Luke 4
4
Jesu tha tari aa
(Matthew 4:1–11; Mark 1:12,13)
1Jesu hanpin o Asang Tsija ang eq Jordan jungku wang sey welta etho Asang Tsija aa piq tha shushu haq náng solkat ta. 2Etho piq tha Thangwa aa saal rokbali tari ta. Ethi rangham tho piq phak hung sat hung aa tong ta, ethi jio piq chamlal sey qhongta.
3Thangwa aa piq thima batta, “Nang Shkewa Miqwasa ang ujo iri long ri banlo angma bat u.”
4Etharin Jesu aa piq ma batta, “Asang likwit na taka aa, ‘Miqtang banlo chen phak eq tong moq.’”
5Ethi jio Thangwa aa kannáng solkat ta etho rikla piq thima mingkang thaji mung tang tha takhita. 6Thangwa aa piq thima batta, “Nga nang ma iri tarong etho chamtan thaji raa kophanáng, chammatakoi iri chamtan raa nga ma ko taphang, etho nga iritang raa barima nuk ang ethima jin kot eq ang. 7Nang aa nga raa shumnuk phu jo iri chamtan raa baráng chen sey angna.”
8Jesu aa thawel batta, “Asang likwit na taka aa, ‘Teyhungwa ba Shkewa shi chen shumnuk u etho piq rangma somlo u!’”
9Ethi jio Thangwa aa Jesu tha Jerusalem náng solkat ta etho thaji phey náng eq aluk Rangnuk himkho thina thalangta, ethi jio piq thima batta, “Nang Shkewa Miqwasa ang ujo iriwang wuk u. 10Chammatakoi Asang likwit na taka aa, ‘Nang raa jaqhal eq remkum ma Shkewa piq rangkamwa tangma raaqkhat kotna.’ 11Etho irimal ta tho taka ang aa, ‘Baja long o nakcham thabot u ta rangkamwa tang aa ning jak eq lo phanu.’”
12Etharin Jesu aa thawel batta, “Asang likwit na taka aa, ‘Teyhungwa ba Shkewa nang aa nak tari u.’”
13Thangwa aa Jesu tha uphan o thun tari ta ethi jio piq tha chomwey ma ka eq qhing chuwang ta.
Jesu Galilee na jaksom phang somlo aa
(Matthew 4:12–17; Mark 1:14,15)
14Ethi jio Jesu Galilee náng welta. Etho Asang Tsija tarong tha piq jamna angta. Piq aa tung aa raaq tha thaji mungna sey rong taqhong danta. 15Piq aa synagogue tang na tatal ta etho miqtang aa piq tha rapney tasapsey ta.
Nazareth miqtang Jesu ma nuk moq
(Matthew 13:53–58; Mark 6:1–6)
16Ethi jio Jesu tha Nazareth náng kata, piq tha eshi haq sho hun chalota, etho salwet Sabbath saal o synagogue náng kachey ta. Etho piq tha esho lang eq Asang likwit na taka atha phachan ta. 17Piq ma rangsamal Isaiah likdapkol tha kota. Piq aa likdap kol tha lan eq irimal taka atha kapta.
18 “Teyhungwa Tsija tha ihann na,
chammatakoi tangshit tangma tungtang aqhal raaq batma nga raa tal taphang.
Khak eq shing aa tang tha tho qhap ma
etho miikduk tang ma takhi eq ma
Etho utang damnak eq shing aa tang sha qhap ma piq aa nga ináng tathok tapha.
19 Etho Teyhungwa tha tasungrang ma phang thu tapha,
miqtang ma iri raaq raa usam cham eq aa ta piq aa nga ináng tathok tapha.”
20Jesu likdap kol tha pol eq ushingtey wa jak thináng kot eq tong kata. Synagogue na chamtan miqtang eq piq ching konáng siin chey ta. 21Etho piq aa ning ma batta, “Nim aa tat tin, iri Asang likwit na taka raaq tang raa tahom sey angta.”
22Piq aa thaji miqtang ma jaqhalta batta etho piq raaq tha tat eq thaji miqtang patja ang eq ning aa batta, “Piq raa Joseph sa ang moq i?”
23Piq aa ning ma batta, “Nga usam eq ang, nim aa iri raaq tang raa nga ma bat phanin, ‘Taksa siintey, nang ni nang shi taqhal u. Capernaumna nang aa chamlang somlo tu tha í aa tatti, eshimal hun iri samhaq roq somlo u.’ 24Nga nim ma ira batphang, utang rangsamal ma tho usamhaq miqtang shey baluk otho jaqhal kap moq angna. 25Nga nim ma asing batphang, rangsamal Elijah rangham tho pang tom tangko nángduk rangtsey moq angta tho rapney tsamnang nia shong aa cham angta. Etho eshi rangham tho Israel haq na notinu tang daqhan angta. 26Etharin, Elijah tha Israel miqtang him ashey náng tho takat moq angta, piq aa Sidon mung Jarephath samhaq náng notinu ashey him náng chen takat ta. 27Etho rangsamal Elisha tok tho Israel na miq daqhan ma angam apit rong taksa ta, etharin ning thiwang utang tho taqhal moq angta; piq aa Syria haq thiwang Naaman ta thamiing tha chen taqhal ta.”
28Synagogue wang miqtang aa iri raaq raa tat eq rapney rong khata. 29Ning aa tunshat eq, Jesu tha samhaq hangnáng humkat eq haqkang thináng solkat ta; eshi samhaq tha iri haqkang kho thina hungta. Etho piq tha tat taqhat ma angta, 30etharin piq tha ning jaktung wang thalat qhing chuwang ta.
Washey hanna anaan tsija
(Mark 1:21–28)
31Jesu tha Galilee mong na Capernaum samhaq thináng kata, etho Sabbath saal o piq aa miqtang thima tatalta. 32Piq raaq tha tat eq ning tha pattik rong angta chammatakoi piq aa bara raaq batta tha authority wang raaq ta. 33Synagogue na washey piq hanna thangwa angta, piq tha jajong aa khukngey ta. 34“Nazareth Jesu chuwang u, nang iching wang chamlang somtey aa? Nang aa í raa tathin ma thuta phu i? Nga usam eq phang, nang utang aa: Nang raa Shkewa Asang miq!”
35Jesu aa thangwa thima raaq ta, “Shu shu tong u etho iri wa haan wang thalat u!” Thangwa aa eshiwa tha ning jakho o thangak ta etho tatsamnang hunga eshiwa haan thiwang thalat chuwang ta.
36Miqtang tha rapney rong patja tita etho ning ni ning jaktungna rong tapitta, “Iri chamal tung aa raaq rin aa? Iri miq rey anaan tsija tang thima authority nia tarong o raaqkhat kot aa, etho anaan tsija tang tha thalat chuwang aa.” 37Etho thaji mung na Jesu raaq tha rongwaan chuwang ta.
Jesu aa miq daqhan taqhal aa
(Matthew 8:14–17; Mark 1:29–34)
38Jesu Synagogue tha shingchak eq Simon him náng thuta tho Simon nicha tha kho mok eq tsamnang ta, etho ning aa Jesu thima piq tha nong ma batta. 39Piq tha unicha jibching rel tho langka eq etho khomok thima qhapchak eq ma raaqkhat kotta. Unicha kho mok tha qhalta, etho unicha rikla tunshat eq ning thima phaksat limtit kotta.
40Rangsal sey nop atho uphan phan taksa tey tang tha Jesu relnáng thoksolta, etho piq aa ning tha lo eq aro ro taqhal ta. 41Etho Thangwa tang tha irimal ring rak ta, “Nang raa Shkewa Miqwasa!” Etho irimal raaq eq, daqhan miqtang haan thiwang thalat chuwang ta.
Etharin Jesu aa Thangwa tang thima raaqkhat kotta etho ning tha kap tharaaq moq angta, chammatakoi piq raa Khristo ta ning aa usam eq ta.
Jesu Synagogue na phanchan aa
(Mark 1:35–39)
42Inap rangnap sey ang atho piq shu shu haq náng chuwang ta. Miqtang aa piq tha bita, etho piq tha sey kapkhi bi atho ning aa piq tha takat ma komoq sey angta. 43Etharin piq aa ning thima batta, “Nga Shkewa mungtan tungtang aqhal tung aa raaq adak samhaq tang náng tho phanchan kotching, chammatakoi Shkewa iritang somlot ma nga raa takat taphang.”
44Req piq aa Judea mung na synagogue tang na phanchan ro eq ta.
Currently Selected:
Luke 4: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
