Yahya 7

Isa Alingka i Yerusalem to Eona Raraeana Wale-wale

7:1-13

1Sapadhana incia sumai, Isa aumbati manga tampa i lipu Galilea. Maka Incia inda alingka i Yudea roonamo manga miana Yahudi gauna apekamatea. 2Wakutuu incia sumai o raraeana miana Yahudi amakasumo, siitumo Raraeana Wale-wale.#7:2 Raraeana Wale-wale: Raraeana wakutuuna miana Yahudi apakaro wale-wale minaaka i rahana kau tee ambooresia kangengena saminggu to audhaniaka lingkaana manga miana Israel tee Musa alaloi tana matuu sapadhana alimba minaaka i Tana Mesir. 3Manga witinaina Isa apogau tee Incia, "Lingkamo i lipu Yudea mamudhaakana manga murimu amembali akamata bhari-bharia giu ipewaumu. 4Ande dhaangia mia gauna atomatau i mia bhari, atantumo mia sumai inda bheabuniaka opea ipewauna. Ande Ingkoo upewau manga hali mboo sumai, taroakamo saangua dunia amataua." 5(Manga witinaina Isa apogau mboo sumai, roonamo manga incia uka inda aparacaeaia.) 6Pogauna Isa to manga incia, "Indapo akawa o wakutuuku, maka to ingkomiu bhari-bharia wakutuu soo apokanamo. 7Dunia sii inda amembali abancikomiu, maka Iaku ibancina dunia, roonamo Iaku sadia kupogau ande ipewauna dunia amadhaki. 8Lingkamo i kariaa sumai. Iaku inda#7:8 inda kulingka: Dhaangia uka kaburi mangenge mopogauna, "indapo kulingka." kulingka roonamo wakutuuku indapo akawa." 9Mboomo sumai o pogauna Isa i manga incia, tee sapadhana sumai Incia ambooremo to pia eo i Galilea.

10Maka salingkana manga witinaina sumai i kariaa, Incia uka alingka inda tee uuʼuuna, tee inda dhaangia momataua. 11Manga miana Yahudi apeeloa i nuncana kariaa sumai, pogauna manga incia, "Iapaimo mia incia sumai?" 12Abhari o mia mopokamuntuiakana Isa. Dhaangia mopogauna, "Incia o mia malape," maka dhaangia uka mopogauna, "Inda, Incia mopasaladhalana mia bhari." 13Maka inda samia uka mobaranina mopogauakana Incia, roonamo amaeka i miana Yahudi.

Kasakusiina Isa to Karona

7:14-24

14Sapadhana pia eona i kariaa sumai, Isa apesuamo i Baitulla kasiimpo aadhari. 15Manga miana Yahudi amentemo, kasiimpo manga incia apogau, "Tuaapa o mia incia sii amataua antona manga kitabi sainamo Incia indapo apengkaadhariakea?" 16Kasiimpo Isa apogau i manga incia, "Kaadhariku mencuana minaaka i karoku, maka minaaka i Incia molambokoaku. 17Incema-incema moosena kapeeluana Aulataʼala, sumaimo incia bheamataua o kaadhariku sii o asalana minaaka i Aulataʼala atawa minaaka i karoku. 18Mia mopogauakana karona, siitumo o mia mopeelona kamuliangi to karona. Maka o mia mopeelona kamuliangi to Aulataʼala molambokoa satotuuna o mia mojujuru, tee i nuncana karona tangkanamo kabanara. 19Nabii Musa padhamo adhawuakakomiu Hukumu Taurati. Maka, inda samia uka i minaaka i ingkomiu moosea. Pokia ingkomiu upeelo dhala to upekamateaku?" 20Alawanimo mia bhari sumai, "Ingkoo apesuaikiko seetani! Incema mopeelona dhala to mopekamateko?" 21Lawanina Isa, "Iaku kupewau saangu muuzizati i eona Saputuu tee bhari-bharikomiu umente tee inda upeelua. 22#Bhaa. 17:10. Musa adhawuakakomiu tuturana tandakia (tutura incia sumai asalana mencuana minaaka i Musa, maka minaaka i opu-opuata), tee ingkomiu utandaki mia i eona Saputuu uka, garaaka inda amembali takarajaa i eona Saputuu.#7:22 utandaki mia i eona Saputuu uka: I nuncana Hukumuna Tauratina Musa, ana umane aparintaakea to atotandaki i eo walu eona, moomini i eo incia sumai eona Saputuu. Kasiimpo Isa apetulatulaaka ande manga incia akarajaa i eona Saputuu, maka o tuturana tandaki i eo walu eona akangkanai o eona Saputuu tee inda atoabhi giu mosala. Jadi o Isa aabha, apokia manga incia aʼamara tee Iaku wakutuuna kupaunto mia momapii i eona Saputuu. 23#Yah. 5:9.Ande dhaangia o mia mototandakina i eona Saputuu mamudhaakana ataʼati hukumuna Musa, pokia ingkomiu uʼamara roonamo kupaunto saangua badana mia mapii i eona Saputuu? 24Bholi uhaakimu mia mboomo opea ikamatamiu, maka tabeana uhaakimua tee kaʼadili."

Moposalamaʼanaakana Asalana Isa

7:25-36

25Kasiimpo dhaangia pia mia o miana Yerusalem mopogauna, "Mencuana incia buaka o mia ipeelona manga kaogesata to atopekamate? 26Kamatea, Incia apogau saincana, tee manga kaogesa sumai inda apogauaka opeopea uka tee Incia. Aipomo manga incia amataumea ande o Isa sii satotuuna o Al Masi? 27Maka ande o Al Masi moumbana inda dhaangia o mia momataua minaaka i iapai o asalana, maka ande o mia incia sii ingkita tamataua minaaka iapai o asalana." 28I wakutuu incia sumai, Isa aadhari i Baitulla tee Incia apogau, "Inciamo ingkomiu umatauaku tee umataua minaaka iapai o asalaku. Iaku kuumba mencuana kuose kapeeluku karoku, maka kuose Incia molambokoaku siitumo Incia Mobanarana inda imataumiu. 29Aulataʼala kumataua, roonamo Iaku kuumba minaaka i Incia, tee Incia molambokoaku."

30Manga incia apeelo dhala to arako Isa, maka inda dhaangia samia uka mobaranina morakoa roonamo indapo akawa o wakutuuna. 31Moomini mboo sumai, abhari uka o mia modhaangiana i tanga-tangana mia bhari sumai moparacaeaia. Manga incia apogau, "Ande o Al Masi aumba, inda mungki Incia amembali apadhaangia giu inda momentela molabhina kabharina minaaka i mia incia sii!" 32Manga mia minaaka i rombongana Farisi arangoa ande abhari o mia mopokamuntuiakana Isa. Sabutuna manga imamu maoge tee manga mia minaaka i rombongana Farisi atumpu uka manga pande jagana Baitulla to arako Isa. 33Kasiimpo Isa apogau, "Indamo amangenge kupobhawa tee ingkomiu, roonamo sapadhana sii Iaku bhekumbuli i Incia molambokoaku. 34Ingkomiu bheupeeloaku, maka inda bheupotibhaakaaku, tee ingkomiu inda bheumembali uumba i tampana mbooresaku." 35Rampaakanamo sumai, manga miana Yahudi apogau podho-podho manga incia, "Bhealingka i iapai buaka o mia incia sii sabutuna ingkita inda tapotibhaakea? Buaka Incia bhealingka i miana Yahudi momboorena i tanga-tangana miana Yunani, tee aadhari miana Yunani? 36Opea buaka o maʼanana pogau ibhoasakana, 'Ingkomiu bheupeeloaku, maka inda bheupotibhaakaaku, tee ingkomiu inda bheumembali uumba i tampana mbooresaku?' "

Uwe Idhadhiaka

7:37-44

37I eona kapadhaana matana kariaa sumai,#7:37 I eona kapadhaana matana kariaa sumai: Sapadhana saminggu amboore i wale-wale motopakaro minaaka i rahana puuna kau, miana Yahudi araraeaaka kariaa maoge i eo walu eona. akakaromo Isa tee apogau, "Incema-incema momatuuna bhorokona, aumbamo i Iaku to asumpu! 38#Yeh. 47:1; Zak. 14:8.Incema-incema moparacaeaaku, mboomo mopadhana motoburina i nuncana Kitabi Momangkilo, 'I nuncana ngangarandana bheasiwulu manga umala idhadhiaka.' " 39Isa apogauaka Rohina Aulataʼala wakutuuna apake ibarati to uwena manga umala idhadhiaka sumai. I wakutuuna incia sumai Rohina Aulataʼala indapo idhawuakana, roonamo Isa indapo atomuliangi. Maka sapadhana kajadia incia sumai, manga mia moparacaeana tee Isa bheatarima Rohina Aulataʼala sumai.

40Sarangona pogauna Isa, dhaangia pia-pia mia minaaka i mia bhari mopogauna, "Mia incia sii atotuumo o nabii iantagita." 41Sainamo mosagaanana apogau, "Incia o Al Masi." Maka dhaangia uka mopogauna, "Mencuana, roonamo Al Masi inda aumba minaaka i Galilea! 42#Mat. 2:1; Luk. 2:4.Roonamo i nuncana Kitabi Momangkilo padhamo atoburi ande o Al Masi sumai aminaaka i siwuluna Daud tee aminaaka i Bait Lahim, siitumo i kampo laahiriana Daud."#7:42 aminaaka i Bait Lahim: Satotuuna Isa o siwuluna Daud tee alaahiri i Bait Lahim, maka rampaakanamo Raja Herod gauna apekamate bhari-bharia anaana umane i Bait Lahim, manga mancuanana apalaiaka Isa i Mesir. Samatena Raja Herod, kasiimpo manga incia alingka tee amboore i Nazaret, i lipu Galilea. Kamata Mat. 2:13-23. 43Sabutuna apogera-geramo o mia bhari sumai pokaiana tee Isa. 44Pia mia minaaka i manga incia gauna arako Isa, maka inda dhaangia samia uka momembalina morakoa.

Nikodemus Aewaaka Isa

7:45-52

45Manga pande jagana Baitulla sumai ambuli i manga imamu maoge tee i manga mia minaaka i rombongana Farisi. Kasiimpo manga incia aabha i manga pande jaga sumai, "Pokia Incia inda ubhawea iwe sii?" 46Lawanina manga pande jaga sumai, "Indapo dhaangia samia maanusia momembalina mopogauna mboo Incia." 47Kasiimpo alawanimo manga mia minaaka i rombongana Farisi, "Tapalaka Incia padhamo apasaladhalakomiu! 48Buaka dhaangia o kaogesa atawa o miana Farisi moparacaeana tee Incia? 49Maka o mia bhari sii inda amataua o Hukumu Taurati, taroakamo manga incia abinasaaka!" 50#Yah. 3:1-2. Kasiimpo Nikodemus, sala samia minaaka i manga incia mopadhana mopokawana tee Isa i piamo itu, apogau tee manga incia, 51"I nuncana Hukumu Taurati ingkita inda amembali tahaakimu mia ande indapo tarangoa porikana o pogauna tee indapo tamataua opea ipewauna. Atotuu atawa inda?" 52Kasiimpo alawanimo manga incia, "Buaka ingkoo miana Galilea? Bacea tee uparakisaaia o Kitabi Momangkilo mamudhaakana umataua ande inda dhaangia o nabii bhemoumbana minaaka i Galilea."

Bhawine Mopewauna Zinaa

7:53; 8:11

53 # 7:53 Dhaangia uka manga kaburi mangenge inda tee manga aeati incia sii (7:53--8:11) tee uka dhaangia o manga kaburi mangenge mosagaanana modhikana manga aeati incia sii sapadhana 7:36 atawa 21:25. [Sapadhana incia sumai, ambulimo manga incia bhari-bharia i bhanuana samia-samia,

Currently Selected:

Yahya 7: KMW

Highlight

Copy