Luke 20

Jesu ma piq aa authority chamlang aa ta pit aa

(Matthew 21:23–27; Mark 11:27–33)

1Saalshey ang atho Jesu aa rangnuk him na miqtang thima tat eq etho tungtang qhal phanchan kot atho ajong tingwa tang etho Thong tataltey tang aa miqlang tang tha sol eq thuta. 2Etho piq ma batta, “Í ma batphu, iritang ri nang aa chamlang authority wang som u? Nang ma irimal som u ta utang eq batta phu?”

3Jesu aa ning ma thawel batta, “Nga nim ma iri raaq raa tho pit phang. Nga ma batphin, 4John junglam tey shi mungtan wang ti miq wang aa?”

5Ning ni ning jaktung o phang thadan ta, “Hiqtang aa chamta bat i? Hiqtang aa ‘Mungtan wang’ ta bat ijo, piq aa batna, ‘Etha ang ajo nim aa John raaq shi chamma han min ang tin?’ 6Etho hiqtang aa ‘Miq wang’ ta bat ijo, iro miqtang rong tong aa rey hiqtang raa long eq pat phani chammatakoi ning thaji aa John raa rangsamal ta tathin aa.” 7Req ning aa thawel batta, “Í aa sammi piq bari wang atha.”

8Etho Jesu aa ning ma batta, “Irimal ang ajo nga tho chamlang authority wang irimal somlo ang sha nga nim ma batpha mong.”

Suti pallmong na jakthangma somtey tang raaqshiton

(Matthew 21:33–46; Mark 12:1–12)

9Etho Jesu aa miqtang ma iri raaqshiton raa batta: “Miqwa ashey angta bara suti pik tapikta, jaksomtey tang thima jaksomlot tha kot shing eq saal daqhan ma him wang chuwang ta. 10Suti mintoksey ang atho, piq aa usanga wa tha suti uphal tha somma takatta. Etharin eshi jakthang ma somlot tey tang aa eshi sanga tha wat eq jakchangpol thawel ta. 11Etho piq aa adak sanga tha wey takatta; etharin jakthang ma somtey tang aa piq tha tho wat eq tharakri eq ta etho chamtho kot hung aa wey thawel chakta. 12Etho piq aa adak sanga tha wey takatta; jakthang ma somtey tang aa piq tha nolwat eq hangnáng bichak ta. 13Etho, suti pal tangteywa aa batta, ‘Nga chamlang sey somnáng? Nga ma thaji phewang eq itinmat sa ashey dang sha hun takat náng; chamal eq tho ning aa piq raaq sha utat eq na!’ 14Etharin jakthang ma somtey tang aa piq tha khi atho, ning ni ning jaktungna rongwan ta, ‘Ira tangteywa sa. Kaphin piq ri tatik eq chak i, etho piq rang chamtan lik angin sha hiqtang rang sey angna!’ 15Etho ning aa piq tha lo eq suti pik thiwang hangnáng solkat eq tatik chakta.”

Jesu aa pitta, “Thanga tangteywa sha sey thu ajo jakthang ma somtey tang shi chamlang sey na? 16Piq tha thu eq eshi jakthang ma somtey tang tha tatik chak na etho upik sha adak miqtang ma tapik ma kot na.”

Miqtang aa etha tat eq batta, “Irimal nakcham ang aa!”

17Jesu aa ning ching konáng siin eq pitta, “Irimal ang ajo Asang likwit na bat aa ri chamal angna?

Long tha him huntey tang they chamtho khaq moq ta shingchak ta

ethi long tha hun thaji phewang eq akhek long ma ang ta.

18 Utang eshi long kho sho qhat aa sha pinrakrak ma takhan na; etho eshi long sha miqkho náng qhat ajo, eshitey sha bin bongbong sey angna.”

Phunta ukot eq chingti kotching ang moq aa

(Matthew 22:15–22; Mark 12:13–17)

19Thong tataltey tang ni ajong tingwa tang aa Jesu tha eshitáng sho hun lot ma tat tathinta, chammatakoi ning aa usam eq ta piq aa iri raaqshiton raa ning ma tho ubat eq ta; etharin ning miqtang thima chota. 20Ethirangma ning aa ashey lam bita. Ning aa miqtang thima miq qhalta takhi eq Jesu ma raaq pit eq thalot ma ngin kota, irimal lam o ning aa Jesu tha Rome governor jaknáng khaphung kotma tathinta. 21Hutsi sontey tang they Jesu ma batta, “Tatalteywa, í aa usam eq i, nang aa chamlang tatal u etho chamlang battan u sha asing sing hun. Í aa usam eq phi nang aa utang tho tanglom tangshit ta siin hung aa etho Shkewa raaq bara asing aa sha hun tatal u. 22Í ma batphu, í thong na Rome ajong lungwang ma phunta ukot eq chingti kotching ang moq aa?”

23Etharin Jesu aa ning asoalat tha sam eq ning thima batta, 24“Nga ma ashey denari takhi phin. Iro utang miing etho utang sham wit takhi aa?”

Ning aa thawel batta, “Rome ajong Lungwang rang.”

25Req Jesu aa batta, “Irimal ang ajo, ka eq ajong lungwang ráng chamlang ang aa shi ajong lungwang ma kot inn etho Shkewa rang chamlang ang aa shi Shkewa ma kot inn.”

26Ning aa eshina miqtang jakho o chamta tho bat ching ahung angta, req piq raaq thawel thima pat tita.

Utik wang weyjey raaq pit

(Matthew 22:23–33; Mark 12:18–27)

27Etho chamteytey Saddusi tang aa, bari miq sha utik wang weyjey moqta batta, Jesu relnáng thu eq pitta, 28“Tatalteywa, Moses aa í ma iri thong raa wit kotaphi: songwa ashey tita etho piq himteynu tha sa ahung angta, eshimal ang ajo, eshi songwa ma upho nia no tang aa eshi utik angteywa himteynu sha ukap eq ching etho eshi nu wok wang bara sa chang aa sha eshi nu phang himteywa sa ta thaming na. 29Jukshey sanat sapho wa tang angta. Thaji phewang eq phokho tha tharit sey angta etharin sa ahung wey jakho tita. 30Ethi jio mikamwa they ethi nu tha wey tunkapta, 31Ethi jio mikam thong wang they wey tunkapta, irimal hun sanat saphowa tang tha angta, thaji tha sa ahung tita. 32Jio ethi nu tha tho utik sey angta. 33Thanga, ti eq wey jey saal tho, piq utang himteynu angna? Piq tha wa sanat jamoq tharik thang chol sey.”

34Jesu aa ning thima thawel batta, “Iri pat ro miqwa etho miqnu takap ang aa, 35Etharin bari miqnu nia miqwa tang utik jio wey jey jin ang ching ta ang ajo ning sha takap moq angna. 36Ning sha rangkamwa tang mal ang eq jin timoq angna. Ning sha Shkewa sa tang, chammatakoi ning sha utik wang weyjey ta. 37Utik wang weyjey na ta Moses aa asing eq takhi kota. Jatqhip mongna waljung aa ta taka tang sho piq aa Teyhungwa tungkang o irimal ta batta, ‘Abraham Shkewa, Isaac Shkewa, Jacob Shkewa’ 38Piq sha atharang tang Shkewa, amáng tang ma ang moq chammatakoi piq jakhona thaji atharang.”

39Chamteytey thong tataltey tang aa batta, “Tatalteywa, jaqhal raaq battu!” 40Ethi jio ning aa piq thima adak raaq chamtho ruk pit moq sey rong angta.

Khristo utang aa

(Matthew 22:41–46; Mark 12:35–37)

41Jesu aa ning ma pitta, “Khristo raa David phi aa lí ta chamal eq jinbat nin? 42-43Chammatakoi David aa piq ni piq aa psalm likdap na batta,

Teyhungwa aa itangteywa ma batta:

nga ba ralwa tang ba jaa khung na shing mong nángduk

ijak qhaq ko na tong u!

44 David aa piq tha ‘Teyhungwa’ ta halta; irimal ang ajo Khristo thi David aa phi aa lí wangta chamal eq jinbat ni?”

Thong tataltey tang wang rangtun eq tong inn

(Matthew 23:1–36; Mark 12:38–40)

45Thaji miqtang aa piq raaq tha tatchey atho, Jesu aa ujiphantey tang thima batta, 46“Thong tataltey tang wang rangtun eq tong inn, bari khat alo lo sampey eq qhing ma nuk aa etho thangsang katang o ajong rangka ma nuk aa; Synagogue tang na ning thaji pheywang eq jakho na tong shima etho phaksat náng ka ajo jaqhal katang o tong ma nuk aa; 47Ning aa notinu tang lik aa ngin sha junnam eq dipkup aa, etho takhi ma rapney alo lo hal romtam chu kot aa. Ning sha thaji pheywang eq jashit tsamnang na!”

Currently Selected:

Luke 20: Mmmm

Highlight

Copy