Matiu 12

I Jisu na Bangarana na Rane Minere

(Maka 2.23-28; Luke 6.1-5)

1Ego na totoso isa sa sa rerege jola vei pa kai inuma vuiti na rane Minere si Jisu. Ko ira na ona sepele sa vairia na burana ko qai podalai ravusu teku vuiti ko qai kole ngojagadia. 2Ko tonai qai batiria qai roiti vei, poni sa ira na Parese pira qarigunia si Jisu, <<Doro! Ira na sepele tamu sa qai roitinia sa na roiti sake tavamalumu ko mina taroiti na rane Minere!>> qarigu sira.

3Poni sa oe laoria i Jisu sira, <<Ai vei qu oqoro tiroamiu tu agou sisa na roiti sa roitinia i Devita beto ira na ona tinoni totonai qai burana ira? 4Na vavakatona isa sa sa tomea i Devita sa na ruma tana Tamasa ko sa gania sa na bereti madina, isa sake vamalumia na Vavanau ko mina gania isa babi ira qai tutia goto ira gu na iama qai tavamalumunia.#1 Samuela 21.1-6. 5Beto quke tiroamiu tu agou pa Vavanau sa ira na iama qai roitiniria na dia roiti na rane Minere pa zelepade sa qai majai tugu ira sa na vavanauna na rane Minere ba qaike tajutunia qai sela sira? 6Ba ma pojanigou ara sagou: kame sa poreveveina jolania na zelepade sa sa korapa lani. 7Aipira sau sa na Kukuti Tabuna, <Na vairoroqu vaitokai sa qa nyoguania, nake vavakukuvu,>#Gosea 6.6. sau. Ko vei bu gigila vataleamiu agou sa na ginuana na paranga api, sa buke jutu goboroniria na tinoni seladi agou sira na tinoni qaike sela.

8Ura na Tuna na Tinoni sa na bangarana na rane Minere,>> sau si Jisu.

Na Tinoni sa Raiqo kai Kale Limana

(Maka 3.1-6; Luke 6.6-11)

9Ego ko sa taloa ketakoi si Jisu, sa sa lao pa kai ruma vavaikamuna tadira na Jiu, 10ko ketakoi sa korapa sa kai tinoni sa raiqo kai kale limana. Ko ira qai korapa nyaqo rokaga ko bai jutunia kaki sela si Jisu sa pira qarigunia sisa, <<Ai vei, na tavamalumuna pa Vavanau sa na salana tinoni na rane Minere?>> qarigu.

11Poni sa oe laoria i Jisu sira, pira sau, <<I sei agou sa isongia kai sipi ko bi vukele jolopo pa oqili na rane Minere sa na sipi isa, poni sa minake bako votunia na rane tugu isa sisa? Kode na rane tugu isa muna bako votunia agou sisa! 12Ba na tinoni tu sa sa poreveveina jolania na sipi! Ko sa vamalumia gu na Vavanau sa na roitinia na roiti jongana na rane Minere,>> sau si Jisu.

13Beto poni sa sa paranga laoa sisa na tinoni sa raiqo kai kale limana, <<Mu radonia na limamu,>> saunia. Ko sa radonia isa sa na limana poni sa jonga ligu vei tugu kai kale limana. 14Poni sa qai taloa riu ko qai vaingodo roroqu sira na Parese ko mai vamatea si Jisu qarigu.

Na Nabulu Tavilena Tana Tamasa

15Totonai sa gigilai i Jisu sa na kukiti tadira api, sa sa taloa riuona ketakoi sisa. Ko ira na minete tinoni sa qai tutia isa, ko sa salana betoria i Jisu sira doru. 16Beto sa pojaniria ko maike vavavakatonia tadira na tinoni sa na veveina isa sau. 17Ko api sa na vagore votuna na paranga tana Bangara sa pojai i Aisea, na tinoni kokorotai, pira sau,

18<<Api sa na qua nabulu qa vilea.

Isa qa roroqua beto qa qerania ara.

Mana vakolenia na Gagalaqu sisa,

ko ira na tinoni karovodi mina ule vaniria na inaalo.

19Minake vaitoke babi kuku vevela sisa,

na ovovelena minake tanongoro pa soana.

20Minake pakata palea kai kae gou maleina,

beto minake piju vamatea kai juke nonona.

Ko mina toa vei isa sisa

tinganai mai batia ira sa na inaalo taqu.

21Ko tana mai vatogasia na dia totoravusu sira na tinoni karovodi,>>#Aisea 42.1-4.

sau sa na Bangara.

I Jisu beto I Beelizebulu

(Maka 3.20-30; Luke 11.14-23; 12.10)

22Ego pa liguna isa sa qai toni kamunia mule tai Jisu ira sa kai tinoni sa tomea na tomate ikikerena ko sa valeqai beto sa vapokai tugu vei. Ko sa salania i Jisu sisa ko sa paranga beto sa babata ligu. 23Ko qai gabara beto sira na miminete tinoni, ko qai kole vavainanasa, pira qarigu, <<Palu api tugu beka sa na Tuna i Devita?>> qarigu.

24Ba ira na Parese sa totonai qai nongoria poni sa pira qarigu, <<I Beelizebulu isa na bangaradi gu na tomate ikikeredi sa vania na neqi sapi, ko sa vei sa sa boka ijiju votu paleria na tomate ikikeredi,>> qarigu.

25Ba sa tei gigilaiona tu i Jisu sa na dia roroqu sa vei inara ko pira sauniria, <<Na binangara sa tapipikata ko qai kole vavaipera mule mekadi, sa kode minake turu vamauru sa na binangara isa. Beto ko doru gugusu babi na tatamana qai vaipipikatai sa maike boka turu vamauru. 26Ko vei kai pikatana tai Setani sa bi rajai gu mule sa kai ona pikatana gu mule mekana, sa sa tei tapipikata tugu mekana si Setani, ko minake boka turu vamauru sa nona binangara isa. 27Ko vei pa neqi gu ti Beelizebulu ba boka iju paleria na tomate ikikeredi sara, poni sa i sei ropi sa vaniria na neqi sira na miu sepele ko qai boka iju paleria sira na tomate ikikeredi? Ko inara sa vei sa na roiti qai roitinia ira sa ulenia sa qu sela gu sagou! 28Dai, pa neqi tu tana Gagala tana Tamasa qa boka iju pale tomate ikikeredi sara, ko na binangara tana Tamasa sa sa tei togagou tu sagou kopira.

29Pira mutu mu doro veinia ko. Kepore sa kai tinoni mina boka tomea sa na leo ruma tana kai tinoni neqina ko mina teku paleria sa doru ona sakasava sa isongoria. Ba momoe sa mina piu vakolea mai tu sa na tinoni neqina api, beto tu poni sa mina soni boka tome laoa isa sa na ona leo ruma, ko mina boka tavusu betoria sira doru ona sakasava.

30Isa sake somana vei taqu sa sa talesiu ara sisa, beto isa sake vaikamu tokanisiu ara sa sa vaipipiarai sisa. 31Ko sa vei isa sa ma poja veinigou pira: doru sela beto na paranga ikeredi qai vakesania na Tamasa ira na tinoni, sa mai boka taleosonia gu. Ba na paranga ikeredi qai vakesania na Gagalana na Tamasa sa maike taleosonia. 32Isa sa poja vivikeria na Tuna na Tinoni, sa mina boka taleoso gu. Ba isa sa poja vivikeria na Gagala Tabuna sa minake taleosonia pa toa kopira beto kamua na kamua,>> sau si Jisu.

Na Gou Beto Na Vuana

(Luke 6.43-45)

33<<Vei mina jongana sa na gogouna na gou, sa na vuana ba mai jongadi tugu. Vei mina ikerena sa na gogouna na gou, sa na vuana ba mai ikeredi tugu. Ura pa vuana gu muna gigilania ai veveina sa na gou. 34Boko tuni dole ikikeremiu! Ko na tinoni ikikeredi vei agou sa kode maike boka paranga votuniria na sakasava jongadi. Ura isa tugu sa pugele ojojongo pa bulo sa sa tapoja votu pa manga. 35Na tinoni jongana sa sa vavoturia sira na uana jongadi qai pugele pa bulona, goto na tinoni ikikerena sa sa vavoturia sira na uana ikikeredi qai pugele pa bulona. 36Ba ma poja vatatalenigou ara sagou: na rane vaituti sa ira tinoni sa mai okokoto vakaberia tana Tamasa sa na ginuana qai pojaria sira doru paranga qai vavukele gobororia. 37Ura doru mua paranga tugu qu pojaria ao sa kode mai tuti mulenigo. Ko na mua paranga tugu mina ulenia sa vei muna talegasania sa ba muna gosoria ao sa na vinakilasa pa vaituti tana Tamasa,>> sau si Jisu.

Kaki Tino Mamata qai Tepai kai Roiti Vaivagabarana

(Maka 8.11-12; Luke 11.29-32)

38Pa liguna sa vei inara, sa qai lao nanasia ira kaki qai vaivagigalainia na Vavanau beto ira na Parese si Jisu, <<Tinoni vaivagigalai, qe nyogua batia agei sa kai roiti vaivagabarana jola tana Tamasa bu roiti votunia ao,>> qarigunia.

39Poni sa pira sauniria i Jisu sira, <<Na sasae tinoni ikikerena beto na vavakeporea na Tamasa sa sa korapa nyoguania kai roiti vaivagabarana jola! E, ba kepore sa kai roiti vaivagabarana muna tavadogoronia, goto isa tugu mekana gu na roiti vaivagabarana sa taroiti ti Jona na tinoni kokorotai. 40Kai muqisi podeke vei tugu sa suvere kue rane beto kue bongi pa leo iapana na igana si Jona, sa mina vei tugu sa na Tuna na Tinoni. Mina kue ranena tugu beto kue bongina tugu pa bevi vavaigolomona sisa, beto sa mina toa mule. 41Na rane vaituti sa kode mai turu ko mai tutinigou ira na tinoni pa Ninive sagou na sasae tinoni kopira. Ura ira sa qai gabala sa totonai qai nongoria na taraena i Jona. Goto doro tu ko, sa korapa gu lani kopira sa kame isa sa poreveveina jolania i Jona. 42Na rane vaituti sa kode mina turu na kalao pa Siba ko mina tutinigou sagou na sasae tinoni kopira. Ura na kakasana jola sa nona rerege koko lame vei pa nona gugusu totonai sa kamu nongoria sa na vaivagigalai bobokana ti Solomone. Goto agou sa doro tu ko, sa korapa gu lani kopira sa kame isa sa poreveveina jolania i Solomone,>> sau si Jisu.

Na Gabala Ligu Tana Tomate Ikikerena

(Luke 11.24-26)

43<<Totonai sa taloa tana tinoni sa kai tomate ikikerena, sa sa riu lekogia isa sa na ia kepore kai savana ko sa nyaqoa sa ketakoi mi suvere minere sau. Ba sake batia isa sa kai ia ketakoi bi boka suvere. 44Poni sa sa paranga gu, <Ma mule vatuvisi gu pa qua ruma ketakoi qa suvere perangana ara,> sau. Ko sa mule sau poni sa batia na kokobana ko sa tei tasaqu valioso na tavatana vatale tu sa na ruma. 45Poni sa mule riu sisa ko sa riu toni kamuniria sira ka vitu tomate qai ikere jolania mekana, ko qai kamu suveria sa na ruma isa. Ko tonai sa na toa tana tinoni isa sa sa ikere jolania na totoso momoe. Mina vei puputa tugu isa sa na sasae tinoni ikikeredi kopira,>> sau si Jisu.

Na Tinana Beto Ira Na Tasina I Jisu

(Maka 3.31-35; Luke 8.19-21)

46Tonai sa korapa paparangaria i Jisu sira na tinoni, sa kamu turu pa sesebe ruma sa na tinana beto ira na tasina marene, ko mai parangia sisa qarigu. 47Ko kame ira qai korapa vaikamu ketakoi sa paranga laoa sisa, pira sau, <<Qokolo, na tinamu beto ko ira na tasimu marene sa qai korapa turu veranigo pa peguru. Qai nyogua parangigo qarigu,>>#12.47 Kaki kukuti kokoledi sake koleria na pikata 47. saunia.

48Ba sa oe laoa i Jisu sisa, <<I sei sa na tinaqu beto ira sei sa na tasiqu marene?>> sau. 49Beto sa uduku laoria sira nona sepele beto sa paranga, <<Pira sira na tinaqu na tasiqu marene! 50Ura isa na tinoni sa roitinia isa vei sa nyoguania na Tamaqu pa noka sa isa tugu sa na tasiqu marene, na luluqu rereko beto na tinaqu,>> sau sisa.

Currently Selected:

Matiu 12: LGA

Highlight

Copy