John 21

Jesu sanat ujiphantey tang jakho na takhi aa

1Iri raaq jio Jesu aa piq Tiberias shitim kangna ujiphantey tang ma takhi ta. Esha irimal angta. 2Simon Peter, Thomas (Didymus ta tho hal eq aa), Galilee mung Cana samhaq wang Nathanael, Zebedee miqwasa ni, etho ujiphantey wang ani eshina angta.

3Simon Peter aa ning ma batta, “Nga ngaqsa lot ma ka phang.” Ning aa piq ma batta, “Í tho ba jamoq ka phi.” Req ning thalat eq waqwan tho qhung ta, etharin eshi rangpal tho chamtho kap moq angta. 4Rangnap tho Jesu jungkang na langta; etharin Jesu ta ujiphantey tang aa sing moq angta. 5Jesu aa ning batta, “I nokwa tang, nim jakna amaan dan ngaqsa atha i?” Ning aa thawel batta, “Ahung.” 6Piq aa batta, “Waqwan aqhat konáng chak hal inn jo ukap eq inn.” Ning aa chak they halta, etho ngaqsa ahan tungkang o chak tha jin hum moq angta. 7Ujiphantey tang wang ashey, barima Jesu tinma ta, piq aa Peter ma batta, “Ira Teyhungwa!” Simon Peter aa Teyhungwa ta tat atho, piq khing sho khatnup losa tha khakta chammatakoi piq hansang angta etho jung náng wukta. 8Etharin adak ujiphantey tang they ushey ngaqsa chak tha hum eq waqwan o jungkang náng thuta. Chammatakoi ning jungkang wang alo na ang moq angta, etharin dang roktom tan rol angta. 9Ning jungkang thináng thu atho ning aa wal tak chol ang atha khita, eshina anitom ngaqsa tha wal o háng ta etho banlo tha phakta. 10Jesu aa ning ma batta, “Nim aa thanga lotiin ngaqsa wang amaan dan som kat phin.”

11Simon Peter aa waqwan náng ka eq chak tha jungkang náng humta, etho 153 ajong ngaqsa eq sheyta etharin chak tha tharap moq angta. 12Jesu aa ning ma batta, “Ka phin, til sat inn.” Ujiphantey tang wang utang eq tho “Nang utang aa?” ta nan pit moq angta. Chammatakoi ira Teyhungwa tha hun ning aa usam eq ta. 13Jesu ka eq ning ma banlo tha kota, etho eshimal ngaqsa tha tho kota.

14Ira juktom sey angta, Jesu utik wang wey lun jio ujiphantey tang aa kap khita.

Jesu nia Peter

15Tilsat jio Jesu aa Simon Peter ma batta, “John miqwasa Simon, nang iritang náng eq ahan ngama tinma phu i?”

Peter aa Jesu ma batta, “Inn Teyhungwa, nang aa usam eq u, nga nangma tinmat ang phang.”

Jesu aa piq ma batta, “I kelwut tang ri rimrang u.”

16Jesu aa jukni piq ma wey batta, “John miqwasa Simon, nang ngama tinmat ang phu i?”

Piq aa Jesu ma batta, “Inn Teyhungwa; nang aa usam eq u, nga nangma tinmat ang phang.” Jesu aa piq ma batta, “I kelwut tang ri rimrang u.”

17Jesu aa juktom piq ma wey batta, “John miqwasa Simon, nang ngama tinmat ang phu i?”

Juktom sey pit atho Peter tin rapney shitta, etho piq aa batta, “Teyhungwa, nang aa thaji usam eq u, nga nang ma tinmat ang phang ta tho usam u.” Jesu aa piq ma batta, “I kelwut tang ma taphak sat u.

18 “Nga nang ma asing sing bat phang, baluk o nang jaro angtu tho kacha eq banáng kat ma nuk u tha kachey tu; etharin baluk o nang tikang ang u jo bajak tachal nu, etho miq dak eq khak eq nang banáng kat ma nuk mu eshináng solkat phanu.”

19Iri raaq raa Peter chamal eq tina etho Shkewa phun amun chamal thaluk na ta takhi ma Jesu aa batta. Etho Jesu aa piq ma batta, “Iji phan phu.”

Jesu nia adak ujiphantey

20Peter aa ngik eq siin atho Jesu aa bari ma tinmat ta eshi ujiphantey ning ni ji tho kapha tha khita. Ira eshi ujiphantey tha hun, bara phaksat rangham tho Jesu relna bon ka eq pitta, “Teyhungwa, nang utang eq thalo phanu?” 21Piq sha khi eq Peter aa Jesu ma batta, “Teyhungwa, piq ma chamlang angna?” 22Jesu aa Peter ma batta, “Nga wey kawey pha mong náng thula piq sha athangrang tong aa ta nga nuk ang ajo, nang ma chamlang aa. Nang aa iji phan phu.” 23Ethirangma ujiphantey tang jaktung thina raaq qhong ta, eshi ujiphantey tha ti moq angna. Etharin Jesu aa piq sha timoq angna ta bat moq angta, etharin “Nga wey kawey pha mong náng thula piq sha athangrang tong aa ta nga nuk ang ajo, nang ma chamlang aa” ta batta.

24Ira eshi ujiphantey tha hun, bara iri raaq tang raa miikkhi ko chey ta etho barey iri raaq tang raa witta. Etho í aa usam eq i, piq miikkhi raa asing.

Uthun raaq

25Etho adak daqhan jaksom atha, bara Jesu aa somlo ta. Nga tathin ang, eshi tang sha ashey ashey witta jo, eshi likdap kol tang wang mingkang ro ban moq ang wang ta etho ushing ching tho ahung ang wang ta.

Currently Selected:

John 21: Mmmm

Highlight

Copy