Matiu 14

Na Matena I Jone Paputaiso

(Maka 6.14-29; Luke 9.7-9)

1Pana totoso ira sa sa nongoronia i Herodi, na bangara pa ia pa Qalili, sa na vavakatona i Jisu. 2Ko sa pojaniria sira na ona iviva lalavata, pira sauniria, <<I Jone Paputaiso sosoto gu sapi! Sa toa mule pa mate! Ko sa vei sa sa isongia isa sa na neqi ko sa soni boka roitiniria isa sira na roiti vaivagabaradi,>> sau.

3Pira sa roroqu vei sisa ura perangana tu qi tei garunuria tu i Herodi sira nona tinoni ko qai piua si Jone Paputaiso ko qai vatomea pa ruma vaipiu. Qi tapiu sisa pa ginuguana gu i Herodiasi na maqotana i Pilipi na tasina. 4Ura kaki totoso qai lao pori sa qi vapoja sosotonia i Jone Paputaiso si Herodi, pira qiunia, <<Sake tavamalumu pa Vavanau sa qu vei ao qu alavia i Herodiasi, ura na maqotana tu na tasimu sisa,>> qiunia. 5Ko pa ginuana isa sa i Herodi qi nyogua vamatea si Jone, ba qi matagutuniria ira na tinoni Jiu ura ira na tinoni Jiu qai vasosotoa sa kai tinoni kokorotai tugu si Jone qarigu.

6Ego ba totonai qi kamu sa na rane podo ti Herodi, sa na tuna rereko i Herodiasi qi lao kole pepeka pa moedi ira na tinoni qai tasoru valame pa vaikamu. Ko qi qera vivitiginia i Herodi sa na pepekana isa, 7ko qi ule votu tarinia na maulu isa sa doru sakasava mina tepai isa sa mina vania gu qiunia sa na rereko api. 8Ko pa roroqu tana tinana sa qi lao tai Herodi sa na rereko ko qi tepa vei pira, <<Mu petania pa kai peleita ko mu vanisiu kopira tugu sa na batuna i Jone Paputaiso,>> qiu. 9Qi takulanga vivitigi si Herodi tonai qi nongoria na tepa tana rereko, ba qi tei maulu vakole tu pa moedi ira na tinoni qi soruria, ko qi pojaniria gu sira na ona tinoni ko mai vania gu sisa vei qi tepai na rereko qiu. 10Ko qi garunuria isa sira kaki ona tinoni vaipera, ko qai lao kujukia pa ruma vaipiu si Jone Paputaiso. 11Beto sa qai petania pa kai peleita sa na batuna ko qai pogoso kamu vania sa na rereko, beto sa isa qi lao vania sa na tinana. 12Pa liguna isa sa qai lao pogosia ira nona sepele sa na kokobu tinina i Jone, ko qai riu golomia. Beto sa qai riu pojania si Jisu.

I Jisu sa Vatetekuria ka Lima Tina Tinoni

(Maka 6.30-44; Luke 9.10-17; Jone 6.1-14)

13Ego totonai sa nongoronia i Jisu sa na veveina i Jone Paputaiso, sa sa taloaona ketakoi pa kai koaka sisa ko sa riu vakaloiona pa kai ia kaloina. Ba tonai qai nongoronia ira na minete tinoni sisa, sa qai turu loaria ira sira dia gugusu ko qai arei tutia si Jisu. 14Totonai sa tete paro si Jisu, sa sa batia sa na puku minete tinoni lavata, ko sa roroqu vivitigiria isa sira ko sa salanaria tugu isa sira qai mo. 15Totonai sa gore sa na vevelu sa qai lao sira na ona sepele ko pira qarigunia, <<Koi, na ia kaloina kepore tinonina sa lani beto ko sa tei papaka vivitigi tu sa na rane. Ai vei bu garunu variuria tu tinganai vei gugugusu sira na tinoni pira ko bai riu vaigadia gagani mekadi,>> qarigu sira.

16Poni pira sauniria i Jisu sira, <<Nake padadi mai riu sira pira, goto agou mekamiu sa mu ianiria kaki tetekuna,>> sau.

17Poni sa qai paranga sira na ona sepele, <<Isa tugu ka lima batu bereti ikete gu beto karu igana gu sa aipira,>> qarigu.

18<<Ego mu pogoso lameniria lani,>> sau si Jisu. 19Beto sa pojaniria isa sira doru na tinoni ko qai toqo beto pa buburu, beto sa sa tekuria sa ka lima bereti beto karu igana, ko sa enga sae pa noka beto sa paranga jongananiria. Beto sa kikiparia sa na bereti ko sa vaniria sira na ona sepele, ko ira na sepele qai iaria sira na tinoni. 20Ko qai teteku ko qai pote beto sira doru tinoni. Beto sa qai tekuria ira na sepele sa ka manogarua totopa ko qai vapugele nyonyoaniria na kikipa gagani kole joladi. 21Na anyedi ira na marene qai teteku sira ka lima tina, goto ira na rereko beto ira na koburu sa qaike taanye.

I Jisu Sa Rerege Pa Vuliti Kolo

(Maka 6.45-52; Jone 6.16-21)

22Ego pa liguna tugu isa, sa sa pojaniria i Jisu sira na ona sepele ko mai koi pa koaka ko mai karovo lao momoe pa kai kale karovona na ovuku, goto isa mi suvere ko mina garunu vamuleria mai na tinoni pa okotodia gugugusu sauniria. 23Pa liguna sa variu betoria na tinoni, sa sa sagere sae pa kai kubo mekana sisa ko sa vavara. Ko totonai sa gore na vevelu, sa sa kole tugu suvereona mekana ketakoi sisa. 24Ko tonai sa sa tei sou lao tu pa korapa kolo sa na koaka, ko sa vaqevulu lao lamenia na bogusu sa na koaka, ura na gava turu koimoa sa viva.

25Ego ko pa vaikorapaina kue koloko vuvugei ko sa lao kamu pa vonomo koloko vuvugei jonga sa sa rerege tuti lao pa vuliti kolo si Jisu. 26Totonai qai batia sisa sa korapa rerege lame pa vuliti kolo, sa qai takulanga vivitigi sira, <<Koi, kai tomate sa sa lamegana api!>> qarigu, ko qai vevela gagateana.

27Poni sake ruavo tugu parangaria i Jisu, pira sau, <<Mu varene! Ara gu sapi, muke matagutu!>> sau sisa.

28Poni sa paranga lao si Pita, pira saunia, <<Bangara, mina vei ao sosoto tugu sina, sa mu kukusiu ko ma rerege lao tamu pa vuliti kolo,>> sau sisa.

29<<Jongana, mu rerege lame gu,>> sau si Jisu.

Poni sa taloa tugu pa koaka si Pita ko sa podalai rerege lao ti Jisu pa vuliti kolo. 30Ba totonai sa vagigilai i Pita sa na giburuna na gava poni sa sa matagutu ko sa podalai dururu, poni sa uui, <<Bangara, mu alosiu!>> sau.

31Isa tugu sa paranga vei inara i Pita poni sa sa kaqama lao aru tamania i Jisu sa na limana isa beto pira saunia, <<Sa ikete jola sa na mua rarange! Ai sa vei ko qu ruarabeke sao?>> saunia.

32Ko totonai qai koi beto pa koaka sira karu doru, sa sa noso betona sa na gava. 33Ko ira na sepele pa koaka sa qai vatarasaea si Jisu, pira qarigu, <<Sosoto jola sa ao tugu sa na Tuna na Tamasa,>> qarigunia.

I Jisu sa Salanaria Sira na Tinoni qai Mo pa Qenesareti

(Maka 6.53-56)

34Ego qai karovia ira sa na ovuku Qalili ko qai lao paro pa gugusu pa Qenesareti. 35Ko qai doro gigalia ira na tinoni pa ia isa si Jisu, ko qai vareregia pa vailivutaina na gugusu lavata isa sa na nongorona isa, ko qai okoto toni kamuniria ti Jisu sira doru tinoni qai mo. 36Ko qai tepa jujukia si Jisu ko mai boka ulia gu sa na uquna nona poko qarigu. Ko ira doru tinoni momodi qai ulia na uqu poko tana, sa qai tasalana beto tugu.

Currently Selected:

Matiu 14: LGA

Highlight

Copy