Mathayi 6
6
Malongi matadidi lusadisu lwa batsukami
1«Kebenu mu kusadila masonga menu ku thwala ya batu, mu kudimonikisa. Kondilo, lwatámbulaku ndandu kwena Tata wenu wuna wenina mu mazilu. 2Disongidila tangwa wisi hana kabu dya khenda, wutaku kindanda ku thwala ya ngeyi meni, bwosu bisibwa sala bakavungalosi mu nzu za kimvuka za Bayuta yi muna phambu: ndangu babazatula kwena batu. Mu kyedika yiluzimbwadi, bátambula kedi hakana ndandu ya bawu. 3Kaasi tangwa wisi hana kabu dya khenda, koku dyaku dya kimama dizayaku mambu mana dibati sala koku dyaku dya kitata, 4ndangu kabu dyaku dya khenda dyasalama mu kitsweki; amana Tata waku, wuna wisi mona mu kitsweki, kakuvutwaladya.»
Malongi matadidi lombilu
(Luk 11:2-4)
5«Tangwa lubati lombila, lukalaku hanga bakavungalosi: bana bisi zola kulombila mutendendi muna nzu za kimvuka za Bayuta yi muna pfumba za mabala-bala ma mbuta, mu kudimonikisa kwena batu. Mu kyedika, yiluzimbwadi: bátambula kedi hakana lufutu lwa bawu#6:5 Luk 18:11. 6Kaasi ngeyi, tangwa wubati lombila, kota kuna suku dina dya tsuka, phata mwelu amana lombila Tata waku wuna wena mu kitsweki, wisi mona mu kitsweki, kakuvutwala.»
7«Amana mu kulombila, lulutikisakaku ndinga, hanga baphani; bisi banza ni mu kulutikisa ndinga babáyukila kwena banzambi ba bawu. 8Disongidila lubasokululaku, mukuma Tata wenu zayi keti biki lwenina byawu mupfunu ku thwala ya kumulombabya.» 9Disongidila talenu buna lufwani kulombila:
"Tata wetu wenina muna mazilu,
yambula khumbu yaku batomisaya,
10Kipfumu kyaku kisa,
luzolu lwaku lwahangama ha tsi, hanga ku zilu.
11Tuheka lelu madya metu ma kosu kilumbu.
12Amana tulolula mitsoki myetu,
bwosu thwisi lolula betu phi kwena bana bisi tukota mbi.
13Amana wutuyambulaku ni twabwa mu kimeka,
kaasi tuhulula kwa Mbi."
# 6:13 Mu ndambu ya mikanda mya tsukinina lwesi mwenina bisona byabi byenina mu khunga. [Mukuma kwena ngeyi kwenina luyalu, ngolu yi khembu, mvula muna mvula, Abwabuna.]
14«Amana, yukani lwisi lolula kwenu bakwenu mitsoki mya bawu, Tata wenu wenina ku zilu kalúlolula benu phi. 15#6:15 Ywn 2:13Kaasi yuka lwisiku lolula kwena batu, Tata wenu kalúlolulaku benu phi mitsoki myenu.»
Mutindu wa kuzila madya
16«Amana tangwa lwisi zila madya, lukalakaku yi mbunzu ya kiwayi, bwosu bisi hanga bakavungalosi: bisi kasa mbunzu mu kusongila kwena batu ni bawu bazidi madya. Mu kyedika, yiluzimbwadi, batambudi kedi ndandu ya bawu. 17Kaasi ngeyi, tangwa wubati zila madya, tomisa khambu ku mutwa amana sukula mbunzu, 18ndangu wumonikisaku kwena batu ni wubati zila madya, kaasi kwena Tata waku wuna wenina hakana mu kitsweki amana Tata waku wisi mona muna kitsweki kakuvutwalakya.»
Bimvwama muna zilu
(Luk 12:33-34)
19«Ludilumbikilaku kuvwa ha tsi, henina yi batseledi yi mboku byisi zanga yi befi bisi lungula ndangu bayiba. 20Kaasi dilumbikelenu kuvwa kwenu muna zilu, mwamuna mwakonda kala keti tseledi keti mboku bisi zanga, amana kweku keti befi balenda lungula keti kuyiba. 21Mukuma hana hena kuvwa kwaku, hahana phi hakála mbundu yaku.»
Mwinda wa lutu
(Luk 11:34-36)
22«Disu dyenina mwinda wa lutu; ho disu dyaku dyakala bukheti, lutu lwaku lwosu lwakála mu mutemu#6:22 Mu tangwa dya Yesu, batu bakala bongila disu hanga kisina kya myesi. Bakala banza ni disu dyakala kitini kya lutu kina kisi yinika kitembu holo mbundu ya mutu. . 23Kaasi, yukani disu dyaku dyakala dyambi, lutu lwaku lwosu lwakála mu phipha! Honi, disongidila, mutemu wuna wenina mwena ngeyi wakala phipha, mu khi mutindu wa phipha wakála!»
Nzambi ho mbongu
(Luk 16:13)
24«Kamutuku walenda kusadila bapfumu bodi: Holo, kamumenga mosi amana katonda mukwawu; holo, kadinama kwena mosi amana kamubwisa mukwawu. Lwalendaku, lwasadila Nzambi yi mbongu.»
Kukala yi kivuvu mwena Nzambi
(Luk 12:22-31)
25«Ihanani yiluzimbwadi bwabu: ludiyangisaku, kikuma kya luzingu lwenu, keti biki lwadya holo keti biki lwanwa, keti kikuma kya lutu lwenu, keti biki lwavwáta. Luzingu lulutiku madya, amana lutu kuluta muledi? 26#6:26 Mupfunu wa Yesu wakala ni balonguki babakisa, Nzambi kabaheka madya mana benina mawu mupfunu. Talenu banuni ku zilu, bisiku kuna, bisiku katula mbutu, bisiku sweka kima mu khila; amana Tata wenu wenina ku zilu kisi badisa! Benu lweku mupfunu lawu kuluta bawu? 27Amana nati mu kati dya benu walenda, muna nyengi dyandi, kukosikila keti koma katangwa dya luzingu lwandi?
28«Amana biki lwisi dinyengina kikuma kya muledi? Talenu abweti bisi mena bithundu bya mu bilanga: bisiku sala, bisiku londa, 29amana yiluzimbwadi ni keti Solumoni#6:29 Solumoni kakala mvwama wa mbuta ha kati dya bakyamvu boosu ba Kiseledi (1Ba 10:23). Solumoni kazinga mu tangwa dya mvula khama vwa ku thwala tangwa dya Yesu. , muna khembu yandi yosu, kavwataku hanga mosi wa byawu. 30Amana yukani Nzambi kisi vwatisa buna mwangu wa bilanga wuna wena hana lelu amana mbasi balosiwa ku mbawu, abweti kalendabwoku sala kuluta, kikuma kya benu, batu ba lukwikilu lwa khunda? 31Disongidila ni ludinyengaku, mu kuzonzaka: "Biki twadya? Biki twanwa? Holo biki twavwata? 32Mukuma bima bina byosu, byabina bisi sanda batu ba makanda moosu, konda kulembwa. Mukuma Tata wenu wenina ku zilu zayi ni mupfunu luvwibya. 33Kaasi sandenu theti Kipfumu kya Nzambi yi masonga mandi, amana bina byosu baluyikabya. 34Disongidila ni ludinyengaku kikuma kya mbasi; mukuma mbasi kadinyenga kikuma kya yandi meni. Mu koosu kilumbu kifwanani yi phasi za kyawu.»
Currently Selected:
Mathayi 6: YAF
Highlight
Share
Copy
Want to have your highlights saved across all your devices? Sign up or sign in
©2022 Seed Company in coordination with Forum Communautaire des Traducteurs de la Bible et Alphabétisation
