Baruki 6
6
IV. Amaruba ga Yeremiya
Empamîso y’amaruba Yeremiya#6, 0 Yeremiya, omu cihebraniya ye YEREMIYAHU oyo enfarasè n’ecigereki byahindwîre Yeremiya, bulya enfarasè n’ecigereki bijira embaka z’okuhubula era herufi H, omu cihebraniya ba «h» bali basharhu: babiri b’ebiraka n’ola ohubulwa nka omu mashi, kiswahili n’ecingereza arhumiraga abàgwârhagwa bahêkwa bujà e Babiloni n’omwâmi w’e Babiloni, mpu ababwîre ebi Nyamuzinda amurhumire.
1Mwâlulizibwa na Nabukondonozori, mwâmi w’e Babiloni, muhêkwe e Babiloni, erhi ebyâha mwajizire birhuma#6, 1 Aga maruba gàlishambîre kuli ngasi baharâmya banyamuzinda bâbo b’obunywesi.. 2Hano muhika eyo Babiloni, mwâbêrayo myâka minji bwenêne, ciru kuhika oku maburhwa nda; ci kwône buzinda, nâmmurhenza eyo munda n’omurhûla. 3Kurhenga ene, eyo munda e Babiloni mwakaz’ibonayo banyamuzinda b’amarhale, ab’amasholo n’ab’emirhi, abakaz’ibarhulwa aha lurhugo banayôbohya amashanja bwenêne. 4Mumanye! Murhashimbaga okw’ebyo bigolo, erhi nîsi mpu mwayôboha abo banyamuzinda#6, 4 Lolà Yer 10, 1-16; Iz 40, 20. 5hano mukaz’ibona orhutù rhw’abantu rhuli enyuma n’embere zâbo rhwajà rhwabaharâmya. Ci munakaz’iderha omu murhima gwinyu, erhi: «Yâgirwa, Nyakasane, wênene rhukwânine okuharâmya.» 6Bulya malahika wâni ali ekarhî kinyu, ye washîbirira akalamo kinyu. 7Bulya, olulimi lw’ebyo bibomborogo lwakombezibagwa n’omulenga, banababwikirakwo ehyûla hy’amasholo n’amarhale; bibà bibomborogo, birhankahash’iderha ciru n’ehitya. 8Nka kula omwâna-nyere analongereza eby’omulimbo, abo bantu banarhôle amasholo batulemwo ishungwè bahira oku marhwe g’abo banyamuzinda wâbo. 9Haligi n’amango abadâhwa bâbo babazimba ago masholo n’ago marhale, bagakolêse oku makwânane gâbo bône, 10ciru banalinde bagahêkera n’abakazi b’ebishungu babêra omu nyumpa y’enyanya. N’abo banyamuzinda b’amarhale, b’amasholo n’ab’emirhi, banabayambike emyambalo nka bantu. 11Ci kwône bônene barhankacîcingakwo ngisha erhi nnundo, oku bayambîrhage ntyo emyambalo y’obwâmi, abantu bânakaz’ibahôrhola amalanga, bulya akatulo k’omu mpêro zâbo kanakaz’ibayudû kirakwo kanji bwenêne. 12Abo banyamuzinda, banabêmwo ofumhasire akarhi k’obukulu nka mucîranuzi wa cihugo, n’obwo ciru arhankahash’iyîrha owamujizire kubî, 13banabêmwo n’ofumbasire engôrho n’embasha, cikwône arhankacicinga oku bîrha n’oku bishambo. 14Kwo binaligi oku barhabà banyamuzinda, kuziga murhabayôbohaga! 15Nka kula endaha mbere erhakolêsibwa kuli bici, 16kwo n’abo banyamuzinda bali ntyo amango bamabahira omu mpêro zâbo: amasù gâbo ganayunjule katulo kabalazibwa n’abantu bajà omu luhêro. 17Na kula owajâcîre mwâmi bamuhamikira omu nyumpa, balinda okugend’imuniga, ntyo kwo abadâhwa bahamika empêro n’enyumvi buzibuzibu n’orhuhamikizo, mpu abo banyamuzinda bankahêkwa n’ebishumûsi. 18Banayâse orhumole rhunji rhunji kulusha orhu bankacîyâkiza bônene, n’obwo abo banyamuzinda barhankahash’ibona ciru n’akaguma mulirhwo. 19Kwo bali nk’era mitungo y’oluhêro: abantu banaderhe mpu enahabe erhi yanalundugusirwe omu ndalâlà, nabo ennundo erhenge omu idaho enabalundugurhe haguma n’emyambalo yâbo, barhanayumve. 20Barhabona oku busù bwâbo bwayiruhire n’omugî gw’omu luhêro. 21Bakubukubu, orhwiremberembe n’orhundi rhunyunyi, ebyo byoshi binakaz’ibabalalira oku mubiri gwâbo n’oku irhwe, ciru na babûsi banakaz’ibagerakwo. 22Co mwamanyirakwo eco oku barhabà banyamuzinda; kuziga murhahiraga mukabayôboha! 23Babà bashîge masholo g’okubayinjihya, ci kwône nka ntà muntu w’okukaz’igakulakwo engisha, bônene barhankagayinjihya mpu galangashane. Bulya erhi batulwa barhayumvagya akantu. 24Ebyo bibomborogo banabigule oku citwîro cidârhi. Ci kwônene birhayimbwâmwo mûka gwa buzîne. 25Kulya kubà barhajira magulu, banajè babarhulwa aha lurhugo, buzira hicikirizô, bajè bahûsa abantu amasù. Balya babarhumikira nabo zinali nshonyi kuli bo, bulya erhi bankarhibukira oku idaho barhankacizûsa bônene, kuhika abo bambali bâbo babarhabâle. 26Erhi abantu babayimanza, bônene barhankahash’icîdunda, bakabayimanza oluhengu, barhankaderha mpu baciyinamula bônene; n’erhi abantu babarherekêra entûlo, kunali nka kuzirhûla emifù. 27N’ebintu bàbarhulaga, abadâhwa bâbo banabiguze bacîboneremwo obunguke; ciru n’ebindi bakâbo babirhwêsemwo omunyu, barhanaderhe ciru mpu babihâkwo omukenyi n’omuzamba. Omukazi oli omu mugongo n’owaciburhaga, banahuma oku ntûlo z’abo banyamuzinda. 28Kuziga mwanamanyiraga kw’ezo nyiganyo oku barhabà banyamuzinda, murhakâg’ibayôboha! 29Kurhigi bankaderhwa Nyamuzinda menemene, n’obwo banakazirhumikira abo banyamuzinda b’amarhale, b’amasholo n’ab’emirhi? 30Abadâhwa banahêke engâlè omu mpêro zâbo, basharhule emyambalo bayambîrhe, bacîkungule emviri bamôme n’obwânwa, n’irhwe lirhali libwîkire: 31barhangirage balumba obwo n’okuyâmira embere za banyamuzinda wâbo nka bantu bali omu mishîbo. 32Abadâhwa banayanka emyambalo y’abo banyamuzinda bayiyambike bakâbo n’abâna bâbo. 33Abo banyamuzinda, obajirire kwinjà erhi kuligo, ntâco bankahash’imugalulira; barhankanahash’iyîmika mwâmi erhi kumuyîmûla. 34Na kandi barhankahash’ivangulira omuntu obugale nîsi erhi okumuhà ciru n’olusaranga luguma; nka hali owabuzire buyunjuliza eciragâne abajirîre, barhakahasha okumudôsa ecarhumire. 35Barhankayôkola omuntu omu lufù, erhi nîsi okurhenza omuzamba omu maboko ga cirimisi. 36Barhankahûrhûla omuhûrha; omuntu oli omu mbaka barhankamukûla muli zo, 37erhi okufà omukana bwonjo, erhi ciru okubabalira enfûzi. 38Abo banyamuzinda babwîke amarhale n’amasholo, kwo banali nka gala mabuye bahumba omu ntondo, ababarhumikira nshonyi zâbabumba. 39Kurhigi rhwankacîkebwa erhi kuderha nti bali banyamuzinda!. 40Abakaldeya nabo bône banababonêse nshonyi: gala mango babona akaduma bagend’ikayimanza embere za Baali, bamuhûne mpu oyo muntu aderhe, nka kuno oyo nyamuzinda wâbo ankahash’iyumva#6, 40 Abakaldeya, aha, badâhwa ba Baali badesirwe. Rhulole muli Dan 2, 2.; 41ci barhankahash’irhimanya kw’oko, bakabajandika, bulya ntà kurhimanya bagwêrhe! 42Abakazi banashwêkere omugozi ecibunu, baburhamale oku njira, barhangire bayôca omulolo ahâli h’enshangi, 43na muguma muli bo akakululagwa n’omugera wacîgerera mw’eyo njira, akagend’ihusha bo naye, nyamukazi erhi agaluka arhondêre okugayaguza owâbo mpu barhayumânîni naye, bulya yêhe ntâye nacîmwishozire, n’omugozi gwâge ntâye wagutwîre. 44Ngasi byoshi biyêrekîre abo banyamuzinda, bunali bunywesi; kurhigi bankalolwa erhi kuderhwa mpu bali banyamuzinda? 45Babinji ba mirhi babakolaga n’abatuzi b’amasholo, barhankanahinduka mpu bashusha kundi-kundi okurhali kulya abo balenga balonzagya mpu bayôrhe. 46Ciru n’abo bàbakolaga bône barhankalama myâka minji. 47Kurhigi obulenga bw’amaboko gâbo bwankaba banyamuzinda? Ntyo kwo abo bantu bayishisigira iburha lyâbo obunywesi n’enshonyi. 48Ebîrha bikayishira abantu erhi mbaka ndebe, abadâhwa b’abo banyamuzinda bânajire ihano ly’okulonza ngahi bagend’icîfulika haguma na banyamuzinda bâbo. 49Kurhigi barhankamanywa oku barhali banyamuzinda abarhankahash’icîfulumula omu bîrha erhi kucîcinga omu mbaka? 50Binabà bintu bishîge amarhale n’amasholo, buzinda byâyish’ibonekana oku bunali bunywesi bwône; embere za boshi, embere z’abantu n’amabî, n’oku ntà cijiro ciru n’eciguma ca Nyamuzinda cibabâmwo. 51Ndigi yeki orhabwîni oku kwo kunali abo barhali banyamuzinda. 52Bulya barhankayimika mwâmi omu cihugo, erhi okuniekeza abantu enkuba; 53barhankatwa emmanja z’abantu, erhi kuciza olagirizîbwe, kwo banali kula hungwe abalala emalunga, ntà buhashe bajira. 54Oluhêro lw’abo banyamuzinda babwîke amarhale n’amasholo erhi lwankagwârha muliro, abadâhwa bamwo banacîyâkire bafumye akakoba kâbo, ci bôhe banasingônoke nka bisinde bya mirhi omu karhî k’engulumira. 55Barhankahash’ilwîsa omwâmi erhi nîsi omushombanyi. 56Kurhigi omuntu ankayêmêra erhi kucîkebwa mpu bali banyamuzinda? 57Abo banyamuzinda babwisirwe ecûla c’amarhale n’amasholo, barhankahash’icîfulumula omu maboko g’ebishambo erhi g’abanyazi, abacîgwârhîre mîsi babanyaga ago masholo n’amarhale, babihêke haguma n’emyambalo bàlibayambisire, ciru barhankahash’icîrhabâla. 58Kuziga okubà mwâmi wayêrekana oburhwâli kwo kukulu; nîsi erhi ecirugu c’omu nyumpa cakolêsibwa na nnaco co cikulu kulusha abo banyamuzinda b’obunywesi; erhi ciru olumvi lw’omu nyumpa luyigalira ebirugu bimuli, lwo lukulu hali abo banyamuzinda. 59Izûba, omwêzi n’enyenyêzi bimoleka bijire omukolo byahîrwe, binaguyunjulize; 60omulazo nagwo, gukalangashana gunasimîse amasù; empûsi enahûse omu ngasi cihugo, 61ebitù nabyo biyûkirize irhegeko byahîrwe na Nyamuzinda ly’okugera omu igulu lyoshi; n’omuliro gumanuka emalunga gusingônola entondo n’emizirhu, gunajire omukolo gwarhumirwe. 62Ci kwône, abo banyamuzinda barhahisiri kw’ebyo oku bwinjà n’oku buhashe. 63Kuziga ntâkwo rhwankacîkêbwa erhi kuderha nti bali banyamuzinda, bulya banayabirwe n’okucîranula, barhankanakwânana abantu bici. 64Mumanyirage obwo oku barhali banyamuzinda, murhabayôbohaga! 65Bulya barhankahash’ihehêrera mwâmi erhi kumusûhira obwangà, 66ntà cimanyîso c’oku nkuba bankahash’iyêreka abantu, barhankalangashana nk’izûba erhi kumoleka nka mwêzi. 67Ensimba z’erubala zibalushire: bulya zôhe zinalibirhire ahâli ecigala zicîfulike abazishimbire. 68Ntà kantu ciru n’akaguma kankayêrekana oku bali banyamuzinda, kuziga murhabayôbohaga! 69Abo banyamuzinda bâbo b’emirhi bashîzirwe amasholo n’amarhale, kwo banali nka cisinde cigwîke omu ishwa ly’emyungu, co cirhalanga cici. 70Nîsi erhi nk’ishaka lya mishûgi omu karhî k’ishwa, lyo lirhwâkwo ebinyunyi bya ngasi lubero, kandi erhi nka murhumba bakabulîre omu mwizimya, ntyo kwo bali abo banyamuzinda b’emirhi bashîzirwe amasholo n’amarhale. 71Omu kubona emyambalo y’akaduku n’ecitâni byababolerakwo, lyo mwankamanya oku barhali banyamuzinda. Cazînda nabo bône balundugurhwa, bayish’ihinduka nshonyi. 72Omuntu mushinganyanya orhagashâniza nshusho ya muzimu ye mukulu, yeki wâyish’ifulumuka enshonyi!
Currently Selected:
Baruki 6: MKB
Highlight
Share
Copy
Want to have your highlights saved across all your devices? Sign up or sign in
Mashi Bible © BUKAVU Archdiocese of Bukavu, 2024.