Mark 12

Suti pikna jakngiktey miqtang raaqshiton

(Matthew 21:33–46; Luke 20:9–19)

1Etho ning thima Jesu aa raaqshiton phang batta. “Takshey, ashey miq eq upikna suti bang kheyta; ethi pik tho thaji tha jaqhal wang pal ta, etho suti tha nakma haqbung thut ta etho ashey banban him hunta. Ethi jio, jakngiktey miqtang tha ethina tatong eq piq adak mung náng kata. 2Etho sutichi thajoq tok sey thu atho, piq phal tha som rangma piq sanga tha takat ta. 3Etharin jakngiktey miqtang they ethi sanga tha lo eq wat ta etho chamtho kot hunga thawel chakta. 4Ethi jio, ethi miq they adak sanga tha wey takat ta; jakngiktey miqtang they piq tha ukho o wat ta etho rapney tharak ri eq thawel ta. 5Ethi tangteywa they adak sanga wey takat ta etho jakngiktey miqtang they ethi sanga tha tatik chak ta; ethi mal hun ethi tangteywa adak dak sanga tang sha takat aa, etho jakngiktey miqtang they chamtey sha uwat eq na etho chamtey tey sha tatik chak na. 6Thanga ashey dang sey dakta, bara utinmat miqwasa angta; uthun ma piq aa usa tha ning relnáng irimal bat eq takatta, ‘Ning aa isa miqwasa raa rangka eq na.’ 7Etharin ethi jakngiktey miqtang they batta, ‘Ira tangteywa sa. Kaphin, piq raa tatik chak ching, etho iri pik raa hiqtang rang sey angna.’ 8Ethirangma ning aa piq tha lo eq tatik chak ta etho sutichi pik hàng thináng bichak ta.”

9Jesu aa pitta, “Nim aa chamlang tathin inn, ethi sutichi pik tangteywa they thanga chamlang sey na? Piq thu eq ethi jakngiktey thaji miqtang sha tatik chak na etho suti pik sha adak jakngiktey miqtang ma kotna. 10Asang likwit na chamlang ta witta thi nim aa phat min ang tin i?

‘Bari long raa chamtho ang moq ta him huntey tang aa bichak ta,

ethi long tha hun thaji pheynáng eq akhek long ma wey angta.

11 Teyhungwa hun irimal som kota,

etho usiin eq ma rapney patja ching!’”

12Jehudi solwa tang aa Jesu tha tatik ma nuk ta chammatakoi ning aa sam eq ta, iri raaqshiton raa Jesu aa ning rangma bat aa. Etharin miqtang thima ning ucho angta, rey ning aa piq tha shingchak eq ethiwang qhing chuwang ta.

Phunta ukot eq chingti kotching ang moq aa

(Matthew 22:15–22; Luke 20:20–26)

13Jesu raaq pit eq thaman ma chamtey tey Phorisi tang etho Herod miqtang takat ta. 14Ning piq jamnáng thu eq batta, “Tataltey wa, nang aa asing bat u ta í aa usam eq i. Miqtang aa jashit kap ajo tho etho jaqhal kap ajo tho, nang aa chamlang asing ira hun bat u. Nang aa Shkewa asing lam wang hun tatal u. Í ma batphu, í thong wang Rome ajong lungwang ma í aa phunta kotma khakla ang moq tia ang aa? Í aa kot eq chingti kotching ang moq aa?”

15Etharin Jesu aa ning aso alat tha sam eq batta, “Nim aa chamma nga raa thamat ma tathin phin? Nga ma ashey Rome nginti takhima kotphin.”

16Ning aa piq ma ashey Rome nginti takhima kota, etho piq aa siin eq batta, “Iri na utang sham nia miing aa?”

Ning aa batta, “Rome Ajong Lungwang.”

17Etho Jesu aa batta, “Etha o Rome Ajong lungwang ràng chamlang aa, lungwang ma kot inn etho Shkewa ràng chamlang aa, Shkewa ma kot inn.”

Etho esha tat eq ning rapney patja ta.

Ti eq wey jey tung aa raaq

(Matthew 22:23–33; Luke 20:27–40)

18Saddusi tang eq miq utik ang aa sha weyjey moq ta hanta. Ning wang chamtey miqtang Jesu jamnáng thu eq batta, 19“Tatalteywa, Moses aa í ma ka eq irimal thong kota phi, ‘Ashey miq tharik eq, sa ang wey moq jakho piq utik angta ta ang ajo, piq no aa eshi miqnu sha ri eq sa takhi ma kot aa etho iri sa raa ethi utik angta miq ethi sa ta miing na.’ 20Takshey wasanat sapho angta; thaji phey wang phokho tharik angta etharin sa hung aa piq utik angta. 21Etho adak uno they ethi miqnu tha wey rita etharin piq tho sa ahung aa tita. Noji tha tho ethi mal hun angta. 22Ethimal hun thaji sapho tang tha angta; sapho wasanat aa ethi miqnu tha rita, etharin sa hung aa sapho wasanat tha tita. Thaji jio ethi miqnu tha tho utik angta. 23Thanga, ti eq wey jey saal tho, piq utang himteynu ta angna? Chammatakoi wa sanat sapho jamoq piq tha tharik thang chol sey.”

24Jesu aa ning thima batta, “Nim aa Asang likwit nia Shkewa tarong sha sam min rangma nim tinthin sha rapney jashit! 25Utik angtey miq sha wey jey ang ajo, tharik moq angna etho tharik ma kot moq angna; ning mungtan na rangkamwa mal angna. 26Etho ti eq wey jey tung aa raaq sha irimal: Moses likdap na jatbang tung aa raaq kap phat min ang tin i? Ethina taka aa, Shkewa Moses ma batta, ‘Nga Abraham Shkewa, Isaac Shkewa, etho Jacob Shkewa!’ 27Piq atharang miqtang Shkewa, utiktey miqtang ma ang moq. Nim tinthin sha rapney jashit!”

Thaji pheynáng eq ajong raaqkhat

(Matthew 22:34–40; Luke 10:25–28)

28Ethina, thong tataltey wa tang jaktung wang ashey eq iri raaq tang raa tatchey ta. Jesu aa Saddusi tangma jaqhal raaq batta tha piq aa khita, etho piq Jesu relnáng ka eq pitta, “Thaji thong jaktung wang bari raaqkhat raa thaji phey wang eq ajong aa?”

29Jesu aa batta, “Thaji wang ajong raaqkhat ira, Israel tang tat inn! Ba Shkewa Teyhungwa hun ashey dang. 30Ba Shkewa Teyhungwa ma ba tinmong wang, ba tsija wang, ba khoti wang etho thaji tarong wang tinmat u. 31Adak thong bara thaji wang ajong ira, ‘Nang ni nang ma chamal tinmat u ba himreltey miqtang ma tho irimal hun tinmat u.’ Adak raaqkhat tang wang iri ani raaqkhat raa hun ajong.”

32Iri thong tataltey wa batta, “Tataltey wa, ning aa khakla batphu! Nang aa bat u tung aa raaq raa asing hun, Shkewa raa ashey dang hun etho piq raa dak chak eq adak Shkewa ahung. 33Etho ashey miq eq piq thaji tinmong wang, khoti wang, etho tarong wang Shkewa ma tinmat ching; etho nang ni nang ma chamal tinmat u thimal ba himreltey miqtang ma tho irimal tinmat ching. Jatngam duk eq Shkewa ma kot náng eq etho pinthong kot náng eq, iri ani raaqkhat raa tat eq tong ajo aqhal.”

34Piq aa jaqhal eq thawel bat aa tha siin eq Jesu aa piq ma batta, “Nang Shkewa mungtan wang rapney alo na ang mu!”

Ethi jio tho utang atho Jesu ma raaq ashey tho pit moq angta.

Khristo utang miqwasa

(Matthew 22:41–46; Luke 20:41–44)

35Jesu rangnuk him himthal na tatal chey atho, piq aa pitta, “Thong tataltey tang aa chamlang ta tathin eq bat aa, Khristo David miqwasa ang na? 36Asang Tsija wang David ma tharaaq ma kota:

‘Teyhungwa eq i Teyhungwa ma batta,

Nga ba ralwa tang sha ba jaakhung o shing wey moq nángduk

nang ijakqha kona tong nu.’”

37 “David aa hun piq tha Teyhungwa ta hal ajo Khristo sha chamal eq David phi aa lí wang angna?”

Thong tataltey wa tang wang rangtatun aa

(Matthew 23:1–36; Luke 20:45–47)

Daqhan miqtang Jesu raaq tha tat eq sungrang angta. 38Jesu aa ning ma tatal kot kam tho, ira tho ubat eq ta, “Thong tataltey wa tang wang rangtun eq tong inn. Ning rapney jaqhal alo khat sam eq tangwang sangching na, thaji miqtang aa cham rangka phita lingqhing aa. 39Ning synagogue tang na thaji miqtang jakho o tong ma etho kut aa kan na thaji pheynang eq jaqhal tongching o tong ma nuk aa. 40Ning aa notinu him tang sha tashit chak aa, etho takhi ma rapney alo lo hal romtam chu kot aa. Ning sha thaji pheywang eq jashit tsamnang na!”

Ashey notinu aa chamlang kot aa

(Luke 21:1–4)

41Jesu rangnuk him ngin shingching khok relna tong atho, miqtang thu eq ngin sak atha khita. Tanglom miqtang thu eq ethina daqhan qhan ngin sakta. 42Ethi ji tho, ashey tangshit notinu thu eq nginti ani sakta. 43Jesu aa ujiphantey tang tha hal eq batta, “Nga nim ma asing batphang, thaji miqtang wang iri tangshit notinu rey hun thaji phey wang ngin ahan sakta. 44Thaji miqtang aa ning lik aa ngin wang sak aa, etharin iri notinu raa itan tangshit ang eq tho, piq ma bara ulun ang ching tha kochak ta.”

Currently Selected:

Mark 12: Mmmm

Highlight

Copy