Ndûlù 3
3
Endûlù ya kasharhu
1Nie muntu wabwîne amalumwa g’akarhi k’obukunizi bwa Nyakasane.
2Ansunika embere zâge, angeza omu mwizimya, buzira kamole.
3Niene niene acikubûlîre okuboko buca buyira.
4Arhumire omubiri gwâni gwahorha kurhangirira oku irhwe kuhika omu magulu, amvunyungwîre orhuvuha.
5Ayimanzize eciri nka côgo ca malumwa n’amalibuko eburhambi bwâni.
6Anjugucîre omu mwizimya nka mufù gwa mîra-mîra.
7Anjirîre ecisikirizo mpu cimpanze okurhengamwo, anziriringa n’obudagulè.
8Nayâmire namuhamagala, ci omusengero gwâni arhaguyumvîrhîze.
9Anfukîre enjira n’amabuye magôye, enjira zâni aziyêrekeza ebwa kuhabuka.
10Anambêrîre nka mpangaza elingûzize, nka ntale ecifulisire omu ishaka.
11Enjira zâni azihindwîre: anandesire; ansizire kahumba, côbohwa.
12Afôzire omuherho gwâge, antega mpu ankoze.
13Anantulungwîre ensiko nieshi n’ebisonga byâge.
14Abantu boshi badwîrhe banshekera, lwâni ludwîrhe lwayimbwa buca buyira.
15Anyunjuzize malumwa, andalusize n’omutula.
16Anansêzize okukugurha olukalabuye, anantindagirira omu katulo#3, 16 «Kukugurha olukalabuye» ko kugalanjuka omu luvù..
17Anyasize akalamo k’omurhûla, nayibagira iragi kwo kuderha kurhi.
18Naderha nti; «Ntà kalamo nacibone, ntâbyo ncilangâlîre by’emwa Nyakasane».
19Kengêra amalumwa gâni n’obuhanya bwâni, ko buli nka bôge bwashakamira.
20Omurhima gwâni erhi gubikengêra, nieshi nnanjogonokerwe ebirumbu.
21Ci kwonô, kwo nkolaga nakengêra ntya, kurhume nalangâlira.
22Olukogo lwa Nyakasane lurhacîkwa, obuzigire bwâge burhaheka.
23Olukogo lwâge lushâshuka ngasi sêzi. Alà oku obwîkubagirwa bwâwe bwaluga, Nyakasane!
24Kwo ndesire: nti «Nyakasane ye kuhirhira kwâni, co cirhumire mmulangâlira#3, 24 «igwârhiro ly’okulangâlira ciru n’omu malibuko»: sinza Lul 16, 5; 73, 26. 3, 30; Iz 50, 6; Mat 5, 39.».
25Nyakasane abà mwinjà kuli ngasi yêshi umuyegemera, olya omulongereza.
26Kuli kwinjà okulangâlira omu kahwenyenye obucire Nyakasane ârhuma.
27Kuli kwinjà oku muntu okubarhula omuzigo gwa Nyakasane kurhengera oburhò bwâge.
28Aciyungulîre omu kahwenyenye amango Nyakasane amuhizireko amarhangulo.
29Ayunamirize kuhika amime akatulo, omu kulangâlira oku Nyakasane ayishimurhabâla.
30Irhama lyâge aliyêrekeze owamushûrha, anayêmêre bamuyiguse bijâci #3, 30 Sinza Mat 5, 39; Iz 50, 6. 3, 32: Abashi mpu: «Engoko enalabarhe omwâna wâyo erhi enamubwîne»: Nyamuzinda ye muzîre «Ntahwa lukogo».
31Bulya Nyakasane arhabà wa kukabulira omuntu omu nsiku zoshi.
32Bulya ciru ankamubabaza, kurharhuma arhamubabalira omu lukogo lwâge lunene.
33Bulya omurhima gwâge gurhasîma kugayisa abantu erhi kubarhindibuza.
34Gala mango balabarhanya ababohe b’omu cihugo boshi.
35Amango bagorombekanya olubanja lw’abanyinyi omu masù g’Ow’Enyanya bwenêne.
36Amango bayîmira omuntu okuli kwâge ekagombe; ka Nyakasane arhabona ebyo byoshi obwo?
37Ndi wankahashiderha akanwa kanabè? K’arhali Nyakasane ohiga?
38K’arhali kanwa ka Nyamuzinda w’Enyanya bwenêne kazûsa byoshi, ebibî n’ebinja?
39Bicigi lêro omuntu ankacîdudumira, akabà acizîne, n’obwo agwêrhe mabî manji?
40Rhulole bwinjinjà olugendo lwîrhu, rhushubire emwa Nyakasane.
41Rhushenge n’omurhima gwîrhu gwoshi, rhuyinamulire amaboko emwa Nyamuzinda oli omu mpingu.
42Rhwabîre babî na bagoma; nâwe orharhubabaliraga kuli okwo.
43Wacibwîkira omu bukunizi bwâwe, warhushimbulula, wanigûza buzira lukogo.
44Wacîyegulira enyuma ly’ecitù, mpu lyo ensengero zîrhu zirhagikuhikakwo.
45Warhujizire bikabulirwa, nka câmvu, omu karhî k’agandi mashanja.
46Abashombanyi bîrhu boshi bakazibumbûla akanwa barhusholoshonza.
47Ecôbà gwo gukolaga mwanya gwîrhu, kuhugalala, kusherêra, buhanya bwêne bwône.
48Amasù gâni gadwîrhe gahona nshalalo ya mirenge, erhi buhanya bw’olubaga lwâni burhuma.
49Amasù gâni yabîre nshôko erhahuba, garhâgoheka.
50Ndwîrhe nalinga oku Nyakasane ayûnama kurhenga enyanya, alolereze anabone:
51Ebi byarhinzire oku banyere b’omu cishagala ciru biri bya kundumîsa amasù.
52Abanshombera obusha bajà bampiva nka kanyunyi.
53Bantogîze omu mwîna nandi mugumagumà, bahira ibuye enyanya zâni.
54Amîshi gakazinzungulira aha nyanya z’irhwe; lêro naderha nti namâhera.
55Nakuyâkûzize kurhenga omu kuzimu, Nyakasane.
56Wanyumvîrhe oku nakubirikira: orhafukaga amarhwîri gâwe oku nsengero zâni n’ndûlù yâni.
57Amango nakuhamagalaga wanyegera wanabwîra, erhi: «Orhayôbohaga».
58We wambulânire, Nyakasane waciza obuzîne bwâni#3, 58 Nyamuzinda ye «mucunguzi» w’olubaga lwâge..
59Obwîne obubî banjirîre, Nyakasane, ontwîre luno lubanja.
60Wabwîne oku bacîhôla kuli nie, wabwîne emihigo yâbo kuli nie.
61Wayumvîrhe ebijâci byâbo, Nyakasane, n’emihigo yâbo mibî kuli nie.
62Enshambâlo n’enkegêro mbî z’abashombanyi bâni nie zidwîrhe zagerako buca-buyîra.
63Obone ebi badwîrhe bajira byoshi, nie nashubirage lwimbo lwâbo.
64Nyakasane, wayishibakolera ebiri nk’ebi bàmkolîre.
65Wâbatubâza obukengêre, gubè mulagi gwâwe mubî kuli bo.
66Wâbashimbûlula n’obukunizi bwâwe, obaherêrekeze lwoshi hano igulu.
Currently Selected:
Ndûlù 3: MKB
Highlight
Share
Copy
Want to have your highlights saved across all your devices? Sign up or sign in
Mashi Bible © BUKAVU Archdiocese of Bukavu, 2024.
