Luke 21

Notinu dan

(Matthew 23:1–36; Mark 12:38–40)

1Jesu aa thaji chingko náng tunsiinta, etho tanglom wa tang aa thu eq rangnuk him ngin shingching khok na ngin rongsak aa tha siintan ta. 2Etho piq aa tangshit hal notinu aa nginti ani sak atha khita. 3Piq aa batta, “Nga nim ma asing batphang, iri tangshit notinu rey thaji pheywang eq ahan sakta. 4Thaji miqtang aa chamtan ngin dakta tha thoksom eq eshiwang sakta; etharin iri nu raa rapney tangshit hal ang eq tho, piq jakna atharang tong ma chamtan angta thaji tha thoksom ta.”

Jesu aa rangnuk him tashitchak raaq bat aa.

(Matthew 24:1,2; Mark 13:1,2)

5Chamteytey ujiphantey tang aa rangnuk him tung aa raaq wanta, itan thangchan hal longsak eq, etho Shkewa ma dan ko eq itan daqhal thun hal takhi aa tha hunta thima ning wanta. Jesu aa batta, 6“Nim aa iri thaji khi inn raa, saalshey irimal tho rangham thu phana baro ashey long tho khakla katang na lun moq angna; thaji raa tathak eq taqhat chakna.”

Tsamnáng etho tahikham

(Matthew 24:3–14; Mark 13:3–13)

7Ning aa pitta, “Tatalteywa, iri baluk o angna? Etho irimal raaq raa tahom ang ajo chamal eq sam ni?”

8Jesu aa batta, “Thaji kowang rangtun eq tong inn; dipkup raaq battan phin jo nak han inn, imiing som eq daqhan miq rong thu eq batphanin, ‘Nga raa piq tha!’ Etho, ‘Rangham tha thuk ma arelna sey!’ Etharin ning ji nak phan inn. 9Takhat jaan tang etho thamol hit tang raaq tat inn jo nak cho inn; phang o irimal hun angna, etharin ira uthun rangham ta nak tathin inn.”

10Piq aa batchey ro hun eq ta, “Phan ajat jaktungna takhat jan na etho mung ni mung jaktung o takhat jan na. 11Jujong aa haqkung shin na, shong acham tok angna etho thaji kona atak asa rong angna; rangkang wang miqcho aa qhong kaphana etho ajong mal takhina. 12Irimal ang jakho, nim raa lo eq tahikham eq phanin; nim raa synagogue etho chuk náng sakchak phanin; i miing rangma lungwang tang nia jaktáng o shingtey jakho o thalang phanin. 13Iri tok raa nim aa tungtang aqhal phanchan ma tathin inn. 14Chamta bat ching aa ta nim aa jakho wang hun nim tin o nak tathin inn, 15Chammatakoi nga nim ma irimal tung araaq etho thunglam tallam kopha náng, ira tat eq nim ralwa tang atho nim ma jin thawel bat phamin angpha nin. 16Nim nu nia wa, pho aa no, juntey tang, etho nim noknu nia wa tang aa ning aa nim raa thalo phanin etho nim wang chamtey tha tikwat na. 17Thaji miq aa nim raa irangma miiksuk phanin. 18Etharin, nim kho wang khorun ashey tho matmoq angna. 19Tin tharong eq tong inn jo, nim ni nim lun nin!”

Jesu aa Jerusalem tashit raaq bat aa

(Matthew 24:15–21; Mark 13:14–19)

20 “Nim aa Jerusalem raa ralkoltey tang aa timchak ta sey ta khi inn jo, etho ira kalo sey shitina ta nim aa sam nin. 21Etho utang Judea na rongtong aa sha haqkan konáng jol ching; utang ajong samhaq na ang aa sha eshi haq sha shingchak eq ching, etho utang qhimna angna ning sha ajong samhaq náng katching ang moq. 22Chammatakoi eshi tang sha ‘Tsamnáng kot saal’ bara likwitna taka aa sha asing sey angna. 23Ethi neynap tho, utang bahanhan etho pung tachip tey nu tang, ning thima rapney tsamnang angna. Iri haq ro daqhan tsamnang thupha na, etho iri miqtang khom o Shkewa tsamnang sha qhatna. 24Chamteytey sha jan eq thadukna, etho adak tang thaji raa adak mung náng lo eq sol chuwan na; etho Gentile phan tang aa ning rangham thun wey moq ling Jerusalem sha ja eq shitnak na.”

Miqwasa kat

(Matthew 24:29–31; Mark 13:24–27)

25 “Rangsal, jappi etho taset tang wang chamtey sha patja ang ching angna. Mingkang wang mung thaji tang jungku etho jungkok tharaaq sha tat eq rapney ucho rong angna. 26Mingkang na chamlang rong ang chey atha tathin eq cho eq miqtang ngaqwang rong angna. Chammatakoi rangkang chamtan tarong tang sha thamot eq chakna. 27Eshi rangham tho, Miqna Sa rapney tarong wang etho phun amun phun jamoq kaphana. 28Baluk o iritang phang ang ajo, tunshat eq aluk náng tun siin inn, chammatakoi nim thalun sha arelna sey.”

Phokbang bang aa chamlang tatal aa

(Matthew 24:32–35; Mark 13:28–31)

29Etho Jesu aa ning ma iri raaqshiton raa batta: “Phokbang bang etho adak thaji bang tang ri tat tathin inn. 30Baluk o nim aa bangking na bangjak anal sey dim aa ta khi inn jo nim aa sam eq nin, rangcho tok arelna sey thupha. 31Irimal hun, baluk o nim aa iritang raa sey khi inn jo sam eq nin, Shkewa Mungtan katma alo ang moq sey.

32 “Nga nim ma asing batphang, iri raaq tang tahom wey moq nángduk, iri pat raa thun moq angna. 33Mungtan nia mingkang raa matwang angna etharin iraaq tang raa baluk o tho matmoq angna.”

Rangtun eq tongching

34 “Rangtung eq tong inn! Phaksat tang etho mokpang eq etho iri rollung rima ahan tathin eq nak tong inn. Irimal ang ajo eshi saal sha rikla thaman mal thupha na. 35Iri mingkang miqtang thaji ma iri tang raa thupha na. 36Rangtun eq tong inn, etho nim iritang thaji angma ta wang lun ma etho Miqna Sa jakho o jin langma salwet romtam chu inn.”

37Jesu aa rangney o rangnuk himna tatal kota etho rangja sey ang ajo, ran náng thalat eq olive haqkang na tong ta. 38Rangnap kha o rangnuk him náng thaji miqtang piq raaq tatma thuta.

Currently Selected:

Luke 21: Mmmm

Highlight

Copy