Matiu 2

Ira na Tinoni Gigigalai Pa Kale Sagere Tapo

1Ego totonai sa podo i Jisu pa Betilihema pa Jiudia, isa na totoso sa bangara i Herodi, sa api sira kaki tinoni gigigalai qai taloa koko vei pa kale sagere tapo ko qai bola pa Jerusalema, 2ko qai nanasa, pira qarigu, <<Ai sa na koburu sa podo bangara tadira na Jiu? Qe nanasa ura qe batia pa kale sagere tapo agei sa na seru tana, ko qe kamu ko me vetarasaea isa qeu,>> qarigu sira.

3Ego totonai sa nongoria i Herodi sa na veveina isa, sa sa takulanga sisa beto ko ira dorudi pa Jerusalema. 4Ko sa kuku vaikamuniria i Herodi sira na kuta iama beto ira na tinoni vaivagigalai tadira na tinoni, ko sa nanasaria, <<Pai mina podo sa na Karisito?>> sauniria.

5Poni sa pira qarigunia, <<Pa Betilihema pa Jiudia, ura api sa sa korotonia na tinoni kokorotai,

6<Ao Betilihema pa ia pa Jiudia.

Ao nake goboromu tadira na gugusu mamata pa Jiudia,

ura tamu mina votu lame vei sa kai mamata

isa mina pausuria sira na qua tinoni Izireli,#Maika 5.2; 2 Samuela 5.2.> sau,>> qarigunia.

7Poni sa kuku kaleniria i Herodi sira na tinoni gigigalai, ko sa nyaqo votunia tadira sa na totoso sa bola votu na seru. 8Beto sa sa garunu goreniria pa Betilihema, pira sauniria, <<Mu gore nyaqo votu vatalenia agou sa na veveina na koburu. Ko isa tugu muna batia, sa muna ule vanisiu, ko ara ba mana somana gore vatarasaea tugu vei,>> sauniria.

9Pa liguna qai nongoria na bangara poni sa qai taloa riu sira na tinoni gigigalai aipira. Ko api sa na seru, isa qai batinia pa kale sagere tapo perangana, sa sa toniria, ko tinganai sa lao turu vanoso pa narena totona ketakoi sa kole na koburu. 10Ko totonai qai batia na seru sa qai qera vivitigi. 11Ko qai tome lao pa ruma poni sa qai batia sa na koburu beto i Mere na tinana. Ko qai gona toqo sori tutungu ko qai vatarasaea sa na koburu, beto sa qai raua sa na dia baiki vaivana ko qai vania na qolo, na parakenisenisi beto na moa sa na koburu. 12Beto sa voturia pana putagita sa na ule vabalau ko maike mule sae tai Herodi sauniria, ko qai tutia na goto soana tu ko qai mule riudia pa dia gugusu sira na tinoni gigigalai.

Na Uku Gore Pa Ijipi

13Ego pa liguna qai taloa riudia ira na tinoni gigigalai pira, poni api sa votu tai Josepa pa putagita sa na mateana tana Bangara, ko pira saunia, <<Mu turu, mu tonia sa na koburu beto na tinana ko mu uku riu pa Ijipi, ko mu suvere ketakoi tinganai mana parangigo mule ara. Ura i Herodi sa mi nyaqoa sa na koburu inana ko mi vamatea sau,>> saunia.

14Poni sa turu si Josepa, sa tonia sa na koburu beto na tinana na bongina tugu isa, ko sa taloa riuona pa Ijipi. 15Ko sa suvere ketakoi sisa ko tinganai sa mate tu i Herodi. Ko sa gore votu sa na paranga sa pojai na Bangara tana tinoni kokorotai, pira sau, <<Pa Ijipi qa kuku votunia ara sa na tuqu marene,>>#Gosea 11.1. sau.

Na Vamatedi Ira Na Koburu Ikikete Pa Betilihema

16Ego totonai sa gigilai i Herodi sa ira na tinoni gigigalai sa qai vagonai gu sisa, sa sa tagigiri vivikerenia. Ko sa vaigarunu ko mai vai vamate paleria sira doru koburu marene pa Betilihema beto pa gugugusu vailivutaina, ira koburu karu aorodi ko mi gore tadira na melalu sau. Na anyena na aorodi ira na koburu sa sa padania isa podalai tugu na totoso sa nyaqo votunia isa tadira na tinoni gigigalai. 17Ko sa gore votu sa na paranga sa lame vei tai Jeremae na tinoni kokorotai, pira sau,

18<<Kai ovovele sa tanongoro pa Rama,

na lukana uui beto na kekebo.

I Resolo sa lukanaria na tuna,

ko sa daiona tavamanoto

ura qai manyao sira,>>#Jeremae 31.15. sau.

Na Gabala Mule Koko Pa Ijipi

19Ego ko pa liguna sa mate i Herodi, sa api na mateana tana Bangara sa votu pa putagita tai Josepa pa Ijipi, 20pira sau, <<Mu turu, mu tonia sa na koburu beto na tinana ko mu mule pa peso pa Izireli, ura qai tei mate tu sira qai nyaqoa na toa tana koburu,>> sau sisa.

21Poni sa turu si Josepa, sa tonia sa na koburu beto na tinana ko sa mule pa peso Izireli. 22Ba tonai sa nongoronia i Josepa sa i Akiliasi sa sa beia si Herodi na tamana ko sa bangara pa Jiudia qarigu, sa sa matagutu mule suvere ketakoi sisa. Ko tonai sa votu pa putagita sa na ule vabalau poni sa taloa riu vei pa pikata gugugusu pa Qalili tu. 23Ko sa sae suvere pa gusu na isongona pa Nazareti. Ko sa gore votu sa na paranga sa gore vei tadira na tinoni kokorotai, pira qarigu, <<Mina tagigala na tinoni Nazareti sisa,>> qarigu.

Currently Selected:

Matiu 2: LGA

Highlight

Copy