Matthew 11

John jungthalamtey thoksil tattey tang

(Luke 7:18–35)

1Jesu aa ujiphantey tang asi ani ma iri raaq tang raa bat jio, piq Galilee mung samhaq tang náng tatal kot nia phanchan kot ma kata.

2John jungthalam kottey eq chukna Khristo jaksom tung aa raaq tat atho, piq aa ujiphantey tang ma irimal pit ma takat ta, 3“Ukat Khristo sha nang raa i, tia, í aa miq dak ban i?”

4Jesu aa thawel batta, “Wey wel inn, nim aa chamlang tat inn etho chamlang khi inn shi John ma bat inn. 5Miikduk tang aa jin khi sey aa, jaakung tang jin qhing ang aa, angam tang usang sey ang aa, naqbang tang aa utat sey aa, tik chol miq wey jey ang aa, etho tangshi miqtang ma tungtang aqhal raaq tatat aa. 6Nga nàn phamong miqtang sha sunmaan.”

7John jiphantey tang qhing chuwang sey angta tho, Jesu aa miqtang thima John raaq pitta, “Shu shu haqna John jamoq tachong ma ka tin tho, nim aa chamlang siin ma ka tin? Rangpong wang langphung mochey atha siin ma ka tin i? 8Ira ang moq ang ajo, chamli siin ma nim thalat tin? Jaqhal khat samtey miqwa siin ma i? Irimal jaqhal khat samtey miqwa tang lungwang himna tong aa. 9Ira ang moq ang ajo, nim chamli ma thalat tin? Ashey rangsamal tha siin ma i? Inn! Nga batphang, nim aa rangsamal wang ajong miq khi tin. 10John raaq hun Asang likwit na taka aa: ‘Shkewa batta, nga ba lam sha thalak rangma, ba jakho o ithoksil tattey takat phanáng.’ 11Nga nim ma asing bat phang, John jung thalamtey wang ajong utang tho chang wey moq. Etharin Rangmuntan na thaji phey náng eq aming sha John wang ajong. 12John aa phanchan rangham wang thangnáng duk, Rangmungtan kachang chang aa jakho náng chalo aa etho thawat tey miqtang aa ira lot ma tathin aa. 13Chammatakoi thaji rangsamal tang etho Moses thong sha John rangham náng thula wan ta. 14Etho nim aa ning raaq han inn jo, nim aa ban inn rangsamal Elijah tha John raa hun. 15Utang ma naq atha, tat inn.”

16 “Thaney nap miqtang raa nga chamlang o tatut ang? Ning raa thangsang ching na tongtey nijangsa tang mal. Ning waan ashey sha adak waan ma ring aa.

17 ‘Í aa nim rangma photkalang tom ti,

etharin nim nin min ang tin.

Í aa nim rangma tin jungnáng sey ti,

etharin nim qhap min ang tin.’”

18 “John sha wokcham eq sutichi ling hung aa thuta etho nim aa piq ma thangwa atha ta raaq tin. 19Miqna Sa phaksat jungling eq thuta etho nim aa battin, ‘Iri miqwa ri siin inn! Piq raa wokshit etho khampang, piq sha phunta qheytey tang nia ngarey miqtang nokwa!’ Etharin Shkewa asam atol sha jaksom tungkang o asing ta takhi aa.”

Hanmoq samhaq tang

(Luke 10:13–15)

20Jesu aa bari samhaq tang na ahan patja jaksom som ta eshi samhaq tang wang miqtang they ngarey wang tin kaley moq angta. Eshirangma piq aa kha eq batta, 21“Chorazin samhaq, nim ma rapney tsamnang angna! Bethsaida samhaq, nim ma tho rapney tsamnang angna! Bara patja jaksom sha nim jaktung o somta, eshi patja sha Tyre nia Sidon samhaq na ang ajo, ning sha ning ngarey wang wey welta ta takhima, jakho wangduk jin kaley ang wangta, etho thola khat sam eq etho ning kho o botkhi won wangta! 22Etharin nga nim ma bat phang, Khaphung Saal o Tyre nia Sidon samhaq miqtang ma nim wang ahan manchan takhi na. 23Etho Capernaum samhaq, nim aa nim ni nim rangma mungtan náng thula aluk tathin shing inn i? Nim raa walmungtan náng sey bichak phanin! Bara patja jaksom sha nim jaktung o somta, eshi patja sha Sodom haq na takhi ta jo thanga tho atha ang wang ta. 24Etharin nga nim ma bat phang, Khaphung Saal o Shkewa eq Sodom samhaq miqtang ma rapney manchan takhi na.”

Ijam náng kaphu etho nángtong u

(Luke 10:21,22)

25Ethi rangham tho, Jesu aa batta, “Iwa, mungtan nia mingkang Teyhungwa, nga nang ma kechu ajong kophang chammatakoi nang aa iri tang thaji raa rapney samtey etho asam atol miqtang wang tapu eq nijangsa mal miqtang ma tasam ma kotu. 26Inn, Iwa, nang aa irimal angma hun nuk tu.

27 “Iwa nga ma phanrip kota phang. Iwa tha shing chak eq utang eq tho Usa sam moq. Utang ma Usa aa uwa takhi aa, ning aa Uwa sha sam aa. Ning nia Usa tha shingchak eq utang eq tho Uwa sha sam moq. 28Alik akuk hol eq nángtik tey thaji miqtang ijam náng kaphin. Nga nim ma nángtong ko phanáng. 29I kangko som eq ba sukkang o shing u etho iching wang taal u, chammatakoi itin sha anup nia tinmáng. Etho nim aa nángtong kap nin. 30Chammatakoi i kangko sha achol etho i tuk sha achang.”

Currently Selected:

Matthew 11: Mmmm

Highlight

Copy