Luke 13

Ngarey wang wel inn etha ang moq o utik ang nin

1Ethi tok tho, chamtey miqtang aa Jesu they Galilee miqtang ma batta, barey Shkewa ma kholik kot tok o Pilate aa tatik chakta. 2Jesu aa ning ma thawel batta, “Iri Galilee miqtang sha irimal tatik chakta ta, nim aa adak Galilee miqtang wang ngarey jaksom ahan somta ta nim aa tathin inn i? 3Irimal ang moq! Nga nim ma batphang, nim atho nim ngarey wang wel min ang inn jo nim tho irimal hun ti nin. 4Etho Siloam na thòng qhat atho asi ashat miqtang chamma tita? Jerusalem miqtang wang ning aa ahan ngarey jaksom lota ta nim aa tathin inn i? 5Irimal ang moq! Etharin nga nim ma batphang, nim ngarey wang wel min ang inn jo nim tho irimal hun ti nin.”

Timoq phokbang bang raaqshiton

6Etho Jesu aa ning ma iri raaqshiton raa batta: “Ashey miqwa angta, piq pal thina phokbaang bang kheyta. Piq ka eq phokbaang bang tha siin kata etharin ashey tho kap moq angta. 7Piq aa upal rimtey ma batta, ‘Siin u, pang tom wangduk nga iri náng thu eq iri phokbang ro phokbang ti tatbi ang etharin uti tishey tho ahung. Iri ujut eq chak u! Iri bang tungkang o iri haq raa chamma hop shing ni?’ 8Pal rimteywa aa batta, ‘Tangteywa, pang shey tan chamtat ang wey aa, nga haq sha thawut thut eq manqhiq shat náng. 9Ipang aa iri bang raa uti ang ajo aqhal angna; etha ang moq ang ajo nang aa iri bang ri ujut eq chak u.’”

Jesu aa Sabbath saal o chongbon nu tha taqhal aa

10Saalshey Sabbath saal o Jesu aa synagogue na tatalta. 11Esho nushey angta, piq haanmong na pang asi pang ashat anaan tsija wang lota; etho piq chongbon ri ang eq jin langmoq angta. 12Jesu aa piq tha khi atho hal eq batta, “Miqnu, ba taksa wang nang uqhal sey ang tu!” 13Jesu aa ujak ni tha ukhona shingta, etho ethi nu chongbon tha takshey o hun chalta etho piq aa Shkewa tha tasapsey ta.

14Synagogue wang ajong miqlang tha ukhat angta chammatakoi Jesu eshi nu tha Sabbath saal o taqhal ta. Req piq aa miqtang thima batta, “Hiqtang ma jaksom lot jin somlot ma saltharok atha; req eshi saal o thu eq ataksa tang jin taqhal eq u etharin Sabbath saal o nak taqhal u!”

15Teyhungwa aa ning ma thawel batta, “Nim takhi eq somtey tang! Sabbath saal o nim aa nim maan nia mok aming tang sha taap wang jung ling ma qhap min i? 16Iro miqnu ashey, piq sha Abraham phi aa lí wang etho piq sha pang asi pang ashat Thangwa eq lo eq shingta; Sabbath saal o piq shi qhap ching ang moq i?” 17Piq raaq tha tat eq uralwa tang tha ning ni ning rong rakri ta: etharin adak miqtang aa ujaqhal jaksom lot tha khi eq rapney rong sungrang ta.

Jungqhang li raaqshiton

(Matthew 13:31,32; Mark 4:30–32)

18Jesu aa pitta, “Shkewa Mungtan shi chamlang o kara aa? Iri raaq ri nga chamlang jamoq tatut batphang? 19Ira jungqhang li mal. Ashey miqwa eq jungqhang li tishey som eq upik o wonta. Uphuk kheyta tha cha eq bangma kalikta, etho wotang aa ning tip tha ethi bangking tho hunta.”

Uwung raaqshiton

(Matthew 13:33)

20Jesu aa wey pitta, “Shkewa Mungtan ri nga chamlang jamoq tatut batphang? 21Ira uwung phan mal. Ashey miqnu anitom uwung phan som eq wungwey moq ling ajong molam o ban tha nol ta.”

Amiing kalung po

(Matthew 7:13,14,21–23)

22Jesu Jerusalem náng kachey atho lamna chamtan qhim etho samhaq angta tang thaji haq tho miqtang thima tatal chey ta. 23Chamtey tey aa piq ma pitta, “Tangteywa, miq akum sa dang lunna i?”

Jesu aa ning ma thawel batta, 24“Aming kalung po o nop ma tasik inn, chammatakoi miqtang ahan eshi aming kalung po o nop ma tasik na, etharin jin nop moq angna. 25Him tangteywa tha shat eq kalung sha sakchak na: ethi ji tho nim aa rann na lang eq kalung sha tharaaq wat eq tat bat nin, ‘Tangteywa, í ma kalung lak kophu!’ Piq aa nim ma bat phanin, ‘Nga nim bari wang thuta phin sha sampha mong.’ 26Ethi jio nim aa bat nin, ‘Í ba jamoq lingphaksat taphi; nang aa í samhaq na tatal taphu!’ 27Etharin piq aa wey batna, ‘Nga nim bari wang thuta phin sha sampha mong. Nim lajak tang, nim thaji irelwang chuwang inn!’ 28Etho nim aa Shkewa Mungtan na Abraham, Isaac, Jacob etho thaji rangsamal tang tha siin nin etho nim sha hang náng beychak phin jo paa tachikkak eq uqhap rong ang nin! 29Miqtang saalkhong nia saalnop etho saalji nia salphey tang wang thu eq Shkewa Mungtan na phaksat ma tathung tong na. 30Etho thanga bara jina rong ang aa eshitang wang chamtey tey jakhona angna etho bara jakhona rong ang aa eshitang wang chamtey sha jina angna.”

Jesu Jerusalem ma tinmat aa

(Matthew 23:37–39)

31Ethi rangham tho chamtey Phorisi miqtang Jesu ching náng thu eq batta, “Nang iriwang thalat eq adak náng chuwang u, chammatakoi Herod aa nang tatik ma tathin aa.”

32Jesu aa ning thima batta, “Ka eq eshi inkaku shima bat ka inn: ‘Thaney nia inap aa nga thangwa tang tha phannáng etho miqtang sha taqhal náng etho isanney aa ijak somlot sha thunna.’ 33Etharin nga thaney, inap etho isanney aa ilam o hun kachey náng, chammatakoi ashey rangsamal Jerusalem sha shingchak eq adak haq náng ti chuwang aa ta ang ajo khakla ang moq angna.”

34 “Jerusalem, Jerusalem! Nang aa rangsamal tang tha tatik tu, Shkewa takatta thoksil tattey tang tha nang aa long eq pat eq tatik chak tu! Woku aa chamal eq usa tang urang khungna hop shing eq tong aa thimal nga tho nim satang raa ijak eq homlotma chamtan juk tat tathin taphang! Etharin nang aa tasom pha mu angta phu. 35Iri rangma nim Rangnuk him changpol angna. Nga nim ma asing batphang, ‘Teyhungwa miing o bara thu aa shima Shkewa sunmaan kot na’ ta baluk nángduk nim aa batmin ang nin ethi nángduk nim aa nga kapkhi phamin ang phanin!”

Currently Selected:

Luke 13: Mmmm

Highlight

Copy