Baruki 2
2
1Co cirhumire Nyakasane ayunjuliza akanwa aderhaga kuli rhwe, oku bacîranuzi bîrhu balirhegesire Israheli, oku bâmi n’abarhambo bîrhu, oku bantu b’Israheli n’ab’e Yûda, 2hano idako ly’amalunga harhasâg’ijirwa ebiri nk’ebi ajizire aha Yeruzalemu, nka kulya binayandisirwe omu Irhegeko lya Mûsa; 3kuhika rhwalinda rhuhika aha omuntu alya enyama y’omugala, owundi naye alyè enyama y’omwâli. 4Na kulusha aho, Nyakasane abahâna omu buhashe bw’amâmi garhuzungulusire goshi, mpu lyo rhubà masheka na binioko emw’abantu b’ebihugo birhuli eburhambi n’obundi, ebi Nyakasane arhushandabanyizemwo. 5Rhwabà bashizi, ahâli h’okubà barhegesi, bulya rhwàbîhîre Nyakasane Nyamuzinda wîrhu, erhi rhubula buyumvîrhiza izù lyâge. 6Obushinganyanya bunali bwa Nyakasane Nyamuzinda wîrhu, ci kuli rhwe na kuli balarha, nshonyi ebusù nk’oku binabonekîne ene. 7Ebi Nyakasane aderhaga kuli rhwe byoshi, ago mahanya goshi gacihonda kuli rhwe. 8Rhurhashengaga obusù bwa Nyakasane nti ahindule enkengêro z’omurhima mubî gwa ngasi muguma muli rhwe. 9Nyakasane naye abîkirira ago mahanya ànarhurhumirago; bulya Nyakasane abà mushinganyanya mw’ebi àrhurhegekaga mpu rhujire byoshi, 10ci kwône rhurhayumvirhizagya izù lyâge lyarhubwîraga mpu rhukaz’igera omu njira y’amarhegeko Nyakasane ahizire embere zîrhu.
Omusengero gw’amingingo
11Lêro bunôla, Yâgirwa Nyakasane, Nyamuzinda w’Israheli, we warhenzagya olubaga lwâwe omu cihugo c’e Mîsiri n’okuboko kwâwe kuzibuzibu, omu bimanyîso n’ebirhangâzo, oku buhashe bunene n’okuboko kulambûle, wacîbonera ntyo Izîno ly’irenge kuhika ene#2, 11 Okurhenga omu bujà bw’e Mîsiri kw’oluhaga lw’Israheli, kwarhuma irenge lya Nyamubâho lyalengerera; okwo kwarhuma babà n’obulangâlire omu ngasi cijiro c’obucire. Omu kucihà olukengwa, Nyamubâho ayôkola Buyahudi baguma (Bar 2, 11-18), ci, barhali balingânîne okubabalirwa (Bar 2, 19-26), cikône Nyamubâho abamanyîsa oku olubaga lwâge lucîyunjuze lunamugalukire (Bar 2, 27-35). Isâla ly’okucîyunjuza (3, 1-8).. 12Yâgirwa Nyakasane, Nyamuzinda wîrhu, rhwajizire ebyâha, rhwalogosire, rhwabuzire obushinganyanya oku marhegeko gâwe. 13Ojire obukunizi bwâwe burhugere kulî, bulya rhukola rhusigîre mâhungà masungunu omu karhî k’amashanja warhushandabanyizemwo. 14Yâgirwa Nyakasane, oyumvîrhize ensengero n’endûlù yîrhu, orhucize erhi lukengwa lwâwe lurhumire, orhuyêrekeze olukogo lwâwe embere z’abantu bàrhûlûlizagya, 15lyo n’igulu lyoshi limanya oku we Nyakasane Nyamuzinda wîrhu, bulya Israheli n’iburha lyâge Izîno lyâwe bayirisirwe. 16Yâgirwa Nyakasane, olole kurhenga ebwa ndâro yâwe ntagatîfu, orhukengêre: rhega okurhwiri, orhuyumvîrhize; 17lambûla#2, 17 lambûla amasù, kandi erhi: «bungûla amasù» amasù gâwe Nyakasane, obone: emifù y’ekuzimu, eyarhenzibwe omûka omu mubiri, arhali yo yankahà Nyakasane irenge n’obukuze, 18ci omurhima gugogomirwe bwenêne, omuntu wagenda ayûnamirize anajogonokîrwe; amasù gali buzimangana, n’omurhima gushâlisire, byo bya nkakuhà irenge n’obukuze, Yâgirwa Nyakasane!#2, 18 «Abîrhôhye b’en’igulu» bwo balanganyizibwe obucunguzi (Lolà Sof 2, 3).
19Rhurhacîkubagiri makwânane ga balarha erhi ga bâmi bîrhu obu rhwadubulira ensengero zîrhu embere ly’obusù bwâwe, Yâgirwa Nyakasane, Nyamuzinda wîrhu. 20Bulya warhurhulirekwo oburhè n’omutula gwâwe, nk’oku wanaderhaga mîra omu kanwa k’abalêbi bambali bâwe, amango waderhaga, erhi: 21«Ntya kwo Nyakasane adesire: Mugombye ebirhugo, murhumikire mwâmi w’e Babiloni, lyo muyishibêra omu cihugo nahâga bâsho. 22“Ci akabà murhayumvîrhîzi izù lya Nyakasane ommubwîzire mpu murhumikire omwâmi w’e Babiloni”, 23“ncijira kwoshi kuhika izù ly’amasîma n’omwîshingo, izù ly’omuhya-mulume n’ery’omuhya bizimangane omu bishagala bya Yûda birhenge n’omu Yeruzalemu, ecihugo coshi ciyôrhe bwâmwa, cirhâciyimbwemwo muntu”. 24“Ci kwône rhurhayumvirhizagya izù lyâwe lyakâg’irhubwîra mpu rhurhumikire omwâmi w’e Babiloni, lêro wayunjuliza ntyo ebinwa waderhaga omu kanwa k’abalêbi bambali bâwe, erhi: Amavuha g’abâmi bîrhu n’amavuha ga balarha gabishûlwa aha gàli omu nshinda.”» 25Go gano ganakolaga galangisirwe oku idûrhu ly’omûshi n’oku mboho y’olubula lw’obudufu; bafîre omu malumwa madârhi, g’ishali n’engôrho n’obukagwa, 26n’eyi nyumpa yakâg’iderhwa izîno lyâwe wayihindwîre yayôrha nk’oku enakola eyôsire ene, erhi bugamba bw’enyumpa y’Israheli n’enyumpa ya Yûda burhuma.
27Ciru na ntyo, Nyakasane, kwo warhujirîre nk’oku obwonjo bwâwe bunali n’obutûdu bwâwe bunji bwenêne, 28nk’oku wanali erhi wadesire omu kanwa ka mwambali wâwe Mûsa lulya lusiku wamurhegekaga mpu ayandikire Irhegeko lyâwe embere lya bene Israheli, waderha, erhi: 29«Mukabà murhayumvîrhîzi izù lyâni, mwabona oku oyu nyamugege w’abantu yêshi anyiha, babè mâhungà ga bantu omu karhî k’amashanja nayîsh’ibashandabanyamwo, 30bulya mmanyire oku barhanyumve, bali lubaga lwa cikanyi-cirhagomba. Ci kwône bacicijà emurhima bônene mw’eryo ihanga lya bene balulizibwemwo, 31banamanye oku nie Nyakasane Nyamuzinda wâbo. Nabahà omurhima n’amarhwîri g’okuyumva. 32Bampêra irenge mw’eco cihugo balulizibwemwo, bakengêra izîno lyâni; 33barhâcibè bacikanyi-cirhagomba; bashologorhwa n’ebijiro byâbo bibî bakengêra omwanya gwa bîshe bagomeraga Nyakasane. 34Okubundi nshub’ibagalula omu cihugo nalaganyagya bîshe wâbo Abrahamu, Izaki na Yakôbo, baciyîmemwo. Nâbaluza barhanacinyihe. 35Nâbayîmangiza endagâno y’ensiku n’amango, lyo mbà Nyamuzinda wâbo, nabo babè lubaga lwâni. Ciru n’olubaga lwâni lw’Israheli ntakacilurhenza omu cihugo naluhîre.»
Currently Selected:
Baruki 2: MKB
Highlight
Share
Copy
Want to have your highlights saved across all your devices? Sign up or sign in
Mashi Bible © BUKAVU Archdiocese of Bukavu, 2024.