Matiu 10

Ira Ka Manogarua Tinoni Tagarunudi

(Maka 3.13-19; Luke 6.12-16)

1Ego sa kuku vaikamuniria i Jisu sira ka manogarua sepele ko sa vaniria na neqi ko mai ijiju paleria na tomate ikikeredi, mai salana paleria na okokoto mo beto doru vagauru sauniria.

2Ko aipira sira na isongodi ira ka manogarua tinoni tagarunudi: momoe, i Saimone (kai isongona i Pita) beto i Aduru (na tasina i Pita), i Jekopi beto i Jone na tasina (ira karu tuna i Zebeti), 3i Pilipi, i Batolomiu, i Tomasi, i Matiu isa na tinoni teteku takisi, i Jekopi na tuna i Alepiasi, i Tadiasi, 4i Saimone isa perangana sa somananiria ira qai raja adu palea na qavuna pa Romu, beto i Jiudasi Isikarioti isa sa gabala kanai i Jisu.

Na Garunudi Ira Ka Manogarua Tinoni Tagarunudi

(Maka 6.7-13; Luke 9.1-6)

5Ko ira ka manogarua aipira sa sa vavanauria i Jisu beto sa garunuria, pira sauniria, <<Munake lao tadira na tinoni karovodi beto munake tomeria na gugugusu tadira na tinoni Sameria. 6Goto mu lao tadira na tinoni Izireli ira qai vei na sipi mumadi. 7Mu lao ko mu tarae, pira mugu, <Na binangara pa noka mi togagita gu sau,> mugu. 8Mu salanaria ira qai mo, vatoa muleria ira qai mate, mu taloso valiosoria ira qai popoqu, beto mu iju paleria sira na tomate ikikeredi. Quke vaia isa qu tekua, ko muke vavainia isa qu vaiiania. 9Muke pogoso qolo, na siliva, babi kaki poata pa miu kukurani poata. 10Muke pogosia kai mane, muke pogoso varua poko, muke pogoso sadolo babi na opata pa miu rerege. Na tinoni roiti sa sa pada tugu ko mina taiania sa nona tetekuna.

11Totonai muna kamua kai gugusu lavata babi gusu ikete, sa mu tomea na gugusu isa ko mu doro nyaqoa sa kai tinoni mina qeranigou ko mina vatogagou. Muna suvere gu tana tinganai muna loai na ia isa sagou. 12Tonai muna tome pa ruma sa mu gosoro qeqeraniria sira na tinoni ketakoi. 13Vei mai vakamu vatalegou ira pa ruma isa, sa mu tepai na Tamasa ko mi mananiria. Goto vei maike tavaraguanigou ira, sa mu teku mulenia na miu bule. 14Vei kaki ruruma babi na gugusu sa baike nyogua vakamugou beto baike nyogua nongorogou, poni sa mu turu iolo votu pa ia isa beto mu tavusu paleria pa nenemiu sa na redeni peso pa gugusu isa. 15Ma poja sosotonigou ara sagou: mina jolania na vaituti qai gosoria ira pa Sodomo beto pa Qomora sa na vaituti tana Tamasa mina gosoria na gusu isa na rane vaituti,>> sau si Jisu.

Ira Na Tinoni Tagarunudi Mai Takomiti Vivikere

(Maka 13.9-13; Luke 21.12-17)

16<<Vainongoro! Qa garunu lao veinigou na sipi tadira na godo vulupu pirudi ara sagou. Mu suvere vababalau vei ira na dole beto mu lioso pa miu uana. 17Mu suvere vababalauniria ira na tinoni. Ura kode mai aru tamanagou, ko mai toni laonigou pa vaituti, beto mai mamajagou pa dia ruma vavaikamuna. 18Pana laequ ara sa kode mai toni ragata laonigou pa moedi ira na qavuna beto na babangara, ko muna ule votunia na nongoro jongana tadira beto tadira na tinoni karovodi. 19Totonai mai toni laonigou pa vaituti, sa munake takulangania agou sa na sa muna poja totokenigou mekamiu. Ura tonai mina kamua tu sa na totoso paranga tamugou sa muna taiania agou sisa vei muna pojaniria agou. 20Ura nake agou sa muna kole paranga, goto na Gagalana na Tamamiu tu sa mina ule vanigou isa muna pojai.

21Ira na tatamatasi marene sa kode mai vaivalao pa mate, na tamadi mina veiniria tugu na ona koburu, ira na koburu mai rajaria sira na tinadi na tamadi ko mai vamateria. 22Doru tinoni sa kode maike tavaraguanigou ura koko vei qu tutisiu ara. Ba isa sa vangaju kamua na bebetona sa mina taalo. 23Tonai mai komiti vivikeregou ira na tinoni pa kai gugusu sa mu uku laomiu pa kai goto gugusu. Ura ma poja sosotonigou ara sagou: kode muna oqoro vaokoto betoria agou sira na miu roiti pa doru gugusu pa Izireli, sa mina mule lame gu sa na Tuna na Tinoni.

24Na sepele sake lavata jolania sa na ona tinoni vaivagigalai. Beto na pinausu sake lavata jolania sa na ona bangara. 25Sa pada gu sa na sepele mina vaitoto vei na ona tinoni vaivagigalai, beto sa pada gu sa na pinausu mina vaitoto vei na ona bangara. Vei ara na miu tinoni mamata mai gigalanisiu i Beelizebulu,#10.25 I Beelizebulu sa na bangaradi ira na tomate. poni sa agou na qua tinoni sa kode mina nongoro kare jola mutu sa na isongo mai kukunigou!>> sau si Jisu.

Isa Mu Matagutunia

(Luke 12.2-7)

26<<Ko muke matagutuniria sira na tinoni ira. Ura doru sakasa paedi sa kode mai tabata votu beto doru sakasa golomodi sa mai tagigila. 27Isa qa ule vanigou ara pa rorodomona sa mu vavakatonia pa kakaberena, beto isa qu nongoria pa paena sa mu vevelania pa are ruma. 28Muke matagutuniria sira qai boka vamatea na tini ba qaike boka vamatea na gagala. Goto na Tamasa tu sa mu matagutunia agou. Isa sa mina boka piaria na vamateria na toa tini beto na gagalamiu ko mina boka valaogou pa heli.#10.28 Na paranga sa tapeluku heli lani sa pa paranga Qiriki na <<Qehena>>. Pa Qehena sa na isongona na lolomo pa peguruna pa Jerusalema, ketakoi qai gogona pale nyanyao na ikika beto qai vatoni iku na rane na bongi ko na iku sa toa laona gu doru totoso. Pa Vinaego Koregana sa pa heli na ia qai lao ira qai gosoria na vinakilasa tana Tamasa. Doria vei pa 5.22, 29, 30; 18.9; 23.15, 33.

29Kai pene ikete gu na vaidi sa karu kiri tu, ba sake pae tu pa roroqu tana Tamasa sa totonai sa vukele pa peso kame ira karu kiri pira. 30Ko agou ba doru vurungumiu pa batumiu ba sa tei anye betoria tu na Tamasa. 31Ko muke mamatagutu. Agou sa qu poreveveina jolaniria kubo ngavulu avara kiri,>> sau si Jisu.

Ira Qai Ulenia Beto Ira Qai Kilu Pale I Jisu

(Luke 12.8-9)

32<<Isa sa ule votunia pa moedi ira na tinoni sa isa kai tinoni taqu minagu, sa ara ba mana ule votunia tugu isa pa moena na Tamaqu pa noka sisa. 33Goto na tinoni sa kilu palenisiu ara pa moedi ira na tinoni, sa ara mana kilu palenia tugu pa moena na Tamaqu pa noka sisa,>> sau si Jisu.

Na Bule Beto Na Vaipera

(Luke 12.51-53; 14.26-27)

34<<Kita mu roroqua agou sa na bule sa qa pogoso lamenia ara pa peso kita mugu. Dai, nake bule sa qa pogoso lamenia ara, goto na benete vaipikatai tu. 35Qa lame sara ko ma vaipikatainiria na tuna marene beto na tamana, na tuna rereko beto na tinana, beto na tatamaivana beto na tatamaroana qau. 36Ira na kana ikeredi jola tana tinoni sa mina ira ka visa gu pa ona tatamana.

37Isa sa roroquria na tamana babi na tinana jolania sa roroqusiu ara sa sake pada ko mina sepele taqu. Isa sa roroqua na tuna marene babi na tuna rereko jolania sa roroqusiu ara sa sake pada ko mina sepele taqu. 38Isa sake pogosia na ona korosi ko mina tutisiu ara, sa nake padana tugu ko mina sepele taqu sisa. 39Isa sa kole gu jujunonia na ona toa tini, sa mina saivia tugu isa sa nona toa. Ba isa sa gona pale nona toa pa laequ ara sa mina isongia tugu sa nona toa,>> sau si Jisu.

Na Pinia

40<<Isa sa vakamugou agou sa sa vakamusiu tugu sara, isa sa vakamusiu ara sa sa vakamua tugu sisa sa garunusiu ara. 41Isa sa vakamua na tinoni kokorotai ura na tinoni kokorotai sisa, sa isa mina somana tekua sa na pinia tana tinoni kokorotai. Isa sa vakamua na tinoni tuvisina ura na tinoni tuvisina sisa, isa mina somana tekua sa na pinia tana tinoni tuvisina. 42Isa mina vania kai kapa pie lomoso sa kame isa nake poreveveina aipira ura isa sa na sepele taqu, poni sa ara ma poja sosotonigou sagou: isa mina tekua sosoto sa na pinia,>> sau i Jisu.

Currently Selected:

Matiu 10: LGA

Highlight

Copy