Matiu 4

Na Totokena i Jisu

(Maka 1.12-13; Luke 4.1-13)

1Ego pa liguna isa sa toni saenia pa qega na Gagala Tabuna si Jisu ko mi totokea na bangaradi na tomate sau. 2Ko sa tatabu gagani ka madengavuluputa ranena beto madengavuluputa bongina sisa, ko sa burana. 3Ko totonai sa kamu sa na bangara totoke, ko pira saunia sisa, <<Vei muna na Tuna na Tamasa sao, sa mu parangaria na patu pira ko mai peluku bereti,>> sau sisa.

4Ba sa oea i Jisu sisa, pira sau, <<Sa paranga sa na Kukuti Tabuna,

<Nake bereti gu mekana

sa toania sa na tinoni,

goto doru paranga tu

sa ovelainiria na Tamasa!>#Vavanau 8.3. sau,>>

sau si Jisu.

5Ego beto sa toni laonia na bangaradi na tomate pa gusu tabuna pa Jerusalema si Jisu, ko sa vaturua pa are babanana na kakabarena zelepade, beto pira saunia, 6<<Vei muna na Tuna na Tamasa sao, sa mu soqolo gore! Ura pira sau sa na Kukuti Tabuna,

<Isa mina garununigo

ira na ona mateana sao,

ko mai kalonigo na limadi,

ko na nenemu minake tupania pa patu,>#Kera Vinatarasae 91.11-12. sau,>>

sau na bangaradi na tomate.

7Poni sa oea i Jisu sa na bangaradi na tomate, pira saunia, <<Pira mutu sau sa na Kukuti Tabuna, <Muke podekia na Bangara na mua Tamasa!>#Vavanau 6.16. sau,>> sau si Jisu.

8Poni sa toni saenia mule na bangaradi na tomate pa kai kubo ululuna si Jisu, ko sa vabatinia doru binangara pa kasia gusu beto na dia neqi lalavatadi. 9Beto pira saunia si Jisu, <<Dorudi aipira sa ao mana vanigo, vei muna vukele gore ko muna vatarasaesiu ara,>> sau.

10Poni sa oea i Jisu sisa, <<Mu riu vasou, Setani! Ura pira tu sau sa na Kukuti Tabuna,

<Na Bangara na mua Tamasa gu

mu vatarasaea,

beto isa gu mekana

mu nabulunia!>#Vavanau 6.13. sau,>>

sau si Jisu.

11Poni sa sa taloa riu sa na bangaradi na tomate, ko api sira na mateana qai kamu ko qai tokania i Jisu.

I Jisu Sa Podalainia Na Ona Roiti Pa Qalili

(Maka 1.14-15; Luke 4.14-15)

12Ego totonai sa nongoronia sa i Jone sa qai tei vatomea tu pa ruma vaipiu qarigu, poni sa sa taloa riu veiona pa Qalili si Jisu. 13Ko sa iolo loai sa pa Nazareti ko sa gore suvere vei pa Kepaniami pa keketai ovuku pa Qalili, pa pikata ia pa Zabuloni beto pa Naputalai. 14Ko sa gore votu sa na paranga sa pojai i Aisea na tinoni kokorotai, pira sau,

15<<Na peso Zabuloni beto na peso Naputalai,

na soana vei pa ovuku,

pa karovona pa Jodani,

pa Qalili tadira na tinoni karovodi.

16Ira na tinoni qai suvere pa rodomo

qai batia kai kabere lavatana.

Ira qai suveria na ia

sa angovia na ongongu mate

sa goreria na kabere,>>#Aisea 9.1-2.

sau i Aisea.

17Podalai na totoso isa sa podalai tarae si Jisu, pira sau, <<Mu gabala agou! Ura mi togagita gu sau sa na binangara pa noka!>> sau sisa.

I Jisu Sa Kukuria Ira Ka Made Tinoni Abu

(Maka 1.16-20; Luke 5.1-11)

18Tonai sa korapa popoanaona pa ovuku Qalili si Jisu, poni sa batiria sira kao tamatasi ira Saimone isa sa tavaisongo i Pita beto i Aduru na tasina. Qai korapa vaqaradia pa ovuku, ura na tinoni abu sira karu. 19Ko pira sauniria i Jisu sira karu, <<Mei, lame! Tutisiu, ko ma roitinigou na tinoni abu tinoni,>> sauniria. 20Na totoso tugu isa qai loa paleniria ketakoi ira karu sa na dia vaqara, ko qai lao tutiadia si Jisu.

21Ego ko sa jola lao poni sa sa batiria gu mule i Jisu sira karu goto tamatasi, ira Jekopi beto i Jone, karu tuna marene i Zebeti. Qai korapa tugu koi tavitia pa koaka sa na tamadi i Zebeti, ko qai korapa oke tuvakaria na dia vaqara, poni sa sa kukuria i Jisu sira kao tamatasi ira. 22Na totoso tugu isa sa qai loa paleniria ira karu sa na dia koaka beto na tamadi, ko qai lao tutiadia si Jisu.

I Jisu Sa Vaivagigalai, Sa Tarae, Beto Sa Vaisalana

(Luke 6.17-19)

23Ego ko sa lekogoria i Jisu sa doru ia pa Qalili, ko sa kole vavaivagigalai pa dia ruma vavaikamudi, sa taraenia na nongoro jongana na binangara tana Tamasa beto sa salana paleria isa sira doru mo beto na vagauru qai koleria na tinoni. 24Ko na nongorona i Jisu sa sa lekogia na doru ia pa Siria. Ko qai toni kamuniria tana sira doru sa koleria na okokoto mo vagauru, ira qai gosororia na vitigi lalavata, ira sa tomeria na tomate ikikeredi, ira qai kikirenge, beto ira sa mate kale kokobu tinidi. Ko sa salana betoria i Jisu sira doru. 25Ko qai tutia i Jisu sa ira na minete lavata koko veidi pa Qalili, pa Manogagusu, pa Jerusalema, pa Jiudia, beto pa kai karovona Jodani.

Currently Selected:

Matiu 4: LGA

Highlight

Copy