Luke 14

Jesu aa atak miqwa tha taqhal aa

1Sabbath saal ang atho Jesu Phorisi tang wang ashey walang him náng phaksat ma wangta; Etho miqtang aa piq tha rapney rikri siinta. 2Eshina washey angta, ujakni jaa ushing ang atha Jesu ching náng thuta. 3Jesu aa Thong tataltey nia Phorisi tang thima pitta, “Hiqtang thong na Sabbath saal o atak tang shi jin taqhal moq ti jin taqhal eq na?”

4Ning chamtho raaq moq rong angta. Jesu aa ethi atakwa tha taqhal eq chuwang ta. 5Eshi jio Jesu aa ning thima batta, “Raaq ni raaq Sabbath saal o nim su nia sa etha ang moq nim maanpong khopong bung náng qhat wangta ta ang ajo, Sabbath saal o nim aa eshi kalo lattmin angnin i?”

6Etharin ning aa Jesu ma jin thawel bat moq angta.

Tin thanin etho winwa rimrang

7Winwa tang ma jaqhal tongching tha tal ko atha khi atho, Jesu aa ning ma raaqshiton bat kota: 8“Utang eq nim rungsat náng halphin tho, nim shi jaqhal tongching o nak tong inn. Irimal tho mok angna, nim pheynáng eq ajong mok halta. 9Etho rungsat tangteywa, barey nim ni thani halta shinphin, nim ching náng ka eq irimal tho mok bat phanin, ‘Piq ri iro tatong u.’ Ethimal ang ajo nim rapney rakri nin etho nim ka eq thaji phewang eq jiwang tongching shináng wey tong katching angna. 10Ethi rangma nim baluk o hal pha nin, ka eq thaji pheynáng eq ji tongching náng tong ka inn, etha ang ajo rungsat tangteywa nim relnáng ka eq bat phanin, ‘Inokwa, jakho náng ka eq jaqhal tongching náng tong ka u.’ Piq rey nim ma thaji miqtang jakho o rangka phanin. 11Utang eq piq ni piq ma rangka sha aming ma hunna etho utang eq piq ni piq shima aming ta thaming asha ajong ma hunna.”

12Etho Jesu aa piq halteywa thima batta, “Baluk o rangnap ni rangja phaksat ma hal ujo ba nokwa tang, baphono tang, etho bajuntey tang etho tanglom himkhung thaktey tang nak hal u; eshimal ang ajo nang hal eq taphaksat phanu etho nang aa chamal taphaksat tu eshi kongpha sha ukap eq nu. 13Nang aa taphaksat eq ma halching ang ajo tangshit tang, jakkung nia jaakung, etho miikduk tang ni hal u; 14Ning aa nang raa jio hal eq wey jin ruktaphaksat phamu angphanu etho nang aa iri rangrima sunmaan kapnu. Khakla miqtang utik wang weyjey saal sho nang aa chamtan somlo tu tang sha Shkewa kongpha kot phanu.”

Ajong taphaksat raaqshiton

(Matthew 22:1–10)

15Jesu jamoq phaksat tey ashey miqwa aa ira tat eq Jesu ma batta, “Barey Shkewa mungtan na phakshat phaksat aa eshi miq sha sunmaan!”

16Jesu aa piq ma batta, “Ashey miqwa angta bara ajong etho jaqhal taphaksat kacha ta etho daqhan miqtang halta. 17Baluk o taphaksat rangham sey angta tho, winwa tang tha halma piq aa usanga tha takat ta, ‘Wàng phin, uphan tha kacha chol sey!’ 18Etharin, ning thaji aa ukat thima nuk moq ang eq ashey jio ashey aa raaq tha batma angta. Phang wang wa they sanga wa thima batta, ‘Nga haq ashey ritáng etho ka eq siin kat ching; tinshit eq nga ri tolchak phu.’ 19Etho adak wa they batta, ‘Nga hal banga ritáng sha nga ka eq thak hum ka ang; tinshit eq nga ri tolchak phu.’ 20Etho adak wa they batta, ‘Nga thanga rungsat táng ethi rangma nga jin kapha mong.’ 21Sanga wa tha ka eq tangteywa thima iri raaq tang raa batta. Him tangteywa tha kha eq sanga wa thima batta, ‘Kalo ka eq samhaq wang aming lam etho lam wang thaji tangshit tang, chongbon tang, miikduk tang, etho jakung tang shi ináng thoksol phu.’ 22Sanga wa they batta, ‘Tangteywa ba raaqkhat thaji tha sey angta, etharin himkhok tha atha wey hun.’ 23Tangteywa aa sanga thima batta, ‘Mung lam náng etho himthal náng ka eq hal u etho miqtang shi thu eq ihim shi cham shey aa. 24Nga nang ma batphang, uhal tey shiwang ashey tho nga chamlang phaksat reyrang tang riwang kap phaksat moq angna!’”

Jiphantey angma uthang

(Matthew 10:37,38)

25Takshey miq daqhan Jesu jamoq kachey atho, piq aa jikonáng ngiksiin eq ning thima batta, 26“Bari miq rey nga náng eq tho unu nia wa, uhimteynu nia usa tang, upho nia uno tang, etho piq ni piq ma nga náng eq ahan tinmat aa sha tho baluk otho ijiphantey ma jin ang moq angna. 27Etho bari miq rey ubólq puk eq i jiji jin kapha moq sha baluk otho ijiphantey ma jin ang moq angna. 28Nim aa ashey ajong him hunma tathin tak inn jo jakho tong eq him hun ma chamtan ngin wang na etho iri ngin riwang him ri jin thun hun mi ti jin thun hun eq ni ta tathin inn. 29Etha ang moq ang ajo thóng song eq thaji jin ruk hunmin ang inn jo miqtang aa nim sha siin eq tikngit phanin. 30Ning aa iri miq rey himtangko danghun eq jin thun hunmoq ta batphanin. 31Irimal hun, ashey lungwang aa hajatasi miq sol eq adak lungwang bari jamna hajatrokni miqtang angna ethi jamoq thamol hit kat jakho piq aa thak tathin etching eshi adak lungwang shi jin mong ti jin náng aa. 32Etho ruk jin mong ta ang ajo adak lungwang alo na angwey ajo hun nungmay eq tong ma thoksiltat tey takat eq thabat ching. 33Irimal hun, nim aa thaji jin shing chak min ta ang ajo ijiphantey ma jin ang min ang nin.”

Sim moq siim

(Matthew 5:13; Mark 9:50)

34 “Siim raa aqhal etharin iri siim raa usim sha matwang ajo, eshi chamlang eq sey wey tasimna? 35Ira haq ma etho haqwán ma tho qhal moq. Esha bichak aa. Utang ma naq atha, tat inn!”

Currently Selected:

Luke 14: Mmmm

Highlight

Copy