Mathayi 22

Kingana kya mukinzi wa longu

(Luk 14:15-24)

1Yesu wázonzila hika mu bingana; wuzimbudi: 2«Kipfumu kya mazilu kifwanakani yi kyamvu mosi wáta mukinzi wa longu lwa mwana wandi wa yakala. 3Amana wátuma basadi bandi benda tela batu bana kátedisa ku mukinzi wa longu; kaasi bázolaku kukwisa. 4Wátuma hika basadi bakwawu, mu kuzimbula: "Zimbulenu kwena bana thedisiki: Tala, ngidiki kedi madya mama, miluma mya bangombi yi bambisi bahika ba senga babahondi, byosu byayilama; alwisenu ku mukinzi wa longu!" 5Kaasi bawu bálewula, benda kwabawu, mosi wenda ku kilanga kyandi, mukwawu wenda ku kikhita kyandi; 6amana bakwawu, bábakwata basadi bandi, bábatukwana, amana bábahonda. 7Kyamvu wáyuka khabu: amana buna kátuma baphumbulu bandi, wáhondisa bandwandwa bana yi mbanza ya bawu phi wáyokisaya. 8Hanga wuzimbudi kwena basadi bandi: "Mukinzi wa longu wuyilami, kaasi batu babana bátedisa bákalaku kwatakani kikuma kya wawu. 9Hangenu lwenda muna phambu za nzila, amana tedisenu, ku mukinzi wa longu, boosu bana lwawána." 10Buna bálubuka basadi bana mu nzila, bákutikisa batu boosu bana báwana, ba mbi yi ba mboti; nzu ya mukinzi yábasa yi batu. 11Amana buna kákota kyamvu mu kutala batu bana kátedisa, wámona mwamuna mutu mosi wakonda vwata muledi wa mukinzi wa longu. 12Amana wumuzimbwadi: "Mukwetu, abweti wukotidi mwamu konda muledi wa mukinzi wa longu?" Kaasi yandi kámonaku kima kya kuvutula. 13Hanga kyamvu wuzimbudi kwena basadi: "Mukasenu moku yi malu, amana mulosenu ku nzila kwena phipha; kwakuna kwakála bidilu yi makwenzi." 14Mukuma balawu bátela, kaasi bakhunda básolama.»

Phaku ya Khayisala

(Mlk 12:13-17; Luk 20:20-26)

15Hanga bafwadisi bendi kasa kifwandu, bamuleya ndangu bamukwatila mu ndinga. 16Amana batumini balonguki ba bawu kwena yandi ha kimosi yi ndambu ya batu bana bakala landa Helodi, mu kuzimbula: «Mulongi, tuzayi ni kyedika wisi zonza ngeyi amana wisi longa nzila ya Nzambi mu masonga. Weku yi bweya bwa mambu mana bisi banza batu mukuma wisiku tala mbunzu za batu. 17Tuzimbwaleti si buna wisi banza ngeyi: bulombi mu kufuta phaku ya Khayisala#22:17 Ku kisina, Khayisala yákala khumbu ya mutu, kaasi ku manima báyandika kusadilaya hanga khumbu ya «mwata-yamvu», bwosu bazonzidiya haka: «mwata-yamvu wa Loma» ho loni?» 18Kaasi Yesu, bwosu kázaya mabanza ma bawu ma mbi; wuzimbudi: «Kikuma kya biki lubati ndeyila, bakavungalosi? 19Tsongilenu mbongu zina bisi futa phaku.» Bawu bámusongila fwalanga dimosi, 20amana wábahyula: «Mbunzu yi khumbu yayi básonika haka, bya nati?» 21Bamuzimbwadini: «Bya Khayisala». Hanga wubazimbwadi: «Disongidila, hanenu mambu ma Khayisala kwena Khayisala, amana mambu ma Nzambi kwena Nzambi.» 22Buna báyuka bwabuna, báyituka, amana bámusisa, benda kwa bawu.

Kyufu kimosi kikuma kya lufutumuku

(Mlk 12:18-27; Luk 20:27-40)

23Muna kilumbu meni kina, ndambu ya Basadise, bana bisi zimbula ni kweku lufutumuku, bábwesuka kwena yandi, amana bámuhyula 24mu kuzimbula: «Mulongi, Moyize kázimbula: "Yuka ni mutu mosi kafwa konda kubuta mwana, myaki wandi kafweti kwela mufwidi ndangu katombula kikanda kya phangi wandi." 25Kinga, kwákala kwena betu, yi baphangi ba bayakala tsambwadi; amana watheti wákwela, wáfwa; amana konda kusisa dibuta, wásisa mufwidi wandi kwena myaki wandi. 26Busalami phila mosi kwena wuna wazodi, yi watatu, yi kuna kwa wuna watsambwadi. 27Amana kunima dya bawu boosu, mukhetu wáfwa. 28Mu kilumbu kya lufutumuku, mukhetu wa nani kakala, ha kati dya bawu tsambwadi? Mukuma boosu bámukwela!» 29Amana mu kuvutula, Yesu wubazimbwadi: «Luditotisi kikuma lwisiku bakisa keti Masonuku keti ngolu za Nzambi. 30Mukuma, ku lufutumuku lwa bafwa kwakálaku yi bayakala keti bakhetu bakwélana, kaasi bakala hanga banzyo mu zilu. 31Amana kikuma kya lufutumuku lwa bafwa, lwátangaku mana báluzimbwala kwena Nzambi: 32"Meni yena Nzambi wa Bulahami yi Nzambi wa Yizaki yi Nzambi wa Yakobi"? Keku Nzambi wa bafwa kaasi wa bana ba moya.» 33Amana buna báyuka bwana, milumba-lumba mya batu báyituka lawu ku malongi mandi.

Mutsiku wuluti mupfunu

(Mlk 12:28-34; Luk 10:25-28)

34Buna báyuka Bafwadisi ni Yesu wábatsukisa Basadise, bákutakana. 35Amana mosi hana kati dya bawu, mulongi wa mitsiku, kakala muleya mu kumuhyula: 36«Mulongi, khi wawu mutsiku wa mbuta mu mitsiku?»

37Yandi wumuvutwadi: «"Watónda Pfumu Nzambi waku yi mbundu yaku yosu, yi moya waku wosu yi ngangu zaku zoosu." 38Wawu wenina mutsiku wa mbuta yi watheti. 39Amana mutsiku wa zodi, phila mosi yi wuna wa theti: "Tonda khunda waku hanga ngeyi meni." 40Mitsiku myami myodi mivungi mitsiku yi Bambikudi.»

Kidisitu yi Tavidi

(Mlk 12:35-37; Luk 20:41-44)

41Bwosu bákutakana Bafwadisi, Yesu wábahyula 42mu kuzimbula: «Biki lwisi banza kikuma kya Kidisitu? Mwana wa nati kenina?» Bamuvutwadini: «Wa Tavidi.» 43Yandi wubazimbwadi: «Abweti si Tavidi, mu Kitembu kisi mutela ni Pfumu, tangwa kisi zimbula:»

44"Pfumu kázimbula kwena Pfumu wama":

Sikuka ku kitata kyama,

yi kuna yibásila bambeni baku ku sina dya bitambi byaku."

45«Disonga yuka ni Tavidi kisi mutela "Pfumu", abweti kakadila mwana wandi?» 46Amana ka mutu ku walenda kumuvutwala ndinga mosi. Tuka kilumbu meni kina, ka mutu ku wámeka hika kumuhyula kyufu.

Currently Selected:

Mathayi 22: YAF

Highlight

Copy