Lukas 6

Manga Murina Isa Atobhemo Gandum i Eona Saputuu

6:1-5

(Mat. 12:1-8; Mrk. 2:23-28)

1Saangu wakutuu i eona Saputuu, Isa tee manga murina alalomo i manga inawuna gandum. Manga murina atobhemo bhakena gandum sumai, akokiakea tee limana, kasiimpomo akandea. 2Maka dhaangia uka pia-pia mia minaaka i rombongana Farisi apogau, "Pokia ingkomiu upewau saangu iharamuaka i eona Saputuu?"#6:2 I nuncana Hukumu Taurati, Aulataʼala asasi manga Yahudi to akarajaa ande eona Saputuu mamudhaakana manga incia dhaangia tee wakutuuna to asomba i Kawasana Opu. 3Kasiimpo Isa alawanimo manga incia, "Indapo mboona ingkomiu ubacea opea ipewauna Daud, wakutuuna incia tee manga mia moosena incia amaara, 4tuaapa incia apesua i nuncana Kema Momangkilona Aulataʼala tee aala roti pasombaa, kasiimpo akandea tee adhawuakea i manga mia moosea garaaka inda amembali atokande tabeana to manga imamu?"#6:4 Roti pasombaa sumai adhikaia i meja to asambahea i aroana tampa momangkilo i Kemana Aulataʼala. Sainamo roti pasombaa aharamu to manga mia mencuana imamu, Kawasana Opu inda aabhi Raja Daud tee manga mia moosea akodosa wakutuuna manga incia akande roti incia sumai roonamo amaara kompona. 5Isa apogaumo uka i manga incia, "Anana Maanusia mokohakuna to asusuakea opea momembalina tee inda momembalina ipewau ande eona Saputuu."

Isa Apauntomo Manga Mia i Eona Saputuu

6:6-11

(Mat. 12:9-14; Mrk. 3:1-6)

6I eona Saputuu mosagaanana, Isa apesua i tampana ibaadati, kasiimpo aadhari. Iwe sumai dhaangia samia momatena lima kaanana. 7Manga ahalii Hukumu Taurati tee manga miana Farisi atilikimo Isa, ande Incia bheapaunto mia i eona Saputuu, mamudhaakana manga incia apotibhaaka alasa to apasala Isa. 8Maka o Isa amataua o fikirina manga. Roonamo itu apogaumo i mia momatena limana, "Maimo, bhangu tee ukakaro iwe sii." O mia incia sumai abhangumo tee akakaro iwe sumai. 9Kasiimpomo onina Isa i bhari-bharia mia moumbana iwe sumai, "Kuabha i ingkomiu, iapai iundaakana ande eona Saputuu, tapewau malape atawa tapewau madhaki? Tapasalaamati inyawana mia atawa tapekamatea?" 10Isa atontomo bhari-bharia mia iwe sumai, kasiimpomo apogau i mia momatena limana sumai, "Paulua o limamu." O mia sumai apaulumea limana tee auntomo. 11Manga ahalii Hukumu Taurati tee miana Farisi iwe sumai aʼamaramo mpuu. Manga incia apepuumo amufakati bheapewau opea tee Isa.

Isa Akemba Sapulu Rua Mia Rasulu

6:12-16

(Mat. 10:1-4; Mrk. 3:13-19)

12Wakutuuna incia sumai, Isa apangaramo i kabumbu to adoʼa. Samaloa Incia adoʼa i Aulataʼala. 13Samainawana saeona mpuu, Incia akembamo manga murina, tee apilimea minaaka i manga incia sapulu rua mia kasiimpomo asarongiakea rasulu. 14Simon (isarongiaka uka Petrus), tee Andreas witinaina Simon, Yakub tee Yahya, Filipus tee Bartolomeus, 15Matius tee Tomas, Yakub anana Alfeus, Simon (Simon sumai uka isarongiaka miana Zelot#6:15 Zelot dhaangia o sarona to manga miana Israel moewaakana tana Israel mamudhaakana abebasi minaaka i pamarintana Roma.), 16Yudas witinaina Yakub tee Yudas Iskariot naile itu bhemomembalina mia mohianatia.

Isa Aadhari tee Apauntomo Mia Bhari

6:17-19

(Mat. 4:23-25)

17Kasiimpo Isa asapo minaaka i kabumbu sumai apobhawa tee manga rasulu, kasiimpo aunto tee akakaro i saangu tampa momadhete. Iwe sumai dhaangiapo abhari murina tee uka manga mia abhari mpuu moumbana minaaka i saangua Poropinsi Yudea, kota Yerusalem, tee manga kota Tirus tee Sidon i bhiwina tawo. 18Manga incia aumba to arangoaka Incia tee aemani apauntoakea manga minaaka i panyakina. Manga mia ipesuaikina rohi madhaki aumba tee apauntoakea uka, 19tee bhari-bharia mia sumai aʼusaha adhingku Incia, roonamo minaaka i karona alimba kuasana to apaunto manga incia bhari-bharia.

Pebhoasaka Masanaa tee Kaudhaniaka

6:20-26

(Mat. 5:1-12)

20Isa atontomo manga murina kasiimpo apogau,

"Masanaamo e ingkomiu momisikinina,

roonamo ingkomiu umembalimo uumatina Kawasana Opu i nuncana Pamarintana Aulataʼala.

21Masanaamo e ingkomiu sii-sii momaarana,

roonamo Aulataʼala bheapekambosukomiu.

Masanaamo e ingkomiu sii-sii motangina,

roonamo bheupotawa.

22 # 1Ptr. 4:14. Masanaamo e ingkomiu ande roonamo Anana Maanusia o mia abancikomiu tee ahumbu-humbukomiu,

ahinakomiu tee apogauakakomiu momadhakina.

23 # Tul. 7:52. Masanaamo tee upekatende-tendemo roonamo ukaunde-unde i wakutuu incia sumai,

roonamo satotuuna fahalamiu amaoge i sorogaa; tee mboo sumai uka ipewauna opu-opuana manga incia i manga nabii.

24Maka ucilakamo ingkomiu morangkaeana,

roonamo i nuncana karangkaeamiu padhamo upotibhaaka kasanaamiu.

25Cilakamo ingkomiu, o sii-sii momambosuna,

roonamo bheumaara.

Cilakamo ingkomiu, o sii-sii mopotawana,

roonamo bheusukara tee utangi.

26Cilakamo ingkomiu, ande bhari-bharia mia apujikomiu,

roonamo mboo sumai uka opuana manga incia padhamo apewaua i manga nabii gau-gau."

Maasiakea Musumiu

6:27-36

(Mat. 5:38-48)

27"Maka o siimo parintaku to moperangoina pogauku sii: Maasiakea musumiu tee upewau malapena i manga mia mobancikomiu. 28Emanimo barakati i Aulataʼala to manga mia motundakomiu tee udoʼaakea o mia momadhakina tee ingkomiu. 29Ande o mia atapa bhagamu sawetana, dhawuakea uka o bhagamu sawetana uka, tee incema-incema moalana jubamu, taroakea uka incia aala bhajumu. 30Dhawuakea i bhari-bharia mia moemanina i ingkoo; tee bholi uemania pendua i manga mia moalana pewauamu. 31#Mat. 7:12.Pewaua to mia mosagaanana mboomo opea ipeelumu o mia mosagaanana apewau to karomu. 32Ande ingkomiu tangkanamo umaasiaka o mia momaasiakana ingkomiu, opea kalabhiamiu? Roonamo manga mia mokodosa uka amaasiaka o mia momaasiakana karona. 33Tee ande ingkomiu upewau malape tangkanamo tee mia momalapena tee ingkomiu, opea kalabhiamiu? Roonamo manga mia mokodosa uka apewau malape tee mia momalepena tee manga incia uka. 34Tee ande ingkomiu upaadhaaka doimiu i mia, tee uharapu bheapambulia pendua, opea kalabhiamiu? Roonamo manga mia mokodosa uka amembali apadhaakea o dhoina i mia mokodosa, tee aharapu apotibhaaka kapambulina mboomo kabharina iadhana manga. 35Maka ingkomiu tabeana umaasiakea o musumiu tee upewau malape i manga incia tee wakutuuna upaadhaakea doi, bholi uharapu kabholosi. Ande mboo sumai, Aulataʼala bheadhawukomiu fahala maoge tee ingkomiu bheumembali manga anana Kawasana Opu Momalanga, roonamo Incia amalape incana i manga mia inda momatauna tarima kaasi tee i manga mia madhaki. 36Jadi, tabeanamo umembali mia imasiaakana mia mosagaanana mboomo Amamiu amaasiaka uka mia mosagaanana."

Giu Moʼadilina

6:37-42

(Mat. 7:1-5)

37Bholi uʼadili mia, mamudhaakana ingkomiu samia inda aʼadilikomiu Aulataʼala. Bholi uhukumu mia, mamudhaakana ingkomiu samia inda ahukumukomiu Aulataʼala. Amponia samaanusiamiu, mamudhaakana Aulataʼala uka amponia dosamiu. 38Pekadhawumo sumaimo ingkoo uka bheutodhawu; ingkomiu bheutarima kaganta momalape, ilendu-lenduki sampe akalua-lua tee aruka mpuu sampe apotiburi i nuncana kaena katambimiu. Mboo sumai uka to itarimamiu. Sababuna kaganta ipakemiu to mia mosagaanana, siitumo bhemotopakena to karomiu."

39 # Mat. 15:14. Kasiimpo Isa apakawaakamo uka saangu ibarati mosagaanana i manga incia, "Ande mia mawilo atonda mia mawilo mosagaanana, dhaanamo rua-rua miaia bheakotibu i nuncana kabhalongko. 40#Mat. 10:24-25; Yah. 13:16; 15:20.Samia muri inda bheamaoge alabhi guruna, maka muri motamatiakana kaadharina bheamembali apokana tee guruna.

41Pokia ukamata ngawuna kau modhaangiana i matana witinaimu, garaaka sapale balo kau i matamu karomu inda umataua? 42Tuaapa ingkoo umembali upogau i witinaimu, 'Mai witinaiku, bhekupalimbaakako ngawuna kau modhaangiana i matamu itu,' garaaka sapale balo kau modhaangiana i nuncana matamu inda ukamatea? E mia munaafiki, palimbapo porikana balo kau itu minaaka i matamu mamudhaakana atinda ukamata momainawana to upalimbaaka ngawuna kau minaaka i matana witinaimu itu."

Puuna Kau tee Bhakena

6:43-45

(Mat. 12:33-35)

43"Puuna kau momalape inda mungki akohasiliaka bhake inda momalape. Mboo sumai uka, puuna kau inda momalape inda akohasiliaka bhake momalape. 44#Mat. 12:33-34.Bhari-bharia puuna kau atomatau minaaka i bhakena. O mia inda atobhe bhakena ara minaaka i ngkamo-ngkamo atawa atobhe bhakena angguru minaaka i karuirui. 45Mia malape apalimba manga hali malape minaaka i tampana to adhika harataa i nuncana ngangarandana momalape. Mia madhaki apalimba manga hali madhaki minaaka i tampana to adhika harataa i nuncana ngangarandana momadhaki. Roonamo opea ibhoasakana muncuna, siitumo molimbana minaaka i ngangarandana."

Rua Giu Fondasi

6:46-49

(Mat. 7:24-27)

46"Pokia ingkomiu ugoraaka Iaku, 'Kawasana Opu, Kawasana Opu,' garaaka inda upewaua opea ipogauakaku? 47Incema-incema moumbana i Iaku tee morangona pogauku tee apewaua, kupaumbakomo tee tuaapa incia bhekupapokanea. 48Incia mboomo mia mobhanguna bhanua. Mia incia sumai aselia pekandalea, kasiimpo akarajaaia fondasina i bhatu. Wakutuuna aumba uwe mopenena tee mawa akangkanai bhanua sumai, bhanua sumai inda amembali akohudha, roonamo padhamo abhangua i fondasi momatangka. 49Maka incema-incema morangona pogauku tee inda apewaua, kupapokanea tee samia mobhanguna bhanua inda tee fondasina. Wakutuuna aumba mawa akangkanai bhanua sumai lausakamo atobhata; tee o kadhakina amaoge mpuu!"

Currently Selected:

Lukas 6: KMW

Highlight

Copy