John 4
4
Jesu nia Samari miqnu
1Jesu aa jungthalam eq John phey náng eq ahan jiphantey thajoq aa ta Phorisi tang aa kap tatta ta Jesu aa sam ta. 2Etharin Jesu aa jungthalam kot moq angta, ujiphantey tang aa jungthalam kot chey ta. 3Jesu aa Judea tha shingchak eq Galilee náng wey kata. 4Etho piq Samaria haq tha jan eq kat ching angta.
5Ethi rangma Samaria mungna ashey samhaq Sychar náng thuta, bara Jacob aa umiqwasa Joseph ma kota pik rel thina angta; 6Jacob khopong ethina angta. Jesu lam qhing wang nángtik angta, ethirangma piq eshi khopong kang relthina tong ta. Ira rangney rangham angta.
7-8Ujiphantey tang eq samhaq wang phaksat rik ma kata. Eshi rangham tho ashey Samaria miqnu jung som ma thuta. Jesu aa piq ma batta, “Nga ma jung wang thaling phu.”
9Ethi Samaria miqnu they piq ma batta, “Nang Jehudi ang eq nga Samari miqnu iching wang jung chamlang ma chu phu?” Chammatakoi Jehudi tang aa Samaria tang jamoq chamlang dangjang tho shing moq angta.
10Jesu aa thawel batta, “Nang aa Shkewa jakkot sha sam tu etho nang ma jung chuktey utang atha ta usam eq tu jo, nang aa piq ching wang chuwang tu, etho piq aa nang ma rollung jung kowang taphu.”
11Miqnu they piq ma batta, “Tangteywa, bajak na jung qhot ma chamtho ahung, etho khopong rapney alip hal; rollung jung sha ba jakna bari wang thupha? 12Í tey aa wa Jacob aa í ma iri khopong raa kotaphi; piq aa iriwang ling ta etho ususa tang etho umaan tang eq tho iri wang ling ta. Nang í tey aa wa Jacob wang ajong i?”
13Jesu aa piq ma thawel batta, “Utang eq iri jung riwang ling ajo junglal wey tina. 14Etharin utang eq tho nga kot ang jung shiwang ling ajo, piq baluk otho junglal ti moq sey angna. Iri jung bara nga kot ang, ning tin mong na pattuk rollung nángduk ang rangma jungmik angna.”
15Miqnu they piq ma batta, “Tangteywa, nga junglal ti mong angma etho jung somma itan lot náng kamong angma, eshi jung shi nga ma kophu.”
16Jesu aa piq ma batta, “Ka u, ba himteywa shi hal eq ináng wey ka shin phin.”
17Miqnu they thawel batta, “Nga ma ihimteywa ahung.”
Jesu aa piq ma batta, “Nga ma himteywa ahung ta nang aa khakla bat u. 18Chammatakoi nang ma himteywa banga ang chol sey, etho bara bajam na thanga atha, piq sha tho ba himteywa ang moq. Ira nang aa asing bat u.”
19Miqnu they piq ma batta, “Tangteywa, nga nang raa rangsamal ta tathin ang. 20Í tey aa wa tang aa iri haqkan na shumnuk ta, etharin shumnuk ching sha Jerusalem na ta nang aa bat u.”
21Jesu aa piq ma batta, “Miqnu, nga ri han phu, nang aa iri haqkan ro Iwa shumnuk mu ang nu etho Jerusalem na tho shumnuk mu angnu, eshi rangham tha uthok sey angpha. 22Nang aa sammu tha shumnuk u; etho í aa bara sam i tha shumnuk i, chammatakoi ulun sha Jehudi tang wang thupha. 23Etharin rangham uthok sey angpha, thanga tho ang ang aa, baro asing shumnuktey eq Iwa sha Tsija nia asing wang shumnuk na, chammatakoi Iwa irimal miq shumnuktey bi aa. 24Shkewa raa Tsija, piq shumnuktey Tsija nia asing jamoq shumnuk ching hun.”
25Miqnu they piq ma batta, “Messiah ta Khristo ukat ang phana ta nga sam eq ang, piq ka pha jo, í ma thaji bat kot phani.”
26Jesu aa piq ma batta, “Nga bara ba jamoq wanchey pha raa, piq tha hun.”
27Eshi jaktung tho ujiphantey tang thuta, etho Jesu tha miqnu jamoq wantit aa ta rapney patja ta. Etharin utang eq tho “Nang aa chamlang bi u?” tia “Chamlang ma piq jamoq wantit u?” ta nan pit moq angta.
28Miqnu they chiktha shingchak eq samhaq náng ka eq miqtang thima batta, 29“Kaphin, nga bara somlo tang thaji tha nga ma bat kottey shi siin inn. Ira Khristo tha hey?” 30Ning samhaq wang thalat eq piq relnáng thuta.
31Eshi jaktung tho ujiphantey tang aa piq ma batta, “Tatalteywa, chamli lang phaksat u.”
32Etharin Jesu aa ning ma batta, “Nim aa sam min phaksat phan sha ijakna atha.”
33Ujiphantey tang jaktung na wanta, “Utang eq piq ma phaksat thok som eq ta i?”
34Jesu aa ning ma batta, “I takattey tinuk o somlot sha etho ujaksom tahom sha iphaksat. 35Nim aa bat min ang tin i, ‘Uqhan tokma thanga jappi bali atha i?’ Nga nim ma batphang, nim miik tun eq pikko náng siin inn, chammatakoi cham tha uqhan eq ma amin sey. 36Uqhantey eq jakthang kap aa etho pattuk rollung kap ma tung aa cham thajoq aa, irimal ang eq uqheytey nia uqhantey thani sungrang ang na. 37Chammatakoi iri raaq tathak raa asing, ‘Uqheytey ashey etho uqhantey adak.’ 38Nim aa tsamnang som min ang tin thináng, nga nim pik náng qhan ma takat taphang: miq dak eq tsamnang somta, etho ning jaksom shiwang nim aa thóng kaplap inn.”
39Eshi samhaq thiwang Samaria miqtang daqhan eq miqnu raaq tha tat eq Jesu tha hanta; chammatakoi piq aa miikkhi kota, “Nga chamlang som tang tha piq aa nga ma bat kot taphang.” 40Ethi rangma Samaria tang piq relnáng thu atho, ning jamoq tong ma ning aa piq ma tinthanin eq batta. Piq eshina saalni tong ta.
41Piq raaq tungkang otho miq daqhan eq hanta. 42Etho ning aa miqnu thima batta, “Thanga íaa ba raaq bat rangma chen hanmi; chammatakoi piq raa hun mingkang thaluntey ta íaa thanga utat sey ti, etho usam sey ti.”
Jesu aa ajongwa miqwasa taqhal aa
43Saalni tong jio, piq eshiwang thalat eq Galilee náng kata. 44Chammatakoi Jesu aa hun batta, “Ashey rangsamal eq umungna rangka kap moq.” 45Piq Galilee náng thu atho, Galilee tang aa jaqhal eq wangphin ta halta; chammatakoi chamtan jaksom piq aa Jerusalem Ulit kut aa kan rangham tho somta tha, ning aa thaji khi eq ta, chammatakoi ning tho kut aa kan na angta.
46Esho piq Galilee mung na Cana samhaq náng thuta, barina piq aa jung tha sutichi ma takaleyta. Capernaum samhaq na ashey ajongwa angta. Usa miqwasa atak angta. 47Jesu Judea mung wang Galilee mung náng thuta ta tat eq piq relnáng kata etho piq ma tinthanin eq batta, “Ka eq isa miqwasa ri taqhal kotphu; chammatakoi piq utik koko sey.” 48Jesu aa piq ma batta, “Nim aa umaal nia patja jaksom khi min nángduk baluk otho hanmin angnin.”
49Ajongwa they piq ma batta, “Tangteywa, isa tiwey moq jakho kaphu.”
50Jesu aa piq ma batta, “Ka u, basa miqwasa atharang angna.”
Eshi miqwa they Jesu raaq tha han eq qhing chuwang ta. 51Piq lam na ang weyta tho usanga tang piq jamnáng thu eq batta, “Ba miqwasa atharang.”
52Piq aa ning ma pitta, “Chamtan rangham tho piq qhalta?” Sanga tang they thawel batta, “Baja rangney jitho khomok tha qhalta.” 53Etho ajongwa they tasik ta, “Baja irimal rangham o hun Jesu aa piq ma batta, ‘Ba miqwasa atharang angna.’ ” Etho piq nia uhimtey tang thaji aa Jesu tha hanta.
54Jesu Judea mung wang Galilee mung náng thu atho iri patja jaksom raa jukni sey somlo ta.
Currently Selected:
John 4: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
