Yeremiya 50
50
Okushâbûka kwa Babiloni n’okurhenga omu bujà kwa Bene-Israheli
1Aka kali kanwa Nyakasane aderhezagya omulêbi Yeremiyahu kayêrekîre Babiloni#50, 1 Ebinwa bakômwîre Babeli byakumubwîra oku amâherêrekera. Ebi bikomwîre Israheli byakumubwîra oku alangâlîre, âciyagaluka. n’ecihugo c'Abakaldeya. 2«Muyâlîze ogu mwanzi ekarhî k’amashanja, mugushongêze, murhafulikaga akantu. Mubabwîre oku Babiloni agwâsirwe, Beli bamubonesize za mêmè, Marduki#50, 2 Bali ye na Marduki: muzimu w’e Babeli: Lolà Iz 46, 1; Bar 6, 40. anashângusire, enshanga zâge zikola hêru, ebyo bishwêka byâge byaherêrekîre. 3“Bulya ishanja lyarhenga njiranyanya lyamâmurhogera, lirimulwîsa, ecihugo câge lyamâcîhindula irungu: cirhakacibonekamwo ehiyîsa omûka. Abantu n’ensimba byoshi byàyâsire. Arhakaciyimbwamwo akantu”. 4“Mw’ezo nsiku na mw’ago mango gonènè, kwo Nyakasane adesire, bene Israheli bagaluka haguma na bene Yûda. Bagwârha enjira bajè balonza Nyakasane Nyamuzinda wâbo”. 5“Bayisha badôsa enjira yajà e Siyoni, yo munda bayêrekîre. Bayishire balibugâna Nyakasane, bafundike haguma naye endagâno y’ensiku n’amango, erya y’enkwîra erya barhakaciyibagira ciru n’eriguma”. 6“Olubaga lwâni lwàli lukola lubà busô bwa bibuzi bihezire. Abangere bâbyo bâli erhi babihabwîre, babireka byajà byagenda mihabuka omu ntondo. Ntà ntondo na ntà rhurhondo byacihabaga, byalinda biyibagira ecôgo c’aha kà”. 7“Abashombanyi barhangîriza babibuganaga, bakazibifomera burharhindira, banacidesa erhi: Ntà kubî rhwajizire, abà bantu babihire Nyamuzinda wâbo, ye wali bucire bwâbo bw’okuli na bulangâlire bwa bashakulûza bâbo”. 8“Yâki, murhenge e Babiloni, kwo Nyakasane adesire, murhenge mw’e ci cihugo c’Abakaldeya, mukubûle enjira, nka kula ebihebe bishokolera obusò”. 9“Bulya nkola nâhamagala omurhwe gw’amashanja manene guyishirhêra Babiloni. Abo bantu bayisha kurhenga omu cihugo ca njira nyanya, bagorhe Babiloni banamugwârhe. Emyampi yâbo erhagaluke cîru, nka kula omusirika w’entwâli arhagaluka maboko mûmu”. 10“Ecihugo c’Abakaldeya bâcihagula, ngasi boshi bayigurha bagambwe, kwo Nyakasane adesire”. 11“Nêci, musîme munacîshinge mwe mwanyagaga ebyâni! Mwanahashija mwahama nka mitwîra ya manina omu bulambo, n’okuyâma burhanzi”. 12“Mulole kuli nyoko erhi kwo, co cirigi cihugo cinyu cammuburhaga: enshonyi zàcibumbire, bikola byanshonyi kuli co, c’eco cikola ca buzinda omu gandi mashanja, irungu, bwêrûlè bûmu bûmu”. 13“Bukunizi bwa Nyakasane burhumire ciyôrha buzira muntu, coshi liri irungu. Ngasi boshi bagera hôfi na Babiloni bakazijuguma, bashungûrhe n’obwôba babona gurhi casherîre”. 14“Mwe nfôla-miherho mweshi, muyishe mugorhe Babiloni mumuzunguluke. Mumulikirekwo emyampi yinyu, murhayibabaliraga, bulà agomîre Nyakasane”. 15“Mumubandire orhuhababo rhwinyu rhw’ebîrha empande zoshi. Y’oyo wacilêrha alengezize amaboko. Emitungo yâge yashâbirwe, ebyôgo byâge byahondôsire. Lwihôlo lwa Nyakasane olwo, mucihôlage kuli Babiloni, mumukolere biri nka birya akolîre abandi”. 16“Mukûle muli Babiloni abahinzi n’abasârûzi. Ngasi muntu acîzibuke e ngôrho nkali, ashubire emwa benewâbo, ngasi muntu ayâkire omu cihugo c’emwâbo”. 17“Israheli ali akola ayôsire nka bibuzi bihezire, byajà byahivwa n’entale. Omurhanzirhanzi wabirirekwo ali mwâmi w’e Asûru. Enyuma z’okwo, ayisha mwâmi Nabukondonozori w’e Babiloni, amubederhera orhuvuha”. 18“Ntya kwo Nyakasane w’Emirhwe adesire, erhi: Nkolaga nahana omwâmi w’e Babiloni haguma n’ecihugo câge, nka kulya, mîra nahânaga omwâmi w’e Asûru”. 19“Cikwône nashubilongolana Israheli omu lwâbuko lwâge. Akerera oku ntondo ya Karmeli n’omu Bashani; arhâbule kantu oku ntondo ya Efrayimu n’omu cihugo ca Galadi-Akera, ayigurhe, anagambwe”. 20“Mw’ezo nsiku na mw’ago mango, kwo Nyakasane adesire, bâlonza obubî bwa Israheli, barhâcibubone, balonze ebyâha bya Yûda, barhâcibibone, bulya nâbabalira ngasi boshi basigîre”».
Babwîre Yeruzalemu oku Babiloni ârhoga âshanguke
21Murhêre ecihugo ca Meratayimu, murhêre n’abayûbaka e Pekodi, oyîrhe, onigûze abasigîre eyo munda, kwo Nyakasane adesire, oyûkirize ngasi byoshi nakurhegesire. 22Cihôgêro ca bîrha omu cihugo! Hoshi, lubî lunji lunji! 23Ka kwankanabà? Olya Babiloni wali nyundo yakâgivunyungula igulu lyoshi! Naye akavunyunguka bushangukizà. Abè irungu lya kuyôbohya omu gandi mashanja goshi! Nka gurhi obwo! 24Babiloni, nalikurhezire omulabarho. wamâgugwamwo orhan’ishi! w’oyu okola hêru, mîra bakusamaga! Bulya nie wali wamâhuma omu isù, niono Nyakasane. 25Nyakasane amâyigula embîko yâge. Omu bukunizi n’omu burhè bwâge akolaga ayêrekana emirasano akûzire mw’eyo mbîko. Babona omukolo gwa Nyakasane Nyamuzinda w’Emirhwe omu cihugo c’Abakaldeya. 26Murhenge empande zoshi, muyishire Babiloni, muhamûle enguli zâge! Mumulundike nsingansinga, munamusherêze. Arhacisigalagamwo kantu! 27Enfizi zâge zoshi, muzinigûze. Mujizimorogeza aha babâgira. Buhanya bwâbo, bamâhera, bulya amango Nyakasane abahanamwo gahisire. 28Yumvi olubî abayasire abo, abafulumusire e Babiloni, badwîrhe omwanzi e Siyoni, mpu: Nyakasane Nyamuzinda wîrhu anacîhôzire, anacîhôlîre aka-Nyamuzinda kâge katagatîfu.
Ecâha c’okugagaja Ntagagajwa
29Muhuluze enfôla-muherho zoshi, bajirhêra Babiloni. Bamugorhe, banamufukire orhusheshero rhwoshi. Bamugalulire obubî ajizire, bamukolere ebi akolîre abandi! Bulya arhambala Nyamuzinda, Mutagatîfu w’Israheli. 30Emisole yâge yoshi yâhirima omu mihanda yâge, n’abasirika bâge boshi bâfunyâla, bagukumuke olwo lusiku, kwo Nyakasane adesire. 31Wêshi oyu! wâni cibonè! Kwo Nyamuzinda, Nyakasane w’Emirhwe adesire, olusiku lwâwe lwayishire, nkola nkuyishîre, ndi kuhana. 32Ngasi ocîbona asârhala anahirime, na ntâye wamuzûsa. Ebishagala byâge nâbidulika muliro, gusingônole n’abamuzungulusire boshi. 33Ntya kwo Nyakasane Nyamuzinda w’Israheli adesire: «Bene Israheli na bene Yûda bàlibuzîbwe. Ababalulizagya babagwâsire buzibu, balahîre okubalîka. 34“Niono, Mufungizi wâbo, ndi muzibu, nie Nyakasane w’Emirhwe. Nafumbarha niene olubanja lwâbo, lyo ndêrha omurhûla omu igulu, n’akashâbo omu bantu b’e Babiloni”».
Omulâli gwa Nyakasane kuli Babiloni
35Engôrho oku Bakaldeya, kwo Nyakasane adesire, oku bantu b’e Babiloni, oku baluzi bâge n’oku bashinganyanya bâge! 36Engôrho oku balaguzi bâge bahurhiremwo irhwe! Engôrho oku basirika bâge, batwîke omurhima! 37Engôrho oku biterusi byâge, oku ngâlè zâge, oku mashanja ga ngasi lubero gamulwîrakwo; boshi bahinduke ngonyi za bakazi! Engôrho oku bahirhi bâge, boshi bahagulwe! 38Engôrho oku nyîshi zâge, zoshi ziyumûke. Bulya ciri cihugo ca nshusho za bazimu, ebyo bihenyango bihûsa ababiharâmya. 39Co cirhumire banyambwe na nyamugunga bayishiyunjula omu cishagala, enyunda zâyunjulamwo. Babiloni âyôrha buzira bantu oku nsiku zoshi, arhakacibêrwamwo emyâka n’emyâka. 40Namutulamya nk’oku najiraga Sodomo, Gomora n’ebishagala byàli eburhambi, kwo Nyakasane adesire. Ntà muntu ciru n’omuguma wâciyûbake muli ye, ntâye oyîsa omûka wâcibêre muli ye. 41Ishanja liyishe lyarhenga ebulembe, ishanja linene, abâmi b’obuhashe bârhenga ebwa kafende-fende k’igulu. 42Abasirika bâbo bajà bashaganya amatumu n’engôrho, bali nka by’êru bala barhabâlira ndi. Bajà bajira olubî nka kula enyanja ekungula. Bashonyire oku biterusi banacikeresire bwinjinjà oku lugamba lw’amatabâro, w’oyo bayishîre wâni Babiloni. 43Omwâmi w’e Babiloni obu ayumvîrhe ogwo mwanzi, amârhoga amaboko, entemu yamâmushamula ak’omukazi walumwa n’emikero y’okuburha. 44Kwo nâyôrha nka kula entale erhenga omu mashaka ga Yordani esôkere ebwa kahasi kabishi, kwo Nyakasane adesire. Mbalibirhe kwo boshi oku caligumiza. Okubundi nyimike omurhambo nacîshozire niene omu Babiloni. Ndigi wankacîgerera kuli nie. Na murhegesi ohi wakampigiza? 45Yumvagi lêro mulâli muci Nyakasane ajirîre Babiloni, mihigo mici arheganyîze abantu b’omu cihugo. Okunali, boshi bagenda bakululwa nka bibuzi kuhika oku muzinda-zinda. Ecihugo câbo naco cône câbakabulira n’entemu. 46Erhi ogwo mwanzi gunamanywa, mpu: «Babiloni agwâsirwe», igulu lyàdirhimana, ecihôgero cinene càmazûka omu mashanja goshi.
Currently Selected:
Yeremiya 50: MKB
Highlight
Share
Copy
Want to have your highlights saved across all your devices? Sign up or sign in
Mashi Bible © BUKAVU Archdiocese of Bukavu, 2024.
