elijah.”

Chamtey eq batta, “Piq aking rangsamal tang mal ashey rangsamal.”

16Etho Herod aa ethitang tha tat atho, piq aa batta, “Nga John kho tha tathaduk eq tatik chak táng, piq tha weyjey ta!” 17Herod aa jakho tok o John tha thalo ta, etho qhak eq chuk náng sakma raaqkhat kota. Herod aa iritang raa upho Philip himteynu Herodias rangma somta; Herodias tha Herod aa kapta. 18Etho John jung thalamtey wa they Herod ma bat chey roq eq ta, “Ba pho himteynu sha nang aa kap ma hiqtang thong na khakla ang moq!”

19Ethirangma Herodias aa John jung thalamtey wa thima jashit kapta etho piq aa tatik eq chakma tathin ta, etharin Herod rangma jin som moq angta. 20Herod tha John jung thalamtey wa thima ucho angta chammatakoi piq raa miq qhal nia asang miq ta Herod aa usam eq ta; ethirangma piq aa John sha homta. Piq aa John jung thalamtey wa raaq tha utat eq ma unuk angta etharin baluk o tho uraaq tat jio Herod tin na daqhan tinthin qhongta.

21Etharin tak daqhan sey ban jio, takshey Herodias ashey lam kapta. Baluk o Herod chang saal angta, piq aa ajong miqtang etho ralkoltey tang solwa tang etho Galilee mung wang solwa tang thima taphaksa ta. 22Ethi kut aa kan tho, Herodias sa miqnu rapney jaqhal eq thaji miqtang jakho o ninta, esha siin eq lungwang Herod etho kut aa kan na tongtey thaji miqtang rapney sungrang ta. Ethirangma Herod aa miqnu sa thima batta, “Nang chamlang ma nuk u? Nang aa chamlang chu phu jo tho, nga nang ma ukot eq phanáng!” 23Herod aa rangtum eq piq thima batta, “Nga asing wang hun batphang; nang aa chamlang chu phu tha nga nang ma ukot eq phang, imung tángko sha chu phu jo tho nga ukot eq phanáng!”

24Ethi miqnu sa tha ka eq unu thima pitta, “Nga chamlang chu ang?”

Unu aa batta, “John jung thalamtey wa kho shi chu u.”

25Etho kalo hun miqnu sa tha lungwang relnáng ka eq batta, “Nang aa nga ma thanga etho irina John jung thalamtey wa kho shi ashey khung o shing eq som kat phu!”

26Esha tat eq lungwang tin rapney shita, etharin piq aa thaji miqtang jakho o rangtum tungkang o piq aa jin táng moq sey angta. 27Kalo hun piq aa ashey ralkolteywa thima John jung thalamtey wa kho tha som kat ma batta. Ethi ralkoltey wa tha chuk mong náng ka eq John kho tha thaduk chakta; 28Etho ashey khung o kho tha shing eq ethi miqnu sa thima kota etho piq ka eq unu thima kota. 29Etho John jiphantey tang aa raaq kap tat ta tho, ning thu eq umàng tha som eq màng bungching o bungta.

Jesu aa hayat banga miqtang ma taphaksa aa

(Matthew 14:13–21; Luke 9:10–17; John 6:1–14)

30Etho apostle tang wel eq Jesu jamnáng thu eq ning aa chamlang somta tha etho chamta tat ta tha thaji bat kota. 31Jesu jamna daqhan miqtang awang aka angta, esha ang atho Jesu nia ujiphantey tang ma phaksat phaksa ma rangham kap moq angta. Ethi rangma piq aa ning thima batta, “Kaa phin, hiqtang ka eq shushu haq o nángtong ang ka i.” 32Etho piq nia ujiphantey tang ashey waqwan o tun tong eq miq tong moq ashey haq thináng kata.

33Etharin daqhan miqtang aa ning ka atha khi eq ning banáng ka aa tha samta; Jesu nia ujiphantey tang ethi haq thináng thuwey moq jakho thaji samhaq tang wang miqtang ethi haq thináng jaa o qhing eq thuta etho Jesu rangma banta. 34Etho Jesu waqwan wang thalat atho ethina ban aa miqtang tha khita etho piq rapney tinshitta chammatakoi ning kelwut rimtey ahung kelwut tang mal angta. Etho piq aa ahan raaq phang tatalta. 35Batchey eq ethina rapney karelta, etho ujiphantey tang thu eq piq thima batta, “Ira shu shu haq etho thanga rapney sey karel i. 36Thaji miqtang ma takat ma kot inn, etho ning arel qhim nia samhaq tang konáng ka eq phaksat cham ri aa.”

37Jesu aa batta, “Nim aa hun ning ma chamli phaksat ma kot inn.”

Ning aa pitta, “Ning ma taphasat rangma hiqtang aa shani hun aa cha ngin sa thawan eq ma nang aa tathin u i?”

38Etho Jesu aa ning thima pitta, “Nim jakna chamtan banlo aa? Ka eq siin inn.”

Ning ka eq siin eq piq thima batta, “Banga banlo etho ngaqsa ani.”

39Etho Jesu aa ujiphantey tang thima raaqkhat kota, “Miqtang ri phal eq uwaan eq naamthing kho o tatong inn.” 40Thaji miqtang tha rokbanga rokbanga ang eq etho sharo ang eq taphal eq tong ta. 41Etho Jesu aa lo banga banlo etho ngaqsa ani som eq rangko náng siin eq Shkewa ma kechu ajong kota. Piq aa ethi banlo tha pin eq miqtang ma phal kot rangma ujiphantey tang thima kota. Piq aa ethi ngaqsa tha tho pin eq thaji miqtang ma phal kotma kota. 42Thaji miqtang aa wok taphutla phaksat ta. 43Ethi jio ujiphantey tang aa udak sey ang aa banlo etho ngaqsa tang tha thajoq eq asi ani qhong o tashey shingta. 44Ethi tang tha hayat banga miqwa phaksat tey angta.

Jesu jungkho o qhing aa

(Matthew 14:22–33; John 6:15–21)

45Kalo hun Jesu ujiphantey tang tha waqwan o tatong eq shitim adak kang kona Bethsaida ta miing aa ashey haq thináng piq náng eq jakho takatta, etho piq ethina tongtey miqtang tha ning himnáng takat eq banta. 46Miqtang takat jio piq haqkan ashey kho thináng romtam chuk ma kata. 47Etho rangnak ta, ethi waqwan tha shitim jaktungna angta, etho Jesu chen chen shitim kang na angta. 48Ujiphantey tang rapney tsamnang wang waqwan tha wey chey atha piq aa khita chammatakoi rangpong they tongnil konáng motta. Rangpal thun ma sey angta etho Jesu jungkho o qhing eq ning relnáng kata. Piq aa ning tha lit eq ka chey atho, 49ning aa piq tha jungkho o qhing aa tha khita! Ning cho eq rapney juchan aa ringta, “Ira jungban!” 50Ning aa piq tha khi eq rapney chota. Jesu aa kalo hun ning thima batta, “Tin thajong inn! Ira nga! Nak cho inn!”

51Etho Jesu waqwan náng ning jamoq tun qhungta etho rangpong tho uthun sey angta. Ujiphantey tang rapney patja ta. 52Chammatakoi Jesu aa hayat banga miqtang thima taphaksat ta asing raaq tha ning aa jin sam moq angta; ning tin tset angta.

Jesu aa Gennesaret na atakasa taqhal aa

(Matthew 14:34–36)

53Ning aa shitim tha jan eq Gennesaret ta miing aa ashey haq thináng kata, etho ning aa ethina waqwan tha bon shingta. 54Ning waqwan wang thalat atho, ethiwang miqtang aa Jesu tha takshey lam o samta. 55Ning thaji mung náng jol eq kata etho Jesu ethináng thuta ta samtey tang they thaji atakasa miqtang tha ràng o piq relnáng thok som ta. 56Etho Jesu qhim o tho, samhaq o tho ka ajo atakasa miqtang sha tangwang sangching katang na, urelnáng thoksolta etho ukhat bal o tatit ma kota; etho utang eq tatit ajo, ning thaji uqhal angta.

Currently Selected:

Mark 6: Mmmm

Highlight

Copy