Jone 20

Na Turumule Ti Jisu

(Matiu 28.1-10; Maka 16.1-8; Luke 24.1-12)

1Ego na vuvugei rorodomo oqoro kabere pa rane momoe pa vuiki, sa sa munu lao pa bevi si Mere na rereko pa Magadalene, ko sa dogoro lao sau poni sa tei tavatitolo rijo tu sa na patu pateina na mangana na bevi. 2Poni sa abutu mule lao tai Saimone Pita beto tana kai sepele isa sa roroqu vivitigia i Jisu sisa, ko pira sauniria, Qai tei teku variu palea tu pa bevi sa na Bangara, ko qeke gigilai pai qai vakolenia, sau.

3Poni qai taloa ko qai lao pa bevi sira Pita beto na sepele isa. 4Qai mekarai abutu lao sira karu, ba sa abutu valiligu palea na sepele isa si Pita ko sa lao kamu momoe pa bevi. 5Ko sa ovoro oviki tome pa bevi sau sisa, poni sa batia sa na poko lineni gu isa qai udenia na kokobu tinina isa, ba sake tome lao pa leo bevi sisa. 6Poni sa tuti liligu kamu si Saimone Pita, ko sa tome jola lao pa leona na bevi. Ko sa batia tugu sa na poko lineni gagale gu sa korapa kole ketakoi, 7beto ko isa na poko qai pikonia pa batuna. Na poko piko batu isa sa sake kole tavitia sa na lineni, goto sa tavijongo beto ko sa kole kaleona tu. 8Ego beto sa tome tuti lao sisa na sepele sa kamu momoe pa bevi, ko sa batia poni sa sa vasosoto. 9(Ura qaike gigila kamua ira sisa na kukuti pa Kukuti Tabuna sa pojai kode mina turu mule tugu pa mate sisa sau.)

I Jisu Sa Votu Ti Mere Pa Magadalene

(Maka 16.9-11)

10Ego beto sa qai muledia pa dia ruma sira na sepele. 11Ba i Mere sa kole tugu turu lulukanaona pa peguruna na bevi. Ko totonai sa korapa tu lulukanaona sa sa ovoro oviki tome pa leo bevi, 12poni sa batiria sa karu mateana qai popoko keala, qai korapa toqodia ketakoi qai vakolenia na tinina i Jisu, kame keta pa kale batuna kame pa kale nenena. 13Poni qai nanasa sira karu, Ago, ai sa vei ko qu korapa tu lukana sao? qarigu.

Poni sa oe lao si Mere, Qai tei teku varijo riu pale tu sa na qua Bangara, ko qake gigilai pai qai vakolenia! sau. 14Beto sa balinga gu sau poni sa batia si Jisu sa korapa tugu turuona ketakoi; ba sake dogoro gigalia i Mere si Jisu tugu sisa.

15Sa nanasa lao tana rereko si Jisu, Ago, ai vei ko qu korapa lukana tu sao? I sei sa qu korapa nyaqoa ao? sau.

Poni sa roroqua i Mere sa palu na tinoni roiti pa inuma sisa sau, ko sa paranga veinia pira, <<Bangara, vei ao bu pogoso varijoa sisa, poni sa mu ule vanisiu ketakoi qu vakolenia ko ma lao tekua,>> sau.

16Sa paranga lao tana si Jisu, Mere! sau.

Sa balinga lao tana si Mere beto sa paranga laoia pa paranga Aramaiki,#20.16 Pa Qiriki sa na paranga Hiburu sau, ba sa doro vei na paranga Aramaiki gu sa sa tagigala na paranga Hiburu. Raboni! sau. (Na ginuana Raboni sa na Tinoni Vaivagilai.)

17Sa paranga lao tana si Jisu, <<Muke ulisiu, ura qa oqoro mule sae tana Tamaqu sara. Goto mu lao tadira ka visa tasiqu ko pira muguniria, <Ara qa korapa mule lao tana Tamaqu beto na Tamamiu tugu vei agou, na qua Tamasa beto na miu Tamasa tugu vei agou sara,> muguniria,>> saunia.

18Poni sa mule riu vavakato tadira na sepele si Mere pa Magadalene, pira sau, <<Ara qa batia sa na Bangara!>> sau, beto sa vavavakato vaniria na paranga sa pojaria i Jisu tana.

I Jisu Sa Votu Tadira Na Ona Sepele

(Matiu 28.16-20; Maka 16.14-18; Luke 24.36-49)

19Ego na veveluna tugu na rane momoe pa vuiki isa, sa qai vaikamu sira na sepele ko qai patei loka takoria pa kai lose, ura qai matagutuniria ira na mamata tadira na Jiu. Poni sa kamu turu pa vaikorapaidi si Jisu, ko pira sauniria, <<Na bule mi somana tamugou,>> sau. 20Ko pa liguna sa paranga vei inara sisa, sa sa vabatiniria sa na limana beto na sisikirina. Ko totonai qai batia ira sa na Bangara sa qai qeqera vivitigi.

21Poni sa pira sauniria mule i Jisu sira, <<Na bule mi somana tamugou. Kai muqisi vei tugu na Tamaqu sa garunusiu sara, poni ara ba qa garunugou tugu sagou, sau. 22Pa liguna sa paranga veiniria inara, sa sa singo lao tadira, beto pira sau, Mu tekua sa na Gagala Tabuna. 23Ira muna taleosoniria agou na dia sela sa mai taleoso tugu sira, goto ira munake taleosoniria agou sira sa maike taleoso tugu sira,>> sau si Jisu.

I Jisu Beto I Tomasi

24Ego i Tomasi (isa sa tavaisongo i Patavivi), kame ira ka manogarua sepele tana, sa sake somana suvere perangana totonai sa kamu voturia ira i Jisu. 25Ko qai kole vavakato vania ira ka visa sepele sisa, Qe batia sa na Bangara, qarigunia.

Ba pira sauniria i Tomasi sira, Vei maneke batiria mai na buridi na pata pa limana, ko maneke totuni kakarusuqu mai sa ketakoi qai suni na pata, beto manake aruni limaqu mai sa na kale sisikirina, sa maneke isongo vasosoto tugu sara, sau.

26Ego ko pa vinavesu rane poni sa qai vaikamu mule pa kai lose sira na sepele, ko totonai sa somana suvere tavitiria si Tomasi. Ko korapa tugu patei vamauruna sa na atakamana, sa sa kamu turu pa vaikorapaidi si Jisu, beto pira sau, Na bule mi somana tamugou, sau. 27Beto pira saunia si Tomasi, Ego, mu totu lamenia na kakarusumu pa buri pa limaqu, beto mu dogoro viloto vataleria na limaqu, beto mu kaqama lamenia na limamu ko mu ulia sa na kale sisikiriqu. Mu noso vavaseke ko mu vasosoto! sau.

28Poni sa oe si Tomasi, pira sau, Na qua Bangara beto na qua Tamasa! sau.

29Sa paranga lao tana si Jisu, Ai vei qu batisiu gu sa qu vasosoto? Mai tamana sira qai oqoro batisiu ara, ba qai vasosoto! sau.

Na Kuta Ginuana Na Buka Api

30Ego totonai sa korapa suvere tavitiria i Jisu sira na ona sepele, sa na kubo jola sira na roiti vinagigila sa roitiniria i Jisu ba qaike takuti pa buka api. 31Goto aipira gu sa qai takuti, ko mu vasosotoa agou si Jisu tugu sa na Karisito, na Tuna na Tamasa, ko pa miu vasosotona isa, sa muna tekua agou sa na toa jola.

Currently Selected:

Jone 20: LGA

Highlight

Copy