Mathayi 1
1
Bakhaka ba Yesu
(Luk 3:23-38)
1Tala ndala ya Yesu Kidisitu#1:1 Muhowu wawu "Kidisitu" wubati hana kifwanisu kya kyamvu yi muhuludi wuna kasila Nzambi mu kutuma., mwana wa Tavidi#1:1 Mu khama tsambwadi za mvula, ku thwala Yesu, Nzambi wasila ni Masiya mwana wa kyamvu Tavidi kakala. (Yes 9:6-7; 11:1-5; Yel 23:5) yi mwana wa Bulahami.
2Bulahami kábuta Yizaki amana Yizaki kábuta Yakobi; Yakobi kábuta Yuta yi baphangi bandi ba bayakala; 3Yuta kábuta Fwalesi yi Zala, ngudi wa bawu Thamadi; Fwalesi kábuta Hesiloni; Hesiloni kábuta Alami; 4Alami kábuta Aminatabi; Aminatabi wábuta Nasoni; Nasoni kábuta Salamani; 5amana Salamani kábuta Bowasi, ngudi wandi Lahabi; Bowasi kábuta Yobedi ngudi wandi Luti; Yobedi kábuta Yese 6Yese kábuta Tavidi wuna wákituka kyamvu.
Tavidi Kábuta Solumoni, yi mukhetu wa Wudiye; 7Solumoni kábuta Lobuwami; Lobuwami kábuta Abiya; Abiya kábuta Azafu; 8Azafu kábuta Yosafati; Yosafati kábuta Yolami; Yolami kábuta Ozyasi; 9Ozyasi kábuta Yowatami; Yowatami kábuta Akhazi; Akhazi kábuta Ezekyasi; 10Ezekyasi kábuta Manasi; Manasi kábuta Amosi; Amosi kábuta Yozyasi; 11Yozyasi kábuta Yekonya yi baphangi bandi ba bayakala; mu tangwa bákala mu tsi ya kinzenza ku Babiloni.
12Amana kunima dya kukota mu kinzenza ku Babiloni, Yekonya kábuta Salasyedi; Salasyedi kábuta Zolubabedi; 13Zolubabedi kábuta Abiwudi, Abiwudi kábuta Edyakimi; Edyakimi kábuta Azolu, 14Azolu kábuta Satoki; Satoki kábuta Akimi; Akimi kábuta Ediwudi; 15Ediwudi kábuta Eleyazadi; Eleyazadi kábuta Matani; Matani kábuta Yakobi; 16Yakobi kábuta Yozefu, yakala dya Madiya, kwena Madiya kwábutuka Yesu, wuna bisi tela Kidisitu.
17Disongidila, makula kumi yi maya mahyoka, tukidila Bulahami tii yi kuna Tavidi, amana makula kumi yi maya hika máhyoka, tukidila Tavidi tii yi kuna kinzenza kya ku Babiloni, amana makula kumi yi maya máhyoka tukidila mu kinzenza kya ku Babiloni tii yi kuna Kidisitu.
Lubutuku lwa Yesu Kidisitu
(Luk 2:1-7)
18Amana tala buna lwákadila lubutuku lwa Yesu Kidisitu. Madiya, ngudi wandi, kákala mbayi wa Yozefu; ku thwala ya kikhunda kya lutu lwa bawu, wádimona ku vumu mu ngolu za Kitembu kyatoma. 19Amana Yozefu, yakala dyandi#1:19 Yozefu kabanza ni mbongi kata mukhetu wandi. Disongidila, kazolaku hika kumukwela. , kakala wabukheti yi wasungama amana kátondaku kumuyukisa tsoni ha mbasi, kahanga, wubongi dibanza dya kumuyambula mu kitsweki. 20Bwosu kakalabwa banza, hanga wanzyo wa Pfumu wumulubwakidi mu ndosi amana wuzimbudi: «Yozefu, mwana wa Tavidi, kalaku yi bweya bwa kutambula, Madiya, hanga mukhetu waku, mukuma kifundu kya mwana wuna kayimiti, kwena Kitembu Kyatoma kitukini. 21Amana kabúta mwana moosi wa yakala, amana wamutediki mu khumbu ya Yesu#1:21 Disongidila dya khumbu ya Yesu «Nzambi kisi hulula». , mukuma yandi wahúlula kikanda kyandi ku masumu mandi.»
22Moosu mana máhangama ndangu malungila mana kázimbula Pfumu mu nzila ya mbikudi:
23«Ndumba wakonda kedi zaya yakala, kayímita vumu amana kabúta mwana mosi wa yakala,
amana bamútediki mu khumbu ya Manwedi.»
Disongidila: «Nzambi kenina ha kimosi yi betu.»
24Mu kutokama kwandi, Yozefu wáhanga buna kamulongikila wanzyo wa Pfumu, amana wátambula mukhetu wandi. 25Kaasi kámuzayaku lutu tii yi kuna kabutila mwana mosi wa yakala, wuna káheka yandi khumbu ya Yesu.
Currently Selected:
Mathayi 1: YAF
Highlight
Share
Copy
Want to have your highlights saved across all your devices? Sign up or sign in
©2022 Seed Company in coordination with Forum Communautaire des Traducteurs de la Bible et Alphabétisation
