Acts 25
25
Paul Festus jakho na
1Festus eshi mung náng thuta tho saltom jio piq Caesarea wang Jerusalem náng kata. 2Eshiwang ajong tingwa tang, etho Jehudi solwa tang aa Paul raaq tha piq jakho na shing ta. 3Ning aa Festus ma Paul tha Jerusalem náng sol ma tinshit eq batta, chammatakoi ning aa Paul sha lam na tatik ma raaq kara ta. 4Festus aa batta, “Paul tha Caesarea chukna sakti, etho nga eshináng kalo katching. 5Nim solwa tang tho ijamoq Caesarea náng ka phin etho eshi miqwa shey jashit somta jo eshina hun bat inn.”
6Festus aa saal ashat tia saal asi eshina ning jamoq tong ta etho Caesarea náng kata. Saal dak o piq khaphung khok na tong ta etho Paul solkat ma raaqkhat kot ta. 7Paul thu atho, Jerusalem wang thuta Jehudi miqtang piq tha tim eq lang ta etho piq tha tashit ma batta. Etharin raaq sing ta jin raaq moq angta. 8Paul piq ni piq tha thalun ma batta: “Nga Jehudi thong tia rangnuk him tia Rome ajong lungwang sha miiksuk eq chamtho som mong angtáng.”
9Festus Jehudi miqtang jakho aqhal angma nuk ta, req piq aa Paul ma pitta, “Nang Jerusalem náng ka eq eshina nga nang ma iri raaq rima phung ma unuk ang u i?”
10Paul aa batta, “Nga ajong lungwang khaphung khok na lang ang etho i khaphung sha iri na hun ang ching. Nang atho usam eq u nga Jehudi tang jamoq cham jashit som mong angtáng. 11Nga utik tharotatasam kap ching chamlilang som táng jo eshiwang nga jolma nuk mong. Etharin iri Jehudi tang aa nga jashit ta raaq tang sha asing ang moq ang ajo utang eq tho nga sha ning jak náng jin komoq angna. Nga ajong lungwang jakho na lang ma nuk ang.”
12Festus unokwa tang jamoq wan jio batta, “Nang Rome ajong lungwang jakho o lang ma nuk u, eshirangma nang ajong lungwang relnáng ka u.”
Paul Agrippa etho Bernice jakho na
13Chomwey jio, Festus governor jamoq tachong rangma lungwang Agrippa nia Bernice Caesarea náng thuta. 14Eshi daklot tong jio, Festus aa Paul raaq lungwang ma batta: “Felix aa ashey miqwa tha chukna shing ta. 15Etho nga Jerusalem náng katáng tho, Jehudi ajong tingwa tang etho miqlang tang sha piq jashit raaq tha batta etho piq ma tsamnang kotma nga ma batta. 16Etha otho, nga ning ma bat táng, utang eq jashit som ta tha ning aa bat ajo piq sha thalun raaq bat ma rangham kot ching, irimal ang moq ang eq utang ma tho tsamnang kot sha Rome thong na qhal moq. 17Ning iri náng thuta pha tho, nga rangham tachuwang hunga saal dak o eshi miq tha khaphung khok náng sol kat ma raaqkhat kotáng. 18Piq ma jashit ta raaqtey miqtang tha piq tashit bat ma lang ta, etharin nga tathin táng mal chamtho jashit raaq ning jin raaq moq angta. 19Ning thong tung aa raaq etho Jesu ta thamiing aa ashey utik angta miqwa tung aa raaq hun ning aa batta, Paul aa Jesu tha utik jio weylun angta tha phanchan aa. 20Irimal ang eq nga jin phung mong sey, ethirangma piq iri phung rangma Jerusalem náng katma nuk moq ti nuk aa sha nga Paul ma pit táng. 21Etha otho Paul aa ajong lungwang jakho o lang ma nukta. Ethi rangma nga ajong lungwang jamnáng takat mong nangduk kalung bantey jamoq umong o shing ma raaqkhat kotta.”
22Agrippa Festus ma batta, “Nga iri miqwa raaq raa hun nga tat ma nuk ang.”
Festus aa thawel batta, “Nang aa inap aa tat nu.”
23Saal dak o, takhi khang eq Agrippa nia Bernice aa ralkoltey solwa tang etho samhaq wang solwa tang jamoq khaphung him náng thuta. Festus aa raaqkhat kot atho Paul tha solkat ta. 24Festus aa batta, “Lungwang Agrippa etho thaji miqtang irina: iri miqwa miing o iriwang etho Jerusalem na thaji Jehudi tang aa piq aa jashit somlo ta ta i jaknáng kot taphin. Ning aa piq raa tatik eq chakma raaq batta. 25Etha otho nga iri miqwa ro utikwat eq ma chamtho jashit somlot khimong angtáng. Piq aa hun ajong lungwang jakho o lang ma chuta, ethi rangma nga piq sha Rome náng takat ma tathin táng. 26Etharin nga ajong lungwang ma piq jashit tung aa raaq wit ma chamtho ahung. Ethi rangma nga piq raa nim relnáng sol kat taphang; lungwang Agrippa, ba relnáng sol kat taphang; irimal ang ajo ba raaq tat eq nga jin wit eq náng. 27Chammatakoi, ashey chukna tongtey jashit jaksom tung aa raaq sha jaqhal eq wit hunga Rome haqnang takat sha qhal moq.”
Currently Selected:
Acts 25: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
