Mark 2

Jesu aa jakmàng jaamàng washey taqhal aa

(Matthew 9:1–8; Luke 5:17–26)

1Saalshey ni jio, Jesu Capernaum náng wey wel ta, etho thaji miqtang they Jesu him náng thuta ta usam eq ta. 2Daqhan miqtang ethináng thu eq thajoq ta, ethirangma utong ang ma chaak moq angta etho kalung tho ushey sey angta. Jesu aa ning thima Shkewa raaq phan kota. 3Ethi kam tho wabali eq jakmàng jaamáng washey tha Jesu jamnáng thoksom ta. 4Etharin miq thawan tungkang o, ning aa ethi miq tha Jesu jamnáng jin som wan moq angta. Req ning aa himkho náng wang eq Jesu tong ta ethi katáng o himsip tha tapota. Ning aa himsip tha jin tapo jio, atak wa tha qham tho thajib eq qhak eq thajoq ta. 5Ning kam tha siin eq Jesu aa ethi jakmàng jaamàng wa thima batta, “Isa, ba ngarey tha utol sey ta.”

6Eshina tongtey thong tataltey tang wang chamtey tey tang they ning tin o tathin ta, 7“Piq aa chamal eq irimal raaq jin bat aa? Piq aa Shkewa junnam aa! Shkewa chen ngarey sha jin tol aa!”

8Ning aa chamlang tathin aa tha Jesu aa kalo samta, ethirangma piq aa ning ma batta, “Nim aa irimal chamma tathin inn? 9Iri jakmàng jaamàng wa rima chamlang ta bat raa achol? ‘Ba ngarey tolchak sey ta’ ta bat na tia ‘Tunshat u, ba qham tunsom eq qhing u’ ta bat na. 10Etharin Miqna Sa ma tho iri mingkang na ngarey raa tolchak ma authority atha ta nga nim ma takhi eq phanáng.” Req piq aa jakmàng jaamàng wa thima batta, 11“Nga nang ma batphang, tunshat u, ba qham ri tunsom eq himnáng ka u!”

12Thaji miq they siin chey ta tho, ethi miq tha tunshat eq uqham tunsom eq ethiwang qhing chuwang ta. Etharin siin eq thaji miqtang patja eq Shkewa tha tasapsey eq raaq ta, “Í aa irimal baluk o tho khi wey mi!”

Jesu aa Levi hal aa

(Matthew 9:9–13; Luke 5:27–32)

13Jesu Galilee shitim kang náng wey wel ta. Miq wan tang tha piq jamnáng thuta, etho ning ma piq aa phang tatal ta. 14Ethi wang ukat ang chey rangham tho, piq aa ashey phuntha qheytey, Alphaeus sa Levi tha ujaksom him na tong chey aa tha khita. Jesu aa piq ma batta, “I jiphan phu!” Levi tha tunshat eq uji tha phanta.

15Jesu aa Levi him na tilsa chey atho daqhan phunta qheytey tang etho ngarey miqtang eq Jesu nia ujiphantey tang jamoq tong eq kashey o phaksat ta. 16Chamtey tey Phorisi tang etho thong tataltey tang eq, Jesu aa ngarey miqtang nia phunta qheytey tang jamoq phaksat phaksa aa tha khi eq ujiphantey tang thima pitta, “Piq aa chamma irimal miqtang jamoq phaksat aa?”

17Jesu aa ning raaq tha kap tat eq thawel batta, “Miq aqhal tey ma atakasa siintey sha ràa moq, etharin atak miqtang ma atakasa siintey sha ràa aa. Nga asang miqtang halma kaphamong ang ta phang, etharin ngarey miqtang halma katat ta phang.”

Wokcham tong pitpi raaq

(Matthew 9:14–17; Luke 5:33–39)

18Jukshey John jungthalamtey jiphantey tang etho Phorisi tang wokcham tong chey ta. Chamtey miqtang Jesu relnáng thu eq pitta, “John jungthalamtey aa ujiphantey tang etho Phorisi jiphantey tang wokcham tong aa, etharin ba jiphantey tang ri wokcham tong moq chama ang aa?”

19Jesu aa thawel batta, “Thariktey wa sha rungsat tey tang jamna atha ang ajo ning wokcham utong ang aa i? Baluk otho tong moq! Thariktey wa ning jamna atha ling ning wokcham tong moq angna. 20Etharin thariktey wa sha ning jam wang sol chuwan saal uthok angna, ethi rangham tho ning wokcham tong na.”

21 “Utang eq tho anal khat sha aking khat o dapphin moq, chammatakoi anal khat sha tachu eq mingtik angna etho irimal ang ajo, aking khat tang sha taching eq jakho wang po ta pheynáng eq ajong pona. 22Etho utang eq tho aking sutichi shingching saan o anal sutichi sha sakshing moq. Irimal ang ajo sutichi shing aa saan sha potik angna etho sutichi shingching saan nia sutichi ningni sha shittik angna. Etharin anal sutichi sha anal sutichi shingching saan o hun sak shingching.”

Sabbath saal raaq pitpi

(Matthew 12:1–8; Luke 6:1–5)

23Sabbath saal o Jesu pik lam na qhing chey ta. Ukat ang chey kam tho, ujiphantey tang aa pungwong nam tha tuk somta. 24Ethi rangma, Phorisi tang aa Jesu ma batta, “Siin u, ba jiphantey tang aa bara som ta raa Sabbath saal o som ching ang moq! Ira hiqtang thong na qhal moq.”

25Jesu aa ning ma thawel batta, “Nim aa Asang likwit na phat min ang tin i, David nia miqtang chamlal tita etho ning ma phaksat ràa aa atho, David aa chamlang somlo ta? 26Piq aa Shkewa him náng nop eq Shkewa ma ko aa banlo tha phakta. Ira Abiathar ajong tingwa ang tok tho angta. Hiqtang thong na irimal banlo raa tingwa tang aa hun jin phaksa aa; etharin iri banlo raa David aa uphak eq ta etho umiq tang ma tho ukot eq ta.”

27Etho raaq tathun ma Jesu aa batta, “Sabbath saal raa miqtang rangma hunta; miqtang raa Sabbath saal rangma hun moq angta. 28Iri rangma Miqna Sa Sabbath saal ma tho Teyhungwa.”

Currently Selected:

Mark 2: Mmmm

Highlight

Copy