Maka 6

I Jisu qai Kilu Pale pa Nazareti

(Matiu 13.53-58; Luke 4.16-30)

1Ego i Jisu sa taloa pa gugusu isa ko sa lao pa gugusu ketakoi sa lavata sae ko ira na ona sepele qai tutia lao sisa. 2Totonai sa kamua na rane Minere, poni sa podalai vaivagigalai pa ruma vavaikamuna sisa.

Ko ira doru qai nongoria isa sa qai gabara vivitigi, ko pira qarigu, <<Pai koko veidi sa na roroqu pira? Na gigalai sa sa isongia sa na tinoni api? Ko na roiti vaivagabaradi tu ba sa roiti votuniria! 3Na kamada gu sapi! Ko na tuna gu i Mere beto ko na tugadi gu ira Jekopi, Josesi, Jiudasi beto i Saimone sapi! Na luluna rereko ba qai korapa gu inara!>> qarigu sira. Ko qaike tavaraguania ira si Jisu.

4Poni pira sauniria i Jisu sira, <<Na tinoni kokorotai sa doru eqa sa tapangaga gu, goto pa ona gugusu ketakoi sa lavata sae gu ko tadira na turana beto pa ona tatamana gu mekana sa sake tapangaga,>> sauniria. 5Ko sake boka roitiniria ketakoi isa sira na roiti vaivagabaradi, goto ira kaki tinoni qai mo gu sa vaoponiria na limana ko sa salanaria. 6Ko sa gabarania i Jisu sa veveina sa keporeniria na vinasosoto ira.

I Jisu sa Garunuria ira ka Manogarua Sepele

(Matiu 10.5-15; Luke 9.1-6)

Ego sa lekogoria i Jisu sira na gugusu pa vailivutaina ketakoi ko sa kole vaivagigalai. 7Beto sa kuku vaikamuniria isa sira ka manogarua ona sepele ko sa okoto pikata varuaria pa kai reregena, sa vaniria na neqi ijudi ira na gagala ikeredi, beto sa garunu variuria. 8Ko sa pojaniria tugu ko maike pogosia kai sa pa dia rerege lao, goto na dia opata gu. Maike pogoso besa, na mane, beto na poata ininamane sauniria. 9Mai vasaeria gu na dia sadolo, goto maike vasae tamoi poko sauniria. 10Beto pira sauniria, <<Tonai muna tavakamu pa kai ruma, sa muna suvere gu ketakoi tinganai muna taloa riu pa ia isa sagou. 11Ira kaki gugusu bai daidia vakamugou beto bai daidia nongorogou, sa mu turu loa pale sa na gugusu isa beto mu tavusu paleria sira na kavuru peso pa nenemiu. Ko isa sa na vinagigilana kode mai tavakilasa sira,>> sauniria.

12Ko qai taloa riu taraenia sa ira na tinoni mai gabala loiria na dia sela qariguniria, 13qai iju vovotu paleniria soku tomate ikikeredi, beto qai oraniria na oela sira na soku tinoni qai mo ko qai salanaria.

Na Mate ti Jone Paputaiso

(Matiu 14.1-12; Luke 9.7-9)

14Ego sa nongoroniria i Herodi na bangara sira doru sakasava vei sa roitiniria i Jisu, ura na isongona isa sa sa tagigila doru gugusu. Ko ira kaki tinoni ba pira qai paparanga vei, <<I Jone Paputaiso sa sa tei turu mule tu qarigu. Ko sa soni vei sa qai roiti tana sira na roiti vaivagabaradi,>> qarigu.

15Ba ira kaki sa aipira tu qai paranga vei, <<I Elaija sapi!>> qarigu.

Beto kaki goto sa pira tu qarigu, <<Kai tinoni kokorotai sapi, kai veveina ira na tinoni kokorotai pa moa sina!>> qarigu.

16Ko tonai sa nongoria inara qai paranga vei sira, sa sa paranga si Herodi, pira sau, <<Isa tugu i Jone Paputaiso qa tei kujukia tu ara sa sa turu mule!>> sau.

17Ura i Jone sa perangaina tu i Herodi tugu mekana qi garununi tinoni ko qai piu vatomea pa ruma vaipiu. Na ginuana sa tapiunia i Jone sa na veveina gu i Herodiasi. I Herodiasi sa na maqotana tu i Pilipi isa na tasina gu mekana i Herodi, ba qi alavia tu nona i Herodi si Herodiasi. 18Ko i Jone tugu qi kole manoga popojania si Herodi, pira qiunia, <<Nake tavamalumuna pana Vavanau sa vei ao qu suvere tavitia na maqotana na tasimu,>> qiunia. 19Ko i Herodiasi qi puku vakolenia pa bulona sa api ko qi nyogua vamatea si Jone, ba qike boka. 20Ura i Herodi ba qi matagutunia si Jone ura qi gigilaiona sa i Jone sa kai tinoni tuvisina beto na liosona sisa ko sa vei sa qi kopu vasarenia sisa. Ko tonai qi nongoria sa na paranga ti Jone sa qi rura tugu, ba qi kole nongoro qeqerania tugu sisa.

21Ego tonai qi kamu sa na rane podo ti Herodi sa sa qi tekua na totoso jongana si Herodiasi. Qi roitinia i Herodi sa kai vavolo rane podo beto qi soruria sira na iviva lalavata pa qavuna, ira na kutadi ira na tinoni vaipera, beto ira na ivivadi ira na bubutu tinoni pa Qalili ko qai lao somana teteku. 22Ko pa vaikamu isa qi tome lao pepeka sa na tuna rereko i Herodiasi, ko qi vaqerai si Herodi beto ira na tinoni qi soruria.

Ko qi paranga lao tana koburu rereko sa na bangara, pira qiu, <<Mu tepanisiu isa qu nyoguania. Ara mana vanigo sa na mua nyorogua,>> qiunia. 23Beto qi maulu lao tana rereko, pira qiu, <<Ai tu sakasava veveina sa muna tepai ao, ba kode mana vanigo gu. Bi na kobuna na qua binangara bugu tu sao, ba jongana gu!>> qiu sisa.

24Poni qi votu lao nanasia na tinana sa na rereko api, pira qiunia, <<Na sa sa mana tepai ara,>> qiunia.

Poni qi oe lao sa na tinana, pira qiu, <<Na batuna i Jone Paputaiso, mugunia,>> qiu.

25Poni qi sisiqarai mule lao tana bangara sisa ko pira qiu, <<Qa nyoguania ko mu petania pa peleita sa na batuna i Jone Paputaiso beto mu pogoso lame vanisiu kopira tugu,>> qiunia.

26Qi takulanga vivitigi tugu na bulona sa na bangara, ba qi tei maulu tu pa moedi ira na iviva lavata sisa ko qike boka dainiaona sa na tepa tana rereko. 27Ko pa totoso tugu isa qi garunia i Herodi sa kai tinoni kopu tadira na solodia ko mi pogoso lamenia sa na batuna i Jone qiunia. Ko qi lao sa na tinoni isa ko qi kujukia pa ruma vaipiu si Jone, 28beto qi petania pa peleita ko qi pogoso lame vania sa na rereko. Ko na rereko api qi tekua ko qi pogoso laonia tana tinana. 29Totonai qai nongoro sira na sepele ti Jone sa qai kamu pogosia ira sa na kokobu tinina i Jone Paputaiso ko qai lao golomia pa kai bevi vavaigolomona.

I Jisu sa Vatetekuria ira ka Lima Tina Tinoni

(Matiu 14.13-21; Luke 9.10-17; Jone 6.1-14)

30Ego qai mule vaikamu tai Jisu sira ka manogarua tinoni tagarunudi, ko qai vavakato vania isa sira doru sakasava vei qai roitiniria beto qai vaivagigalainiria. 31Poni sa pira sauniria i Jisu sira, <<Mei, aria ko ta lao pa kai ia kaloina mekada, ko agou ba mu minere mai,>> sauniria. Ura qai soku jola sira na tinoni qai kamu vaibei, ko i Jisu beto ira nona sepele ba qaike boka teku totoso ko bai tetekudia.

32Ko qai koi pa kai koaka ko qai lao kai ia kaloina mekadi. 33Ba ira na kubo tinoni sa qai doro gigalariadia sira tonai qai toka. Ko qai abutu poana sira na tinoni na lame veidi pa doru okoto gugugusu ko qai lao vakujeleria ko qai vera momoedia pa ia ketakoi mai korapa lao paro qarigu ira Jisu beto ira na ona sepele. 34Tonai sa jorotongana pa poanana si Jisu, sa sa batia sa na minete lavata ko sa roroqu vivitigiria, ura qai vei puputa na sipi kepore na dia sepati. Ko sa podalai vaivagigalainiria soku sakasava i Jisu sira.

35Ego ko tonai sa gore na vevelu sa qai lame tana sira na ona sepele ko pira qarigu, <<Na ia kaloina sa lani, beto ko sa tei gore tu sa na vevelu. 36Ko mu garunuria ira na tinoni pira ko mai lao pa gugusu vailivutaidi inara ko mai vaigadia gagani mekadi,>> qarigu sira.

37Ba sa oe laoria i Jisu sira, pira sau, <<Dai. Agou tu mu vaniria na tetekuna sira pira,>> sau.

Poni qai paranga sira na sepele, <<Ai vei qu nyoguania ko me lao vaini gagani karu gogoto poata siliva#6.37 Kai poata siliva sa na padana na tabara kai rane. beto me iaria ko mai teteku qugu?>> qarigu sira.

38Poni sa sa nanasaria tu i Jisu sira, pira sau, <<Ka visa batu bereti qu pogosoria? Mu lao moko dororia,>> sauniria.

Ko tonai qai batia sa pira qarigu, <<Ka lima batu bereti, beto karu igana,>> qarigunia sisa.

39Poni sa pojaniria i Jisu sira doru ko qai pipikata pa okoto pukuna beto sa qai toqo pa buburu. 40Ko qai toqo vavaitivi pa okoto dia puku tinoni, kaki pupuku tinoni sa kai gogoto, kaki limangavulu. 41Beto poni sa tekua i Jisu sa ka lima batu bereti beto karu igana ko sa enga sae pa noka, sa mananiria, beto sa kikiparia sa na bereti beto sa vaniria ira nona sepele ko qai iaria sira na tinoni. Beto sa kikiparia mule sa karu igana beto sa qai iaria mutugu sira doru. 42Ko ira doru sa qai teteku beto qai pote beto. 43Beto sa qai aru vavaikamuniria sira na kikipa bereti beto na igana qai kole joladi, ko qai vapugeleniria sa ka manogarua totopa. 44Ko na anye vaikamudi ira doru tinoni qai teteku sira ka lima tina marene.

I Jisu sa Rerege pa Vuliti Kolo

(Matiu 14.22-23; Jone 6.16-21)

45Ego sa pojaniria i Jisu sira nona sepele ko mai koi pa koaka ko mai toka lao momoe pa Betiseda pa kai karovona na ovuku sauniria, goto isa sa suvere jola ko sa doro variuria mai tu sira na minete tinoni. 46Ko pa liguna sa loloa variuria ira poni sa sagere sae pa kai kukubo sisa ko sa vavara.

47Ko totonai sa gore na vevelu sa na koaka sa tei lao tu pa kokorapa kolo, goto isa mekana sa korapa pa peso tu. 48Ko sa gele laoniria sa qai korapa vaimategadia na qelu sira nona sepele, ura sa raja koimoa sa na gava. Ko papada vaikorapaina kue ko vonomo koloko vuvugei jonga sa sa rerege pa vuliti kolo ko sa lao kamuria sisa. Ko mi alokata jolaniria sau. 49Ba totonai qai batia sisa sa korapa rerege pa vuliti kolo, sa palu na tomate qarigu sira ko qai lukana uui tu. 50Ira doru sa qai bati betoadia ko qai matagutu neneqere beto.

Ba pa totoso tugu isa sa paranga laoria isa sira, pira sauniria, <<Mu varene! Ara gu sapi, muke matagutu!>> sau sisa. 51Beto sa totonai sa koi lao pa koaka sisa, sa sa bule betona sa na gava. Ko qai gabara vivitigi sira na sepele. 52Ura qaike doro vakaberia ira sa na ginuana ka lima batu bereti sa vaivatetekunia i Jisu ura sa oqoro revanga na dia roroqu.

I Jisu sa Vaisalana pa Qenesareti

(Matiu 14.34-36)

53Ego tonai qai karovia ira sa na kolo sa qai lame paro pa ia pa Qenesareti, ko qai vatitia ketakoi sa na dia koaka. 54Isa tugu qai tete paro sira, sa qaike ruavo tugu doro gigalia ira na tinoni ketakoi si Jisu. 55Ko qai abuturia ira sira na ruruma tadira na tinoni qai suvere ketakoi beto ko qai okoto pogoso kamu tavitiniria tugu na dia lovu sira na tinoni qai mo. Ketakoi qai nongoronia pa sanu sa korapa i Jisu qarigu poni sa qai vaipogoso lao beto vei tugu ketakoi. 56Ko pa doruna ia ketakoi sa rijo lao vei i Jisu, bi pa gugusu ikikete babi pa gugusu lalavata, sa qai pogoso kamuniria tugu pa ia mamaketina ketakoi sira na tinoni momoodi beto qai tepa totokai ira si Jisu ko mai ulia gu na uquna nona poko ba jongana gu qarigu. Ko ira doru tinoni moodi qai ulia na uquna nona poko sa qai tasalanadia tugu.

Currently Selected:

Maka 6: LGA

Highlight

Copy