Mak 2
2
Yesus lem diya ati araŋ emaŋ iŋgu keraŋ wasiŋriy
(Mat 9:1-8; Luk 5:17-26)
1Nal dip usinda, Yesus atebaw mulituw Kapenam yara ley. Iŋgura welalem iŋaŋa, iŋ epe yenira kiy iŋgu.#2:1 Iŋaw kiyaŋnin melaŋ ya iŋgu gonda sip, gu ya iŋgu Yesus iŋ Kapeneam epusu le kiy, ya iŋgu. Lem dip go ya iŋgu Pita, ga Andru ga yiŋdagu guwta. Kuka Mak 1.29 gura neŋta. 2Arya welalem guway sip le abyaŋa iŋgura ya naŋondara epe yamrebara tusu mawtara yit afu kafuryiy. Iŋgura kuka wasiŋ sayi delayinu kiy. 3Arya lem dip lem diya, araŋ ati emaŋ ow epyaŋa. Lem mebuŋtiŋ yiŋdagu, yiŋda beŋbeŋda ikusu ow epyaŋa. 4Gu yiŋ ow Yesus siŋinda leŋiniŋ yuŋ, giran ya kafuryiy. Iŋguniŋ yiŋ ya#2:4 Ya yiŋ dagu, go niŋdagu ya gok yuŋ. Yiŋdagu go bir nim geyiŋ, iŋgura lem 4 yiŋda ikusu desaw lem desaw ya yakapinda lele nina. desaw buŋta lowsu yakap wakorusu beŋbeŋ iŋgu keraŋ belbelyu daŋta ley. 5Arya Yesus buwaya payiŋ Takela nina iŋgu neŋusu, lem iŋgu nigu daririy, <<Urna, pasek geragu patuw sabiryakam,>> giy.
6Arya lem dip Moses dagu kabol suŋuwta yiŋ gura yaŋtuw kiyaŋa. Yiŋ buwaya naŋonda nigu onaŋyaŋa. 7<<Lem iŋon giran kuka ongu gigat? Iŋda Takela ragu afu owgusu yaŋ? Lem diya lem paseknim sabirŋiniŋ yuŋ, Takela ganitnimi niŋgi,>> yiŋ gugu onayaŋa. 8Iŋgura Yesus patuw awru sip Ur soŋnira iŋariy yiŋ gira buwayanda onaŋu kiyaŋa iŋgu. Iŋgura dariyiy, <<Di giran buwadanda ononaŋ gugu tigata? 9Di onaŋna ulal gira diya uratay sip na bitiŋiniŋ yuŋ? Kuka ini na giyakam, <Na pasek geragu patuw sabiryakam gukuna?> Ma <Waraŋu abaŋ soŋga owsu leta gukuna?> 10Go di gugu iŋap, Lem Urmiŋ iŋ daŋ ini buŋta biŋay geyiŋ, pasek sabirbir nina.>> Iŋgura Yesus lem ati araŋ emaŋ iŋgu nigu daririy, 11<<Na darigigatem. Waraŋu beŋbeŋ soŋga owsu yaganda leta,>> giy. 12Arya welalem atŋinda neŋgu kiŋ, lem gu waraŋu abaŋ soŋni owsu ley. Arya welalem iŋgu neŋusu nigu giyaŋa, <<Niŋ kabol inanyaŋ diya indanis neŋyaŋnin melaŋ!>> Iŋguniŋ Takela biŋay ikyaŋa.
Yesus Liway apriy
(Mat 9:9-13; Luk 5:27-32)
13Arya Yesus atebaw mulutuw Galili Way beŋgoy siri suŋu ley. Iŋgura welalem guway sip epyaŋa iŋ siŋinda. Iŋguniŋ kuka sayi delayinriy. 14Arya iŋ palaŋutuw low kusu Liway#2:14 Liway iŋgu Matuw waay debay diya. Kuka Matuw 9.9 da neŋta., Alfius urmiŋ neŋriy, ya takis yebawta gura yaŋtuw kiy, iŋgura apriy, <<Epe suŋ nita.>> Iŋgura Liway waraŋu Yesus suŋu ley.
15Arya emita, Yesus Liway dagu yara aŋyay tuwkiŋ, iŋgura lem guway takis owta tusu lem paseki geyiŋ#2:15 paseki geyiŋ Lem paseki geyiŋ iŋgu yiŋ Farasi, tusu lem gon yiŋ Takela aboŋ suŋu kiyaŋya melaŋ iŋgu. Yiŋ epe Yesus isi aŋyay tiyaŋa. epe iŋ tusu muluŋa nim yiŋ isi aŋyay tiyaŋa. Lem guninaŋ guway Yesus suŋu waluw kiyaŋa. 16Arya iŋaŋ lem Moses dagu kabol suŋuwta iŋgu tusu Farisi#2:16 Farasi Iŋgu lem Moses dagu kabol suŋu kiyaŋa. ragu, yiŋ Yesus neŋyaŋa lem paseki geyiŋ tusu lem takis owta yiŋ isi aŋyay tuwkiyaŋa. Iŋguniŋ muluŋa nim yiŋ miŋyaŋa, <<Iŋ giran lem takis owta tusu lem paseki geyiŋ isi aŋyay tuwti?>> 17Arya Yesus kuka iŋgu iŋawsu, nigu dariyiy, <<Lem miyayi melaŋ le lem miyay welalem patiŋyuta siŋyanda low kiyaŋya melaŋ. Gugu sip, na epmiy iŋgu welalem gon yiŋ pendeŋyeyiŋ paseki melaŋ eta guwta iŋgu yuwayiyi nini epyaŋna melaŋ. Yuŋ! Na welalem paseki geyiŋ iŋgu yuwayiyi nina epmiy,>> giy.
Yesus uriŋ nina miŋyaŋa
(Mat 9:14-17; Luk 5:3-39)
18Nal diyara Yon dagu muluŋa tusu Farasi go yiŋ uriŋ tusu kiyaŋa. Iŋgura lem dip epe nigu Yesus miŋyaŋa, <<Yon dagu muluŋa tusu Farasi ragu muluŋa nal dip go yiŋ uriŋ tuwta, arya geragu go, giran uriŋ tuw kiyaŋya melaŋ?>> 19Iŋgura Yesus nigu ketuw dariyiy, <<Gorogoro dagu lem wela owgusu iŋgu iŋ kiŋ niŋgi debay yiŋ uriŋ tip? Yuŋ sip. Lem iŋgu kip go debay yiŋ uriŋ tipiraŋ yuŋ. 20Gu nal tiŋ lem iŋgu ow leŋgutiŋgu yiŋ gayt yamiy kip nal iŋgura yiŋ uriŋ tip,>> giy.
21Gugu sip lem diya yamel germiŋ baliya owsu, tapyow emem dagu esi berberi iŋgu sipuw kiyaŋya melaŋ. Iŋ gugu bitip go, tret yamel germiŋ indagu iŋgura tret tapyow esindagu okŋiŋ berberi beŋgoy tip. 22Tusu gugu sip lem diya sipsip tapay#2:22 Sipsip tapay sipyaŋa iŋgu wain mermera ragu. esi owsu wain germiŋ meraw kiyaŋya melaŋ yuŋ. Iŋ gugip go wain yu sipsip tapay wakorusu sipsip tapayingis arika saryip. Yiŋ sipsip tapay germiŋ owsu wain germiŋ merawta,>> giy.
Yesus iŋ sip iŋ Ewumboŋ, Yuda ragu yaŋ nal dagu
(Mat 12:1-8; Luk 6:1-5)
23Yuda ragu yaŋ nali diyara, Yesus muluŋan yiŋ isi wit aramay naŋonda palaŋutuw liyaŋa, iŋgura muluŋa nim yiŋda, wit egay dip wilyaŋa. 24Iŋgura Farasi yiŋ iŋgu neŋusu nigu Yesus miŋyaŋa, <<Muluŋa geragu giran kabol iŋgu bitusu Yuda ragu yaŋ nali kabolnim felyata?>> giyaŋa. 25Iŋgura Yesus nigu ketuw dariyiy, <<Indanis sip Taboŋ Dewit lem soŋni yiŋ isi esyaniŋtiŋ kabol bitiŋ niŋgi kisyaŋa iŋgu di weyyaŋda melaŋ sip yaŋ? 26Abiatar iŋ tawbi lem dagu taboŋ kiy. Nal iŋgura Dewit le Takela ragu fomyeyiŋ inda lowsu bret Takela galaŋa inaŋa iŋgu ownusu dip wiluw le lem soŋni yiŋ sayiŋ niyaŋa. Bret Iŋgu lem belak belak nuw kiyaŋya melaŋ, tawbi lemda niŋgi nuwta.>> 27Yesus atebaw nigu dariyiy, <<Takela welalem yakerayiy iŋgu sabat nal sebsebi ragu yuŋ. Iŋ sabat nali kerariy iŋgu welalem sebiyiyi nina. 28Giran Lem Urmiŋ iŋsip iŋ Ewumboŋ sabat dagu,>> giy.
Currently Selected:
Mak 2: Madi
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Bible Translators, Inc. All rights reserved.
