Mathayi 4

Kuhukumuka kwa Yesu

(Mlk 1:12-13; Luk 4:1-13)

1Hanga Yesu bamunatisi, kwena Kitembu, muna nganga, ndangu bamuhukumuna kwena kiphidi-mutu#4:1 Kiphidi-mutu kenina pfumu wa bitembu bya mbi byosu. Kakala theti wanzyo mosi ku zilu, kaasi kahanga wusi lulendu ku thwala ya Nzambi. Nzambi wamukukwasa ku zilu amana buthwena kisi hukumuna batu ha tsi. Tala khumbu zandi zahika Satana zina zena mu Bibila: «Belezebula»: «mbeni» yi «muhukumuni». . 2Amana kunima kuzila kudya bilumbu maku-maya bya mwini yi phipha maku-maya, wáyuka nzala. 3Amana muhukumuni#4:3 Muhowu wawu muhukumuni wubati fwanakana yi kiphidi-mutu, pfumu wa bitembu bya mbi. Kulemvula batu kwena mosi wa mihangu myandi. Koosu tangwa, kisi meka kusumuna batu. wisa bwesuka, wámuzimbwala: «Yukani #4:3 Nzambi tata kenina Tata wa mwana wandi, Yesu Kidisitu, bweku phila mosi yi mutu wuna wena tata wa bana bandi. Bibila dibati muheka Yesu khumbu ya Mwana (Mwana wa yakala) wa Nzambi mu kusongila ni Yesu phila mosi kenina yi Tata wandi. Mwana wa Nzambi wenina, zimbula kwena matadi mama, makituka mapha.» 4Amana, yandi wámuvutwala: «Tala mana másonama: "Mutu kazingilaku mu madya lwesi, kaasi mu ndinga yosu yina yisi lubuka mu munwa wa Nzambi".»

5Hanga Kiphidi-Mutu wumunati ku Yelusalemi, mbanza yatoma, wumunenginiki hana kisoka kya mudilu wa nzu ya Nzambi, 6amana wumuzimbwadi: «Yukani Mwana wa Nzambi wenina, tsutsuka ha tsi, mukuma tala mana masonama:»

"Kahana kwena banzyo bandi miswa kikuma kya ngeyi,

amana bakwisa kuyaka muna moku ma bawu,

ndangu kitambi kyaku kidikhukulaku ku tadi dimosi."

7Yesu muvutwadi: «Tala mana másonama hika: "Wamekaku Pfumu, Nzambi waku."»

8Kiphidi-mutu wámunata hika ha mongu wa kaleyi lawu, wámusongila bipfumu byosu bya tsi yi khembu ya byawu, 9amana wumuzimbwadi: «Yikuheka bima bina byosu, yuka ni wabwa mu bitambi byama mu kufukama ku thwala meni.» 10Hanga Yesu wumuzimbwadi: «Katuka Satana! Mukuma tala mana másonama: "Ku thwala Pfumu, Nzambi waku, lwesi wafúkama amana yandi lwesi wasámbila."» 11Hanga kiphidi-mutu wumusisi. Amana banzyo bábwesuka amana bekina musadila.

Yesu wuyandikini kisalu kyandi ku Ngadidi

(Mlk 1:14-15; Luk 4:14-15)

12Amana buna káyuka ni Yowani bamulambudi, hanga wáyombuka ku Ngadidi. 13Amana wákatuka ku Nazaleti, wenda kala ku Kafadinawumu, ku mukinda wa nzadi, muna milambu mya Zabuloni yi Nefutadi. 14Ndangu dyalungila dyambu dina bázimbula mwena mbikudi Yesaya:

15«Tsi ya Zabuloni, tsi ya Nefutadi,

mukinda wa nzadi, yi kuna sambwa dya Yolutani,

Ngadidi ya makanda ma batu!

16Kanda dina dyákala mu phipha,

dimoni mutemu wa lawu!

Yi kwena bana bázakala mu kinzunga yi mu kivula kya lufwa,

mutemu wumosi wumoniki kwena bawu!»

17Tuka tangwa meni dina, Yesu wáyandika kusamuna yi kulonga: «Balumunenu mbundu zenu mukuma Kipfumu kya mazilu kibwesukini!»

Balonguki baya batheti ba Yesu

(Mlk 1:16-20; Luk 5:1-11)

18Amana Yesu buna kakala kangala muna mukinda wa yanga dya Ngadidi, wámona baphangi bodi, Simoni, wuna bisi tela Phetelu, yi Andele myaki wandi; bakala losa wanda dimosi muna nzadi, mukuma balobi bákala. 19Hanga wubazimbwadi: «Alwisa ndanda, amana yilukitula balobi ba batu.» 20Amana bawu, muna mbala mosi, básisa mawanda, benda mulanda. 21Amana buna kaphusana, wámona baphangi bahika bodi, Zyaki mwana wa Zebeteya yi Yowani, phangi wandi, bákala muna mudimba yi tata wa bawu Zebeteya, bakala yilulula mawanda ma bawu. Yesu wabatela; 22Amana bawu muna mbala mosi básisa mudimba yi tata wa bawu, amana bámulanda.

Yesu kisi longa amana kisi belula

23Amana kakala kwenda muna Ngadidi yosu; mu kulonga muna nzu za kimvuka za Bayuta za bawu yi kusamuna Musamu wa Bukheti wa Kipfumu kya mazilu, amana kakala belula maladi moosu yi bimbefu byosu mu kati dya batu. 24Amana khululuka ya yandi yámwangana mu mulambu wosu wa Sidiya. Amana bakala munatina batu boosu bana bakala bela, bana bákala yi makhasi ma mutindu yi mutindu yi miyangu mya bitembu bya mbi yi bakwa kikhoni, yi khonzu, amana wubabeludi. 25Milumba-lumba mya batu bakala mulanda; tuka mu Ngadidi yi kuna mulambu wa Mbanza Kumi yi ku Yelusalemi yi ku Yuteya yi ku sambwa dikwawu dya Yolutani.

Currently Selected:

Mathayi 4: YAF

Highlight

Copy