Bhaa-bhaana 21

Laahiriana Nabii Ishak

21:1-7

1KAWASANA OPU atilikimo Sarah mboo mopadhana ifirimaniakana, tee KAWASANA OPU apewau mboomo ijanjiakana i Sarah. 2Saanampuu abhawa-bhawamo Sarah, kasiimpo apalaahirimo samia anaana umane to Ibrahim i wakutuu amancuanamo, sumaimo wakutuu padhamo ipatantuakana mboo janjina Aulataʼala i incia. 3Ibrahim asarongiakea anana siimpo molaahirina sumai Ishak,#21:3 Ishak: I nuncana pogau Ibrani saro incia sii maʼanana "incia apotawa." siitumo anaana ipalaahirina Sarah to incia. 4Kasiimpo, Ibrahim atandakimo Ishak, anaana sumai wakutuu umuruna walu eo, mboomo iparintangiakana Aulataʼala i incia. 5Umuruna Ibrahim 100 tao wakutuuna Ishak, o anana, apalaahiria to incia.

6Sarah apogau, "Aulataʼala padhamo apewau iaku kupotawa. Bhari-bharia mia morangona bheapotawa tee iaku." 7Pogauna uka, "Incema i piamo itu momembalina mopogauna tee Ibrahim ande o Sarah apadudu anaana? Maka, iaku padhamo kupalaahiri samia anaana umane to incia i wakutuuna amancuanamo."

Nabii Ibrahim Apadhencu Hajar tee Ismail

21:8-21

8Anaana sumai ajulumo amaoge kasiimpo indamo apadudua. Ibrahim apadhaangiamo kariaa maoge i eo incia sumai Ishak indamo apadudua. 9I kariaa sumai, Sarah akamata anana Ibrahim ipalaahirina Hajar (bhawine Mesir sumai) tangasaana aele-ele Ishak. 10Sababuna sumai, apogaumo Sarah tee Ibrahim, "Padhencua bhatua bhawine sumai tee anana, roonamo anana bhatua bhawine sii inda amembali atarima tinauraka apobhawa tee anaku, Ishak."

11Hali incia sumai amandawuakea mpuu incana Ibrahim, roonamo Ismail o anana uka. 12Maka o Aulataʼala afirimanimo tee Ibrahim, "Bholi amandawu incamu roonamo anana sumai tee bhatuamu. Bhari-bharia ipogauakana Sarah tee ingkoo tabeana urangoa, roonamo mominaakana i Ishak bheasarongiakea siwulumu.#21:12 bheasarongiakea siwulumu: Maʼanana, siwuluna Ibrahim ijanjiakana i nuncana Bhaa. 17:19; 21, siitumo o Ishak. Ismail uka dhaangiapo siwuluna Ibrahim (kamata Bhaa. 21:13), maka mencuana siwuluna ijanjiakana (kamata uka Bhaa. 26:4; 28:14). 13Moomini, anana minaaka i bhatua bhawine sumai uka bhekupamembalia saangu lipu, roonamo incia uka siwulumu."

14Samainawana Ibrahim abhangumo samalo-malona. Aalamo roti tee kadhu kulina uwe, kasiimpo adhikaia roti tee uwe i awaana Hajar. Incia uka apasaraakaakea anana i incia, kasiimpomo atumpumo bhawine sumai alingka. Saanampuu alingkamo Hajar, apekalingka-lingka i Tana Matuu Bersyeba.

15Wakutuuna uwe i nuncana kadhu kulina uwe sumai amapupu, apadholemea anana i tambena saangu puu momaidhiidhina. 16Kasiimpomo incia alingka tee auncura apekaridho apowetaaka kauncuramaka tee anana sumai, kera-kera mboo karidhona anana panana mopepanana, roonamo pogauna, "Ancosala kukamata anaku amate." O inana auncura atangisia tee suara makaa mpuu.

17Aulataʼala arango suarana ana sumai, kasiimpomo malaaʼekatina Aulataʼala akembamo Hajar minaaka i laiana. Pogauna i incia, "Dhaangia opea tee ingkoo, Hajar? Bholi maeka, roonamo Aulataʼala arangoa suarana ana sumai minaaka i tampana incia apotidhole. 18Bhangumo, angkamea anana sumai, tee tondaia, roonamo Iaku bhekupamembalia saangu lipu momaoge."

19Kasiimpomo, Aulataʼala abungkale matana Hajar saanampuu incia akamata saangu sumu. Sumaimo incia alingkamo aantoki kadhu kulina tee uwe, kasiimpomo adhawuaka anana sumai asumpu.

20Aulataʼala apoose tee anana sumai, tee incia ajulumo amaoge. Incia amboore i tana matuu kasiimpo amembalimo samia pande pana. 21Tangasaana incia amboore i Tana Matuu Paran,#21:21 Tana Matuu Paran: Tampa incia sii i Sinai, i polotaana Tana Midian tee Tana Mesir. inana aalamo to incia samia bhawine minaaka i Tana Mesir.

Pojanjiana Nabii Ibrahim tee Raja Abimelekh

21:22-34

22I wakutuu incia sumai Abimelekh tee Pikhol, kapalana suludaduna, apogau i Ibrahim mboo sii, "Aulataʼala abarakati ingkoo i nuncana sagala hali ipewaumu. 23Sii-sii, sumpamo i iaku iwe sii i aroana Aulataʼala, ande ingkoo inda bheugau-gauaku, manga anaku, manga opuaku, atawa opua isangoaku. Mboomo iaku padhamo kupewauko tee kaasi, pewaua uka mboo sii i iaku tee lipu sii, tampana ingkoo umboore mboomo dhaga."

24Pogaumo Ibrahim, "Iaku kusumpa."

25Maka, Ibrahim apeenci i Abimelekh to sumu ialana manga bhatuana Abimelekh. 26Pogaumo Abimelekh, "Iaku inda kumataua incema mopewauna hali incia siitu. Tee uka, ingkoo inda upaumbaaku. Iaku indapo mina kurangoa, tabeana eo sii."

27Saanampuu, Ibrahim aalamo pia-pia mbaa dumba tee sapi, kasiimpomo adhawuakea i Abimelekh. Sapadhana incia sumai manga incia abhokemo pojanjia. 28Ibrahim agaatimo pitu mbaa anana dumba bhawine minaaka i gulumana dumba sumai. 29Aabhamo Abimelekh i Ibrahim, "Opea haejatimu ugaati pitu mbaa anana dumba bhawine sii?"

30Lawanimo, "Pitu mbaa anana dumba bhawine sii tabeana ualea minaaka i limaku sanampuu ingkoo umembali sakusii ande iakumo moselina sumu sii."

31Sumaimo sababuna tampa incia sumai asarongiakea Bersyeba,#21:31 Bersyeba: I nuncana pogau Ibrani saro incia sii o maʼanana "sumu sumpa." roonamo ruamiaia padhamo abhoke sumpana iwe sumai.

32Sapadhana manga incia abhoke pojanjiana i Bersyeba, amakanumo Abimelekh tee Pikhol, kapalana suludadu, kasiimpomo ambuli i lipuna miana Filistin. 33Ibrahim apombula sapuu puuna tamariska i Bersyeba, tee agora iwe sumai sarona KAWASANA OPU, Aulataʼala molagina saʼumurua. 34Tee dhaangiapo amangenge Ibrahim amboore mboomo dhaga i lipuna miana Filistin.

Currently Selected:

Bhaa-bhaana 21: KMW

Highlight

Copy