Mark 1

John jung thalamtey phanchan

(Matthew 3:1–12; Luke 3:1–18; John 1:19–28)

1Ira Shkewa Miqwasa Jesu Khristo tungtang qhal. 2Rangsamal Isaiah chamlang witta, ethi wang iri thaji raa phang angta,

“Ba lam sha tasang rangma

ba jakho o ithoksil tattey sha nga takat phanáng.

3‘Shushu haqna chamtey tey ring aa,

Teyhungwa ma lam kacha inn,

etho piq qhing ma lam shi tachal shing inn!’”

4Ethi rangma John shushu haq náng thu eq jungthalam ta etho miqtang ma Shkewa raaq phanchan kota. Piq aa miqtang ma batta, “Ngarey wang wel inn etho junglam inn, etho Shkewa nim ngarey sha tolchak na.” 5John raaq tatma thaji Judea mung wang etho Jerusalem samhaq wang miqtang thuta. Ning ngarey tha wungbat ta etho John aa ning ma Jordan jungku o jungthalam kota.

6John aa utt haankhup wang hunta khat sha nángta etho ashey ngamkhup khingkit sha piq aa khing o kitta, etho piq aa kokchikrik nia naqti ling phaksat eq tong ta. 7Piq aa miqtang ma phanchan kota, “I jio ashey miq kapha na, piq i phey náng eq tho rapney ajong. Nga bon eq ujaaqhong ru qhangkot rol tho ang mong. 8Nga nim ma jung wang jungthalam phang, etharin piq aa nim ma Asang Tsija wang jungthalam phanin.”

Jesu junglam nia tari

(Matthew 3:13—4:11; Luke 3:21–22; 4:1–13)

9Ethi tok tho, Jesu aa Nazareth wang Galilee mung náng thu eq Jordan jungku o John wang jungthalam ta. 10Jesu jung wang thalat kam tho, piq aa mungtan sha thalak aa tha khita etho wotopin mal ang eq Tsija uhanphung náng kapha tha khita. 11Etho mungtan wang ashey raaq kap tat ta, “Nang raa itinmat i Miqwasa. Nang ma nga rapney sungrang ang.”

12Kalo ethiwang Tsija they piq tha shushu haq náng solkat ta. 13Etho eshina piq saal rokbali tong ta, etho Thangwa eq piq tha tari ta. Ethina jatngam tang tho atha angta, etho rangkamwa tang ka eq piq tha rimrang ta.

Jesu aa wabali ngaqsa lottey tha hal aa

(Matthew 4:12–22; Luke 4:14–15; 5:1–11)

14John tha chuk náng solkat jio, Jesu Galilee náng ka eq Shkewa tungtang aqhal tha phanchan ta. 15Piq aa batta, “Rangham tha uthok sey angta pha, etho Shkewa mungtan rapney arel halna sey! Ngarey wang wel inn etho tungtang aqhal raaq ri kam inn!”

16Galilee shitim kang na kachey atho Jesu aa Simon nia uno Andrew tha khita; ningni tha ngaqasa lottey angta etho ning ni aa chak halchey ta. 17Jesu aa ning ni ma batta, “Nim ni ijamnáng ka shin phin, etho nga nim ni ma miq lot ma tatal kot phang náng.” 18Kalo ning ni aa chak tha shingchak eq Jesu ji phanta.

19Anitom jakho náng ka eq piq aa sapho wani tha khita, ningni tha Zebedee sa James nia John angta. Ning ni tha waqwan na tong eq chak tha taqhal chey ta. 20Jesu aa ningni tha khi eq kalo halta; etho ningni aa uwa Zebedee tha adak nginma langtey miqtang jamoq waqwan na shingchak eq Jesu ji phanta.

Anaan Tsija noptey ashey miq

(Luke 4:31–37)

21Jesu nia ujiphantey tang Capernaum samhaq náng kata. Inap mal tha Sabbath saal angta etho Jesu Synagogue náng ka eq phang tatal ta. 22Miqtang eq uraaq tha tat eq rapney patja ta, chammatakoi piq aa thong tataltey tang mal bat moq angta; piq aa authority wang tatal eq batta.

23Synagogue na ashey miq hanphung na anaan tsija angta; ethi kam tho piq rapney jajong aa ring eq batta, 24“Nazareth wang Jesu, nang ma í ching wang chamlang ràa? Í raa tathun rangma thuta phu i? Nang utang aa ta nga usam eq phang; nang Shkewa Asang Miq!”

25Jesu aa ethi tsija thima mol eq batta, “Shu shu eq piq hanphung wang thalat chuwang u!”

26Anaan tsija eq ethi miq tha rapney jajong aa thamot eq, ring eq thalat chuwang ta. 27Ethina tongtey miqtang eq esha siin eq rapney patja eq ashey eq ashey ma rong batta, “Iri chamlang aa? Iri anal tatal i? Piq aa authority wang anaan tsija ma tho raaqkhat kot eq aa etho anaan tsija tang eq uraaqkhat utat eq aa!”

28Etho irimal wang kalo hun Galilee mungna thaji miqtang aa Jesu tung aa raaq tha sam ta.

Jesu aa daqhan atak miqtang tha taqhal aa

(Matthew 8:14–17; Luke 4:38–41)

29Ning aa Synagogue tha shingchak eq, ujiphantey tang James nia John jamoq, Simon nia Andrew him náng kata. 30Simon nicha tha kho mok eq jibching na wol chey ta; Jesu thu atho unicha takasa raaq tha piq ma bat kota. 31Jesu urel náng ka eq ujak eq piq tha tun tashat ta. Piq khomok tha uqhal sey angta etho piq aa ning thaji rangma phaksat limtik kota.

32Rangja sey ang atho, miqtang aa Jesu relnáng atakasa miqtang etho thangwa eq lo aa miqtang tha thoksol ta. 33Ethi samhaq wang thaji miqtang tha ethi him rel thina thajoq ta. 34Etho Jesu aa uphan phan atakasa wang tsamnang aa thaji miqtang tha taqhal ta etho thangwa eq lo aa thaji miqtang wang esha phanta. Thangwa tang tha uraaq angma komoq angta chammatakoi Jesu utang aa ta ning aa usam eq ta.

Jesu aa Galilee na phanchan aa

(Luke 4:42–44)

35Rangnapkha tho Jesu kalo shat eq ethi him wang thalat eq, samhaq phey wang ashey shu shu haq náng ka eq romtam chuta. 36Etharin Simon etho unokwa tang ka eq piq tha bita, 37etho piq tha kap chong atho, ning aa batta, “Thaji miqtang eq nang bi aa.”

38Etho Jesu aa ningni thima batta, “Hiqtang haq rel qhim náng tho ukat ang ching. Nga ka eq ning ma tho phanchan eq náng, chammatakoi iri rangma hun nga thuta phang.”

39Req piq thaji Galilee mung náng ka eq Synagogue tang na phanchan ta etho thangwa tang tha phan ta.

Jesu aa ashey angam apit takasa miq tha taqhal aa

(Matthew 8:1–4; Luke 5:12–16)

40Ashey angam apit taksa teywa Jesu relnáng ka eq, langku o tong eq tinthanin eq batta, “Nang unuk ang ujo, nang aa itak raa jin taqhal eq phanu.”

41Jesu aa piq thima rapney tinshit ta, etho ujak tha thalo eq piq tha thaklo eq batta, “Nga unuk ang, usang ang u!” 42Takshey lam o ethi miq angam apit tak tha uqhal sey angta etho usang sey angta. 43Ethi miq thima piq aa rangtatun eq kalo takat ta, 44“Tat u, iro chamlang angta utang ma tho nakbat u. Achal eq tingwa jamnáng ka u etho iri takasa ri uqhal angta sey tia angwey moq aa ta piq ma takhi u; nang usang sey angtu ta thaji miqtang ma takhi rangma Moses aa chamlang pinthong kotma batta, iritang thaji ri kot u.”

45Etharin ethi miq tha ka eq, piq chamal angta ta thaji miqtang ma bat kotchak ta. Piq aa daqhan raaq batta, eshi tungkang o Jesu ethi samhaq sho takhi eq jin thu moq sey angta. Req piq ka eq samhaq phey shu shu haqna tong ta etho thaji haq wang miqtang ethináng tho uthok rong angta.

Currently Selected:

Mark 1: Mmmm

Highlight

Copy